Yoane 6 - Amazwi Yakwe Leza 2013

Yesu wimula antu kuluta pa mazimbi yasano

¹ Pacisila ca vintu vii, Yesu alambila ku mbalama yuze yakwe yemba wa Galile (nanti yemba uwaku Tibelyasi).

² Alino iumba likulu limulondela, pano lyaweni vilangililo vino wacisile pa kupozya yao ali alwale.

³ Lyene Yesu akwela pa mwamba, nga aikala pansi pali pamwi na alondezi yakwe.

⁴ Insita ya kuzevya Cimulo ca Ucilo yapalime.

⁵ Lino Yesu wasanzula manso, alola iumba likulu likwiza kunoli, nga auzya Filipo ati, “Uzye aukwi kuno tungakala mikate yakuti antu yaa yalye?”

⁶ Wene uzizye vii kuti amwezye, pano ala atamanya cino wali nu kucita.

⁷ Filipo nawe amwaasuka ati, “Nanti impiya madenali imyanda iili nazyo kwene zitangakala mikate yakuti antu yaa yonsi yalye!”

⁸ Na muze kwene uwamu alondezi, Andeleya, mwina wakwe Simoni Petulo, avwanga ati,

⁹ “Kuno kuli umulumendo wino akweti mikate isano, ino yapangwa kufuma ku ngano, nga ni nswi ziili. Lelo vii vitangakumana mu antu yaa aingi.”

¹⁰ Yesu ayanena ati, “Tekini antu pansi.” (Pali ni sote lingi.) Caleka antu yonsi iikala pansi. Pali manye antu aonsi mazimbi yasano.

¹¹ Yesu atoola mikate ataizya kuli Leza, nga aankanya antu yano atenzi penepo. Mu musango uli onga atoola inswi ataizya kuli Leza, nga aankanya antu suka vikumana mu antu yonsi kulingana na vino yalondanga.

¹² Lino antu yonsi yalya iikuta, anena alondezi yakwe ati, “Kolonganikini mvungwa zino zisile zitatangana.”

¹³ Alino nao yakolonganika, yazuzya mise ikumi na iili yakwe vyonsi vino vyasile.

¹⁴ Caleka lino antu yalola cilangililo cino Yesu wacita yavwanga yati, “Cumi wii ali kasema wino malembelo yakati ali nu kwiza!”

¹⁵ Lino Yesu wamanya vino yakulonda kumupatikizya kuya Mwene, afumapo aya ku mwamba kuko kuno wali wenga.

Yesu wapita pa manzi

¹⁶ Lino kakuku katola, alondezi yakwe yatentemukila kuli yemba,

¹⁷ yapatama mu wato kuti yalambe yemba yaye ku Kapenaumu. Lyene kusuka kufita ala Yesu atali aiize kunoyali.

¹⁸ Alino kuya cipunga cikulu na maimbi yakatuka.

¹⁹ Walanga alondezi yafiya wato ukuya mukasi kakwe yemba, manye kulingana na makilomita yatatu na citika, yalola Yesu akupalama ku wato, ala akupita pa manzi. Alino yuvwa intete.

²⁰ Lelo ayanena ati, “Anene! Mutoopa.”

²¹ Lyene alondezi yalonda kumupatika mu wato, nga zuwazuwa uwato ufika ku cituntu, kuno yayanga.

Antu yalonda Yesu

²² Pa wanda uwalondelela, iumba ilyali ku ufumondaka wakwe yemba, limanya vino papa pali sile uwato onga. Nupya lyamanyile vino Yesu atapatimemo nu kupita pamwi na alondezi yakwe. Lelo yene yapisile yamusya.

²³ Alino amato na yauze, yao afumile ku Tibelyasi, yasuka iiza. Pali pipi na pa ncende pano Mwene wataizye kuli Leza pa mukate nu kupeela iumba kuti lilye.

²⁴ Lino iumba lyalola ukuti Yesu na alondezi yakwe kwene yasipo, yapatama mu mato yaya ku Kapenaumu ku kulonda Yesu.

Yesu ali Cakulya Icikapela Umi

²⁵ Lino yamuzana ku mbalama yuze yakwe yemba, yamuzya yati, “Kasambilizya, uzye alilaci lino wizile kuno?”

²⁶ Yesu aasuka ati, “Cumi namunena nati musikundondela pamulandu wakuti mwaweni vilangililo, lelo pamulandu wakuti mwalile mikate mwikuta.

²⁷ Mutaombela cakulya cino cikalowa, lelo mwaombela cakulya cino cikaikalilila manda pe nupya cikapela umi wape. Cii cili cakulya cino Mwana wa Muntu alamupeela, pano Leza Tata wamupeela insambu yakucita vivyo.”

²⁸ Nao yamuzya yati, “Uzye lyene tulinzile kucita cani kuti tucite vino Leza akalonda?”

²⁹ Yesu nawe aasuka ati, “Cino Leza akulonda kuti mucite, ukutaila muli wino watuma.”

³⁰ Nao yamuzya yati, “Uzye cilangililo cii cino umacita kuti tulole nga tukutaile? Uzye icani cino umacita?

³¹ Mu lwanga vikolwe vitu vyalyanga mana, ndi vino calembwa mu malembelo, cati, ‘Wayapile cakulya kufuma kwiyulu kuti yalye.’”

³² Yesu ayanena ati, “Cumi namunena vino asi Mose uwamupile cakulya kufuma kwiyulu, lelo Tata aliwe akamupeela cakulya ca cumi kufuma kwiyulu.

³³ Pano cakulya cino Leza akapeela awiyo uwafuma kwiyulu, wino akapeela umi ku antu amu nsi onsi.”

³⁴ Alino yavwanga yati, “Mwene watupeela cakulya cico manda pe.”

³⁵ Yesu nawe avwanga ati, “Nene cakulya icikapela umi.” “Wino uwiza kunondi ataluvwa nzala, nga na wino uwataila ataluvwa lusala.

³⁶ Namunena vino ukundola kwene mwandola lelo mutantaila.

³⁷ Onsi yano Tata wampeela yaliza kunondi, na wino wensi uwiza kunondi ntalamuzinga.

³⁸ Pano nika kufuma kwiyulu asi kwiza cita kulonda kwane, lelo kulonda kwakwe wino uwantuma.

³⁹ Na kuu kuli kulonda kwakwe wino uwantuma, ukuti ntakaponzye nanti wenga pali yonsi yano wampela. Lelo ukuti nkaleke yonsi yakazyukuke yaye nu umi pa wanda wampelelekezyo.

⁴⁰ Pano kulonda kwakwe Tata kwakuti wensi uwalola Mwana nu kumutaila, wene alaya nu umi wape, nga nani ndaleka azyukuke pa wanda wampelelekezyo.”

⁴¹ Ayuda yang'wing'wintika pano wavwanga wati, “Nene cakulya cino cafuma kwiyulu.”

⁴² Yavwanga yati, “Uzye wii asi Yesu mwana wakwe Yosefu? Uzye lyene angavwanga uli ati, ‘Nafuma kwiyulu?’”

⁴³ Yesu ayanena ati, “Tini kung'wing'wintika pakasi kinu.

⁴⁴ Kusi umwi angiza kunondi, suka sile Tata wino uwantuma ndi wamuleta kunondi, nga nani ndaleka azyukuke aye nu umi pa wanda wampelelekezyo.

⁴⁵ Yakasema yalemvile yati, ‘Onsi yalasambiliziwa na Leza.’ Wino wensi akauvwa nu kusambilila kuli Tata wene akaiza kunondi.

⁴⁶ Nsyakuti umuntu ali wensi watala walola Tata, suka sile wino uwafuma kuli Leza, wene uwalola Tata.

⁴⁷ Cumi, namunena nati, wino uwataila munondi wene ali nu umi wape.

⁴⁸ Nene Cakulya icikapela umi.

⁴⁹ Nanti angala vikolwe vinu mu lwanga vyalyanga cakulya cino camwangwa ukuti mana, lelo vyene vyafwile.

⁵⁰ Lelo wino wensi uwalya cakulya cino ciiza pano pansi kufuma kwiyulu wene atalafwa.

⁵¹ Nene kwene indi cakulya icikapela umi cino ciiza pano pansi kufuma kwiyulu. Muntu ndi walya cakulya cii, wene alaya nu umi wape. Umwili wane uli cakulya ca umi uno nkapela ku antu yonsi amu nsi kuti yaye nu umi.”

⁵² Caleka Ayuda yapazyanya nu kuuzyanya aisikulu yati, “Uzye umuntu wii angatupeela mwili wakwe kuti tulye mu musango cii?”

⁵³ Yesu ayanena ati, “Cumi namunena vino ndi mutangalya mwili wa Mwana wa Muntu nu kumwa wazi wakwe, mutangaya nu umi.

⁵⁴ Wino wensi akulya mwili wane nu kumwa wazi wane wene ali nu umi wape, nga nani ndaleka azyukuke aye nu umi pa wanda wampelelekezyo.

⁵⁵ Pano umwili wane uli cakulya kwene ca cumi. Uwazi wane nao uli cakumwa kwene ca cumi.

⁵⁶ Wino wensi akulya umwili wane nu kumwa uwazi wane wene akaikala munondi, nga nani nkaikala munoli.

⁵⁷ Tata wino akapeela umi uwantuma, nga nani indi nu umi pamulandu wakwe. Mu musango uli onga kwene wino wensi akulya umwili wane alaya nu umi pamulandu wane.

⁵⁸ Cii cili cakulya cino ciiza pano pansi kufuma kwiyulu. Cisi wa cakulya cino vikolwe vinu vyalile, lelo pacisila vyene vifwa.”

⁵⁹ Yesu wavwanzile vintu vii ala akusambilizya mu ng'anda ya mapepo ku Kapenaumu.

Amazwi akapeela umi wape

⁶⁰ Lino alondezi yakwe aingi yuvwa vino Yesu wavwanga, nao yavwanga yati, “Amazwi yaa akome. Uzye aweni angayazumila?”

⁶¹ Lelo Yesu lino wamanya vino alondezi yakung'wing'wintika pa mazwi yaa, ayauzya ati, “Uzye cii camusakamika?

⁶² Uzye lyene cingaya uli ndi mwaweni Mwana wa Muntu akukwela kwiyulu, kuswilila kuno wafumile?

⁶³ Mupasi wakwe Leza aliwe akapeela umi. Amaka ya muntu yatangapeela umi. Amazwi yano namunena yene akapeela Mupasi wakwe Leza nu umi.

⁶⁴ Lelo nalyo kwene yamwi munomuli yasyakutaila.” (Kufuma ku utandiko wa kutumikila kwakwe, Yesu wamanyile yao atalamutaila nga na wiyo alamukoopa)

⁶⁵ Nupya Yesu ayanena ati, “Uu, uli mulandu kwene uno nali namunena vino kusi umwi angiza kunondi, suka sile Tata ndi waleka kuti alonde kwiza kunondi.”

⁶⁶ Kufuma lilyo kwene, alondezi yakwe Yesu aingi yamusya yata kumulondela.

⁶⁷ Alino Yesu auzya alondezi ikumi na yaili ati, “Uzye namwe kwene mukulonda kunsya?”

⁶⁸ Simoni Petulo amwaasuka ati, “Mwene, uzye aweni namuze wino tungayako? Mazwi yako yakapela umi wape.

⁶⁹ Naswe twataila nu kumanya vino wewe Wamuzilo nupya wafuma kuli Leza.”

⁷⁰ Yesu nawe avwanga ati, “Uzye ntamusolwile mwemwe ikumi na yaili? Lelo wenga uwa munomuli wene u Musomvi.”

⁷¹ Yesu pa kulanda vii, wasenulanga Yuda mwana wakwe Simoni Iskalyoti. Pano nanti angala Yuda wali a wenga uwamu alondezi ikumi na yaili, wene uwali nu kumukoopela ku anisi.