Yoane 20 - Amazwi Yakwe Leza 2013

Yesu wazyukuka kufuma ku afwe

¹ Katondo tondo pa wanda wakutandika mulungu, lino kucili mfinzi, Maliya uwaku Magadala aya kwi lindi, nga alola vino iwe lyati lisisiwa pa mulyango wi lindi.

² Caleka asimula aya kuli Simoni Petulo nu mulondezi muze, nga ayanena ati, “Yati yafumya Mwene mwi lindi, nga tutamanyile kuno yati yamwika.”

³ Caleka Petulo nu mulondezi muze yafuma yaya kwi lindi.

⁴ Oili yasimula pamwi lelo mulondezi muze asimula kuluta Petulo nga aliwe aya uwankolelo kufika kwi lindi.

⁵ Alino ainama nu kusungamila mwi lindi, nga alola insalu zitiswe zyamutengo zituzi, lelo atingile mukasi.

⁶ Lyene Simoni Petulo wino wamulondelile cisila, aiiza aingila mwi lindi. Nawe kwene alola nsalu zitiswe zyamutengo zituzi,

⁷ nga ni citambala cino canyefilwe ku mutwe wakwe Yesu. Cene citali pamwi ni nsalu zitiswe zyamutengo, lelo cakonzine conga pa mbali.

⁸ Alino mulondezi muze, wino wali uwankolelo kufika pi lindi, nawe kwene aingilamo. Lino walola vii, ataila. (

⁹ Kufika na pa kasita kwene kaka ala yatali yataile vino malembelo yalanda ukuti alinzile azyukuke kufuma ku afwe.)

¹⁰ Lyene alondezi yaswilila kumwao.

Yesu waloleka kuli Maliya uwaku Magadala

¹¹ Lelo Maliya asyala aimi kunzi pipi ni lindi ala akulila. Walanga acili akulila, ainama asungamila mwi lindi,

¹² nga alola angeli yaili yazwite vizwalo vitiswe. Angeli yao yatenzi pano icala cakwe Yesu cali lino atali azyukuke, wenga ku mutwe nu muze ku ntambalilo.

¹³ Angeli yamuzya yati, “Kaciwe, uzye pacani ukulila?” Nawe aasuka ati, “Yati yafumya Mwene wane mwi lindi, nga ntamanyile kuno yati yamwika.”

¹⁴ Lino wavwanga vii aseleuka alola umuntu aimi penepo lelo wene atamanyile vino umuntu wilya a Yesu.

¹⁵ Alino Yesu amunena ati, “Kaciwe, uzye pacani ukulila? Uzye aweni wino ukulonda?” Maliya welenginye vino umuntu wii umulimi wa calo, caleka amunena ati, “Ndi cakuti wewe watumufumya, unene kuno watumwika nga nani namaya nkamutole.”

¹⁶ Yesu amunena ati, “Maliya!” Nawe Maliya aseleukila kunoli nga amuvwanzya mu Ciyebulai ati, “Laboni!” (Kuli kuti, “Kasambilizya.”)

¹⁷ Yesu amunena ati, “Utandemamo pano ntali nkwele inje kuli Tata. Lelo yanga ku inane ukayanene vino nkukwela inje kuli Tata, ali So, Leza wane nupya Leza winu.”

¹⁸ Caleka Maliya uwaku Magadala aya anena alondezi vino watalola Mwene nga ayalondolwela vyonsi vino wamutumilizye.

Yesu waloleka ku alondezi yakwe

¹⁹ Lyene manguzi pa wanda wakutandika mulungu, lino ilanzi lyatemba, alondezi yakongine pamwi. Milyango ya ng'anda nayo ala yatifiikilwa, pano yoopanga intunguluzi zya Ciyuda. Alino Yesu aiiza aimilila pakasi kao, ayanena ati, “Mutende uye namwe.”

²⁰ Walanga wavwanga vintu vii ayalanga makasa yakwe nga nu mu mbazo. Lyene alondezi yazanga cuze pano yalola Mwene.

²¹ Yesu nupya ayanena ati, “Mutende uye namwe. Ndi vino Tata wantumile avino nani namutuma.”

²² Lino wavwanga vii ayaputa mupu, ayanena ati, “Pokelelini Mupasi Wamuzilo.”

²³ Ndi mwelela antu maifyo yao, na Leza kwene alayelela. Ndi musyakwelela antu maifyo yao, na Leza kwene atalayelela.

Yesu na Tomasi

²⁴ Lelo Tomasi, wenga uwamu alondezi ikumi na yaili (akaamwa ukuti Didimo) atali pamwi nao lino Yesu wizile.

²⁵ Caleka alondezi yauze iiza yamunena yati, “Twati tulola Mwene.” Lelo wene ayanena ati, “Ntakutaila, suka ndi nalola viyazi ivyacisilwe ni nsunga mu makasa yakwe nga nu kwika umunwe wane pa viyazi vivyo, nga ni kasa lyane mu mbazo zyakwe.”

²⁶ Pacisila ca manda cinani, alondezi yakwe pali pamwi na Tomasi nupya yali mukasi ka ng'anda. Alino Yesu aiiza aimilila pakasi kao, ala ni milyango yatifiikilwa, nga ayanena ati, “Mutende uye namwe.”

²⁷ Lyene anena Tomasi ati, “Ndu simpe umunwe wako paa nu kulola makasa yane. Tambika ikasa lyako ulipisye mu mbazo zyane. Taa ukutwisika, nga utaile!”

²⁸ Tomasi amunena ati, “Mwene wane, Leza wane.”

²⁹ Yesu amunena ati, “Uzye wataila pano wandola? Alongo ayao akataila na lino yataweni.”

Cino lupapulo luu lwalembilwe

³⁰ Yesu wacisile vilangililo vingi pa manso ya alondezi yakwe, vino vitalembwa mu lupapulo luu.

³¹ Lelo vii vyalemvilwe kuti mutaile vino Yesu ali Katuula, Mwana wakwe Leza, nga nu mukutaila munoli muye nu umi wape.