Yobo 10 - Amazwi Yakwe Leza 2013

¹ “Apamulandu wakuti nemo lyene caticifuula ukwikala pano nsi, fwandi nkanalukuilizyanya sile.

² We Leza! Utampela umulandu. Nene sile nemo imanye umulandu uno nakutala.

³ Uzye fwandi wemo icisuma vikwene vino ukuncuzya? Uzye caticikuzanzya ukusuula vikwene vii, umuntu wino waiumbile we mweneco umu minwe yako. Alino nukuzumilizya amapange ya antu aipe?

⁴ Uzye wemo wakwata amanso ya untu? Uzye wemo ukalola ndi vino antu yakalola?

⁵ Uzye amanda yako yakasila ivikasila amanda ya muntu? Nanti imyaka yako uzye ikapita ndi vino iya muntu ikapita?

⁶ Uzye icani cino wemo ukakonkelela ukuponga kwane? Uzye icani cino ukulondelezya ukwifya kwane?

⁷ Nu kumanya wamanya ningo sana ukuti nene wakaele. Wamanya ningo ukuti kutalatala kuye umuntu nanti umwi wino alezya ukumfyombotola ukufuma mu makasa yako.

⁸ “Amakasa yako alio yambumvile nu kunjeletula ningo. Uzye lyene ndakai ukasi ukungonona ku makasa yako vwile?

⁹ We Leza icumi iusya ukuti nemo awewe wambumvile ukufuma ukwivu. Alino lyene fwandi ufutuke nu kunswilizya ukwivu kwene?

¹⁰ Uzye, asi wewe kwene wapile tata maka akuti amvyale, nu kuleka ukuti inkule umunda muli mayo?

¹¹ Awewe kwene wapanzile umwili wane kumwi na mafupa ni mikole. Alino umatilizya iminyefu nga ni nkanda.

¹² Wampela uumi, walunda nu kulansakamala lyonsi uku luse lwako ulutupu. Ukampisya pe ulumi.

¹³ Awe fwandi lyene alino namanya ukuti ivintu vyonsi vii, wavisunzile sile umu mwenzo wako wa nkama.

¹⁴ Lino nifyanga wancelekanga sile apakuti nemo ntakalole apa kufuntukila umukuponga kwane.

¹⁵ Ndi cakuti niifya, lyene ningati kalanda kunondi. Nanti angala nene wakaele, nemo ntange nsanzule amanso, pasi pano nemo insonyi zyatizindema wakwe cimwi.

¹⁶ Nanti ningati nkanjitwale apankolelo, wemo ale umandunga kwati avino cisama akalunga. Nupya apakuncuzya ukaswilizyapo ukucita ivipezyamano.

¹⁷ Cila nsita lino ukundwisya ukakwata yakambone aapya. Alino ukali uno wankwatila nene, cila nsita ukuya ukukomelako. Lyonsi ukandwisya umu musango uyiyele upya.

¹⁸ “We Leza we, icani cino walesile ukuti mvyalwe? Fwandi cangecinzipile ukufwila munda yakwe mayo, ukwaula kuti umuntu nanti umwi andole.

¹⁹ Imvyalwa sile akapopo, nu kuzikwa zuwa, ndakai ngano indi wa muntu atatazile aloleke.

²⁰ Ale lelo, uzye amanda yane yatasizile? Wemo ule unte sile nenga! Leka mpemwile kweneko apa kasita kanono,

²¹ lino ntacili inje kuno yasiwela, ku mpanga ya mfinzi iya cinzingwa ca mfwa,

²² uku mpanga ya kanda akakome, uku cisao cikulu nga ni cimvundawila, kuko kuno nu luswepo kwene lwakolana ni mfinzi.”