Yoane 3 - Amazwi Yakwe Leza 2013

¹ Kwali umuntu uwamu Afaliseo, izina lyakwe a Nikodemo, intunguluzi ya Ciyuda.

² Wene waile kuli Yesu usiku, amunena ati, “Kasambilizya, twamanya vino wewe Kasambilizya wino wafuma kuli Leza. Pano pasi umuntu angacita vilangililo vino wemo ukacita, suka Leza ali nawe.”

³ Yesu nawe amunena ati, “Cumi, nakunena vino umuntu ndi atavilwe iila lyakwe ciili atangalola Uwene wakwe Leza.”

⁴ Nikodemo amuuzya ati, “Uzye umuntu wikolo angavyalwa uli? Uzye angaswilila liili mu ndilwa yakwe nyina, nga nupya avyalwe?”

⁵ Yesu aasuka ati, “Cumi, nakunena vino, umuntu ndi atavilwe ku manzi na kuli Mupasi Wamuzilo, wene atangingila mu Wene wakwe Leza.

⁶ Cino cavyalwa nu muntu umwili, lelo cino cavyalwa na Mupasi Wamuzilo, umupasi.

⁷ Utazunguka pano nakunena vino mwensi kwene mulinzile muvyalwe iila lyakwe ciili.

⁸ Umuza ukapungila kuno ukasi, nga nawe ukauvwa ciunda cauko, lelo utangamanya kuno ukufuma na kuno ukuya. Avino cikaya kuli wensi wino wavyalwa kuli Mupasi Wamuzilo.”

⁹ Nikodemo nawe amuuzya ati, “Uzye cii cingacitika uli?”

¹⁰ Yesu amunena ati, “Wewe kasambilizya mukalamba uwa ina Izlaeli, uzye utamanyile vintu vii?

¹¹ Cumi, nakunena vino swemo tukavwanga cino twamanya, nupya tukalanda cino twalola. Lelo kusi umwi uwa munomuli akataila umboni witu.

¹² Ndi namunena pamulandu ni vintu vino vikacitika muno nsi, musyataila. Uzye lyene mungataila uli, ndi namunena pamulandu ni vintu vino vikacitika mwiyulu?

¹³ Pasi umuntu watala wakwela kwiyulu, suka sile Mwana wa Muntu wino uwisile kufuma kwiyulu.”

¹⁴ Wakwe vino Mose wasamike inzoka ya mukuwa pa cimuti mu lwanga, avino nu Mwana wa Muntu ali nu kusamikwa pa cimuti

¹⁵ pakuti wensi wino wataila munoli aye nu umi wape.

¹⁶ Pano acino Leza watemilwe amu nsi nga apeela Mwana wakwe wino uwavilwe wenga, kuti wensi wino wataila munoli atakalowe, lelo aye nu umi wape.

¹⁷ Pano Leza atatumile Mwana wakwe muno nsi kuti aiize apingule amu nsi, lelo kuti atuule umi wao.

¹⁸ Wino wensi uwataila mu Mwana wene asyakupingulwa, lelo wino wensi asyataila mu Mwana wene wapingulwa mpiti, pano wene atataile Mwana wakwe Leza wino wavilwe wenga.

¹⁹ Luswepo lwiza mu nsi, lelo antu yakacita viipe. Acino yapingulwa pano yatemwisya mfinzi kuluta luswepo.

²⁰ Pano wensi wino akacita vicitwa vyankota wene wapata luswepo, nupya atangiza ku luswepo, pano asyalonda kuti vicitwa vyakwe vyankota visokololwe.

²¹ Lelo wino wensi akacita vya cumi, wene akaiza ku luswepo pakuti luswepo lungasokolola ukuti vino akacita vyene vikacitwa mu kuyela Leza.

Yesu na Yoane Kawatizya

²² Pacisila cakwe cii Yesu na alondezi yakwe yaya ku mpanga ya Yudeya, kuko kuno watenzi pa nsita imwi nu kuwatizya antu.

²³ Yoane nawe kwene wawatizyanga ku Enoni, pipi nu ku Salimu, pano ku ncende ilya kwali manzi avule. Na antu aingi yayanga kunoli ku kuwatiziwa nawe. (

²⁴ Cii, cali lino Yoane atali ayalilwe mu ng'anda yaminyololo.)

²⁵ Alondezi yakwe Yoane yamwi yatandika kupazyanya nu Muyuda umwi pamulandu wa lutambi lwa mifulalile.

²⁶ Caleka yaya kuli Yoane, yamunena yati, “Kasambilizya, Uzye ukwiusya umuntu wiya wino wali nawe lwaku ufumondaka wakwe Yodani? Ndakai nawe akuwatizya, na antu yonsi yakuya kunoli.”

²⁷ Yoane nawe aasuka ati, “Kusi cimwi wakwe cii cingacitikila umuntu, suka Leza ndi waleka kuti cicitike.

²⁸ Mweisikulu mwemwe yakambone yane pali vino navwanga nati, ‘Nemo nsi Katuula uwalavilwe, lelo natumilwe sile kuti mukolelele.’

²⁹ Nawinga uwakwe siwinga, lelo cuza wakwe siwinga wene akaimilila pipi, nu kuvwa kunoli, nupya akazanga cuze lino uvwa izwi lyakwe siwinga. Vii avino nkazanga cuze.

³⁰ Wene alinzile akule mu ucindami nu kunduta, lelo nemo namacepanga mu ucindami.”

Wino uwafuma kwiyulu wene waluta onsi

³¹ Wino uwafuma kwiyulu wene waluta onsi. Uwafuma mu nsi wene uwamu nsi, nupya akavwanga pali vino vikacitika mu nsi. Lelo wino uwafuma kwiyulu wene waluta onsi.

³² Wene akapeela umboni pali vino walola nu kuvwa, lelo pasi umwi akataila umboni wakwe.

³³ Lelo wino wensi akataila umboni wakwe, wene akasininkizya vino umboni wakwe Leza uwa cumi.

³⁴ Pano wino Leza watuma wene akavwanga mazwi yakwe Leza, na Leza akamupeela Mupasi Wamuzilo.

³⁵ Isi watemwa Mwana wakwe, nupya wamupeela maka pali vyonsi.

³⁶ Wino wensi akataila Mwana wene ali nu umi wape. Lelo wino wensi asyayela Mwana wene atalaya nu umi. Ukali wakwe Leza ulaya panoli.