Yoane 9 - Amazwi Yakwe Leza 2013

Yesu wapozya umuntu uwavilwe impafu

¹ Lino Yesu akupita, alola umuntu wino wavilwe impafu.

² Alino alondezi yakwe yamuzya yati, “Kasambilizya, uzye amaifyo yakwe weni alenzile kuti umuntu wii avyalwe impafu? Uzye amaifyo yakwe wenga nanti amaifyo ya akwasi yakwe?”

³ Yesu aasuka ati, “Umuntu wii, atapafula pamulandu wa maifyo yakwe nanti pamulandu wa maifyo ya akwasi yakwe. Wene wavilwe impafu pakuti maka yakwe Leza yalolekele munoli.

⁴ Lino ucili musanya, katule tuombe milimo yakwe wino uwantuma. Usiku ukwiza lino umuntu atangaomba.

⁵ Lino ncili mu nsi, nene luswepo pakasi ka antu amu nsi.”

⁶ Pacisila cakuvwanga cii, Yesu aswa mati pansi akanda ivu, nga apaka mu manso ya muntu ni ivu,

⁷ nga amunena ati, “Yanga kafulale mu ciziya ca Siloamu.” Izina lii likasenula ukuti (“Waatumwa”.) Caleka umuntu apita, aya fulala pa manso, nga awela akulola.

⁸ Alino ainipamba nga na yao aweni vino wali akalenga yati, “Uzye wii asi muntu wikalanga ala akulenga?”

⁹ Yamwi nao yati, “Aliwe kwene.” Alino wene ati, “Anene kwene.” Yauze nao yati, “Awe asi aliwe, lelo wakolana sile nawe.”

¹⁰ Nao yamuzya yati, “Uzye wali watandika kulola uli?”

¹¹ Nawe ayaasuka ati, “Umuntu wino akaamwa ukuti Yesu wali wakanda ivu na mati, wampaka mu manso, nga wanena kuya ku ciziya ca Siloamu ku kufulala pa manso. Acino nali nayako, nga lino nafulalamo, lilyo kwene natandika ukulola.”

¹² Alino yamuzya yati, “Uzye umuntu wii alikwi?” Nawe aasuka ati, “Ntamanyile.”

Afaliseo yalondelezya vino muntu wapoziwe

¹³ Lyene yaleta umuntu uwali impafu ku Afaliseo.

¹⁴ Wali uwanda wi Sabata lino Yesu wakanzile ivu nu kupozya umuntu ku upafu wakwe.

¹⁵ Nupya Afaliseo yamuzya yati, “Uzye wali watandika kulola uli?” Nawe aasuka ati, “Wali wampaka ivu mu manso, alino nali naya nafulalamo nga ndakai nkulola.”

¹⁶ Yamwi amu Afaliseo yavwanga yati, “Umuntu uwali wacita cii atafuma kuli Leza, pano asyayela isunde li Sabata.” Lelo yauze yati, “Uzye kaifya angacita uli vilangililo wakwe vii?” Alino mukasi kao yapalukana.

¹⁷ Caleka nupya kwene Afaliseo yuzya umuntu uwali mpafu yati, “Wemo wavwanga vino wali wakupozya ku upafu wako. Uzye lyene wemo ukuti uli pa muntu wii?” Nawe aasuka ati, “A kasema.”

¹⁸ Lelo intunguluzi zya Ciyuda nalyo kwene zitakasi kutaila vino umuntu wii wavilwe impafu nga ndakai akulola. Suka kufika lino zyama akwasi yakwe,

¹⁹ zyuzya ziti, “Uzye wii umwana winu? Mukati wavilwe impafu. Uzye lyene ndakai akulola uli?”

²⁰ Akwasi yakwe yaasuka yati, “Twamanya vino wii umwana witu, na vino wavilwe impafu.

²¹ Lelo ndakai tutamanyile cati cilenga kuti alola, nanti umuntu uwali wapozya upafu wakwe. Muzyini, pano wene uwikolo amaivwangila.”

²² Akwasi yakwe yavwanzile cii pano yoofile intunguluzi zya Ciyuda pano ala zyazumilizyanya ukuti, wensi amataila vino Yesu ali Katuula, wene amazingwa mu ng'anda ya mapepo.

²³ Caleka akwasi yakwe yayanena yati, “Wene uwikolo angaivwangila.”

²⁴ Afaliseo nupya yaama umuntu iila lyakwe ciili, wino uwali impafu, alino yamunena yati, “Lumbanya Leza! Twati tumanya vino umuntu wino watakupozya wene akaifya.”

²⁵ Umuntu nawe avwanga ati, “Nda kaifya, nemo ntamanyile. Manyile cintu conga. Nali mpafu, lelo ndakai nkulola.”

²⁶ Caleka yamuzya yati, “Uzye icani cino wene wacisile kunuli? Uzye upafu wako waupozizye uli?”

²⁷ Nawe ayanena ati, “Nati munena, nga namwe mutuvwile. Uzye pacani mukulonda kuvwa nupya pali cii? Uzye namwe kwene mukasi kuya alondezi yakwe?”

²⁸ Nao yamutuka, nu kuti, “Wewe uli mulondezi wakwe, lelo swemo sweswe alondezi yakwe Mose.

²⁹ Twamanya vino Leza wavwanzile kuli Mose. Lelo umuntu wii, tutamanyile kuno wafuma!”

³⁰ Umuntu ayanena ati, “Awe cii icakuzunguka! Mwemo mutamanyile kuno wafuma, lelo wene watampozya ku upafu!

³¹ Twamanya vino Leza asyauvwa yakaifya. Wene akauvwa antu yano akamucindika nu kucita kulonda kwakwe.

³² Kufuma ku utandiko lino insi yacisilwe citatala cuvwika ukuti umwi wapozya umuntu impafu.

³³ Umuntu wii atangacita cimwi, suka ndi wafuma kuli Leza.”

³⁴ Nao yamunena yati, “We muno wavyalwa nu kukula mu maifyo, uzye ukwelenganya vino ungasambilizya sweswe?” Alino yamuzinga mu ng'anda ya mapepo.

Upafu wamu mwenzo

³⁵ Lino Yesu uvwa cati cicitika, nga azana umuntu uwapoziwe amuuzya ati, “Uzye wataila mu Mwana wa muntu?”

³⁶ Muntu nawe aasuka ati, “Mwene, unene umuntu wiyo kuti nani mutaile!”

³⁷ Yesu amunena ati, “Watumulola, na ndakai ali wino mukuvwanga nawe.”

³⁸ Lyene umuntu avwanga ati, “Mwene, nataila!” Alino afukamila Yesu.

³⁹ Yesu avwanga ati, “Nizile mu nsi ku kupingula milandu ya antu onsi, kuti yao asyalola yalole, na yao akalola nao yaye impafu.”

⁴⁰ Afaliseo yamwi yano ali nawe yuvwa vintu vii, nga yamuzya yati, “Uzye naswe kwene sweswe mpafu?”

⁴¹ Yesu ati, “Ndi mwali mwemwe mpafu, nga musi nu mulandu. Lelo pano mukuti mukulola, caleka mucili nu mulandu.”