Yoane 5 - Amazwi Yakwe Leza 2013

¹ Pacisila cakwe cii, Yesu aya ku Yelusalemu ku cimulo ca Ayuda.

² Mu Yelusalemu, pipi ni mpongolo yamwangwa Mpongolo ya Mfwele, mwali ciziya cino mu cilimi ca Ciyuda camwangwa Betisaida, cino cazingulwikwe ni nkungu zisano.

³ Mu nkungu mwalalanga alwale aingi, ni mpafu, yakasinta, ni vilema vya misango na misango, nga ni vite. [Yene yalolelanga kuvundolwa kwa manzi,

⁴ Pano mu tusita tumwi tumwi mungeli wa Mwene wikilanga mu ciziya ku kuvundola manzi. Lyene umulwale wino wakolela kwingilamo lino manzi yavundolwa, wene apoziwa ku ndwala yonsi ino wali nayo.]

⁵ Lyene pakasi kao pali umuntu wino walwile pa myaka makumi yatatu na cinani.

⁶ Yesu nawe amulola alambalile papa, nupya wamanyile vino umuntu wii walwile pa nsita ntali. Caleka amunena ati, “Uzye ungatemwa kuti upole?”

⁷ Mulwale nawe aasuka ati, “Mwene, ntakweti umuntu wakunjingizya mu ciziya lino manzi yavundolwa. Lino nkwezya kwingilamo, muze ankolelela.”

⁸ Yesu nawe amunena ati, “Katuka nyemula citala cako nu kupita.”

⁹ Lyene lilyo kwene umuntu apoziwa, anyemula, citala cakwe, nga atandika nu kupita. Cii, cacitike pa wanda wi Sabata.

¹⁰ Caleka intunguluzi zya Ciyuda zimunena ziti, “Ilelo uwanda wi Sabata, nupya citaine na Masunde itu kuti wemo usende citala cako.”

¹¹ Lelo nawe ayanena ati, “Uwatampozya aliwe watanena kunyemula citala cane nu kutandika kupita.”

¹² Yamuuzya yati, “Uzye umuntu wiyo aweni, uwali wakunena kunyemula citala cako nu kupita?”

¹³ Lelo umuntu uwapoziwe wene atamanyile wino uwamupozizye, pano Yesu ongolwike kufuma mwi umba ilyali penepo.

¹⁴ Pacisila cakwe cii, Yesu amuzana mu Ng'anda ikulu yakwe Leza, nga amunena ati, “Lola, lyene watupoziwa. Caleka ute ukwifya pakuti cimwi cipisye kuluta cii citakakuponele.”

¹⁵ Lyene umuntu apita, aya anena intunguluzi zya Ciyuda vino Yesu uwamupozizye.

¹⁶ Caleka Ayuda yatandika kuzunya Yesu, pano wapozizye umulwale pa wanda wi Sabata.

¹⁷ Lelo Yesu nawe ayanena ati, “Tata lyonsi akacita vintu wakwe cii, acino nani kwene ndinzile kucita wakwe cii.”

¹⁸ Muvwango uu walenzile intunguluzi zya Ciyuda kupangila kumukoma, pasi pamulandu wa kuntayela isunde li Sabata sile, lelo na pamulandu wa kulanda ukuti Leza wene ali Isi wakwe nga nu kuilinganya na Leza.

Leza wapela maka ku mwana

¹⁹ Caleka Yesu nawe anena intunguluzi zya Ciyuda ati, “Cumi, namunena vino, Mwana atangacita cimwi pa lwakwe. Wene akacita sile cino walola Isi akucita. Vino Isi akacita, avino nu Mwana kwene akacita.

²⁰ Pano Tata wantemwa ne Mwana nu kundanga vyonsi vino wene akacita. Wene alandanga navyuze kwene ivya kucita nupya ivya kuzunguka vilusile pali cii, nga namwe mulazunguka cuze.

²¹ Pano vino Tata akatutulula afwe nu kuyapela umi, avino nu Mwana kwene akapeela wino akasi umi.

²² Pano Tata asyapingula umuntu ali wensi. Lelo wapela Mwana insambu yonsi yakupingula,

²³ pakuti yonsi yacindike Mwana vino yacindika Isi. Wino asyakucindika Mwana, ala asyakucindika ni Isi wino wamutumile.

²⁴ “Cumi namunena vino, wensi wino akuuvwa mazwi yane, nu kutaila wino uwantumile, wene akweti umi wape, wene atalapingulwa, lelo wene watafuma ku mfwa aya ku umi.

²⁵ Cumi namunena vino, kasita kakwiza, nupya kati kafika, lino afwe yaluvwa izwi lya Mwana wakwe Leza. Lyene yano aluvwa izwi lyakwe yalaya nu umi.

²⁶ Vino Tata ali ntulo ya umi, avino walenga nu Mwana kwene kuti aye intulo ya umi.

²⁷ Isi wamupeela insambu yakupingula milandu pano wene Mwana wa Muntu.

²⁸ Mutazunguka pali cii pano kasita kakwiza, kano antu yonsi ali mu malindi yaluvwa izwi lyakwe, nu kufumamo.

²⁹ Yano acitanga visuma yalazyukuka yaye nu umi. Na yano acitanga viipe yalazyukuka nu kuvunukwa.

Yakambone yakwe Yesu

³⁰ “Nemo ntangacita cimwi mu nsambu yane. Tata wanena vino ningapingula, nu upinguzi wane usi walufyengo pano nsyacita kulonda kwane, suka kulonda kwakwe Tata wino uwantuma.

³¹ “Ndi nkuicitila umboni ale umboni wane usi uwa cumi.

³² Lelo pali muze wino akapeela umboni pamulandu wane, nga namanya vino umboni uno akapeela uwa cumi.

³³ Mwemo mwatumile nkombe kuli Yoane, nga vino wavwanzile ivya cumi.

³⁴ Asi kuti nemo nkalonda umboni wa muntu, lelo nkulanda sile vii pakuti mungatuulwa.

³⁵ Yoane wakoline wa kuyengesa kwi lampi lino likwaka, nga namwe mutemwa kuzangila mu luswepo lwakwe pa nsita inono sile.

³⁶ Umboni uno nkweti ulusile umboni wakwe Yoane. Pano milimo ino Tata wampeela kuti malile iili milimo ino nkacita. Milimo kwene ii, ikapela nu umboni wakuti Tata uwantuma.

³⁷ Na Tata, wino uwantuma, nawe kwene akapeela umboni pali nene. Mwemo mutatala muvwa izwi lyakwe, nanti kumulola.

³⁸ Mazwi yakwe yasyaikala mu myenzo inu, pano mutataila Tata wino uwantuma.

³⁹ Mwemo mukalondelezya nu kusambilila mu malembelo, pano mukaelenganya vino mulazanamo umi wape. Malembelo kwene yaa yakapela umboni pamulandu wane.

⁴⁰ Lelo nalyo kwene mwemo mutakasi kwiza kunondi kuti muye nu umi wape.

⁴¹ “Nemo nsikulonda kulumbanyiwa na antu.

⁴² Lelo namanya vino mwaya. Namanya vino mu myenzo inu mutaya kutemwa Leza.

⁴³ Nemo nizila mwi zina lyakwe Tata, namwe musikunzengela. Muze ndi angiza mwi zina lyakwe na lwakwe, wene mulamuzengela.

⁴⁴ Uzye mungantaila uli, mwe muno mukacindikana mweisikulu, lelo mucinzi uno wafuma kuli Leza wenga, musyakuulonda?

⁴⁵ Mutaelenganya vino ndamulongwela kuli Tata. Apanoli wenga wino alamulongwela, a Mose kwene wino mwapaalilamo.

⁴⁶ Pano ndi mwataile Mose mucumi, nga mwataila nani kwene, pano walemvile ivya pali nene.

⁴⁷ Lelo ndi mutataila malembelo yakwe, uzye mungataila mazwi yane uli?”