Yoane 2 - Amazwi Yakwe Leza 2013

¹ Pacisila ca manda yaili, kwali uwinga ku Kana, muzi uwaku Galile. Nyina wakwe Yesu akuno wali,

² na Yesu pamwi na alondezi yakwe yaamilwe ku winga.

³ Lino waini wino antu yamwanga wasila, nyina wakwe Yesu amunena ati, “Waini wasila.”

⁴ Yesu amwaasuka ati, “Mayo, vivyo vitampazi. Kasita kane katali kafike.”

⁵ Alino nyina anena aomvi ati, “Vyonsi vino amamunena kucita, mucite.”

⁶ Ayuda yali ni ntambi zya mifulalile zya kuisangulula. Acino kwali kweneko yamuyeza mutanda a mawe akufulalilamo. Muyeza wenga wazulanga kulingana ni cipimo ca nsembo ziili nanti zitatu.

⁷ Yesu anena aomvi ati, “Zuzyini manzi muli yamuyeza yaa.” Nao yazuzya na papela.

⁸ Alino ayanena ati, “Tapinimo manzi yamwi mutwalile mukalamba wa winga.” Nao yatapamo yamutwalila,

⁹ lyene mukalamba wa winga afimpulamo manzi yano Yesu wasenwile yaya waini musuma cuze. Atamanyile na kuno waini wafumile, (Lelo aomvi yano atafile manzi yene yamanyile.) Caleka aama siwinga,

¹⁰ nga amunena ati, “Antu yonsi yakatandika kuleta waini musuma, nga pacisila lino antu yamwa cuze, yayaletela waini wino asi musuma. Lelo wemo watusunga waini musuma cuze kufika na ndakai!”

¹¹ Yesu wacisile cilangililo cii cakutandika mu Kana, muzi uwaku Galile. Muli cii amuno wasokolwile lulumbi lwakwe, nga na alondezi yakwe yataile munoli.

¹² Pacisila cakwe cii Yesu, nyina, aina nga na alondezi yakwe yaya ku Kapenaumu, iikalako manda yanono.

Yesu wazinga aculuzi mu Ng'anda ikulu yakwe Leza

¹³ Lino insita ya kuzevya Cimulo ca Ucilo ca Ayuda yapalama pipi, Yesu aya ku Yelusalemu.

¹⁴ Lyene aya mu Ng'anda ikulu yakwe Leza, azanamo aculuzi ala yakukazya ng'ombe, mfwele ni nkunda, na yamwi ala yatenzi yakukauzyanya impiya.

¹⁵ Lyene apanga swepu wa myando, nga azingila antu yonsi pamwi ni nyama zyao zyonsi panzi. Alino apenola vipango vyakwe yakakauzya ya mpiya, nga ni mpiya zyao zisansantika.

¹⁶ Anena yano akazyanga nkunda, ati, “Zifumini, mutacita ng'anda yakwe Tata wa ng'anda ya uculuzi.”

¹⁷ Alondezi yakwe iusya vino calembwa mu malembelo cati, “Kucincila kwane kwa pa ng'anda yako ukulandya.”

¹⁸ Lyene Ayuda yamunena yati, “Uzye cilangililo cii cino ungacita pakuti tumanye vino ukweti nsambu yakucita vii?”

¹⁹ Yesu nawe aasuka ati, “Omololini Ng'anda ii ikulu yakwe Leza, nani ndaikuula mu manda yatatu.”

²⁰ Ayuda yamunena yati, “Ng'anda ikulu yakwe Leza yakuzilwe pa myaka makumi yani na mutanda. Uzye wewe ungaikula mu manda yatatu?”

²¹ Lelo Ng'anda ikulu yakwe Leza ino Yesu walandangapo umwili wakwe.

²² Caleka lino wazyukwike kufuma ku afwe, alondezi yakwe iusya vino wavwanzile cii, nga yataila malembelo na mazwi yano Yesu wavwanzile.

Yesu wamanya antu onsi

²³ Lino Yesu acili mu Yelusalemu mu manda ya kuzevya Cimulo ca Ucilo, aingi yataila munoli lino yalola vilangililo vino wacitanga.

²⁴ Lelo atayataile pano wamanyile vino antu yaya.

²⁵ Nupya atalondanga kuti umwi amunene vino antu yaya, pano umwisikulu wamanya vyonsi ivyaya mu myenzo yao.