Yoane 19 - Amazwi Yakwe Leza 2013

¹ Lyene Pilato apeela ilamulo kuti yume Yesu vikoti.

² Alino asilika yaluka ingala ya myunga, yamuzwika ku mutwe. Lyene yamuzwika mwingila uyenzulukile.

³ Alino yamupalamila, yamunena yati, “Kwaita, Mwene wa Ayuda!” Lyene yamuma impi.

⁴ Nupya kwene afuma aya avwanga kwi umba ati, “Lolini namufumya kunomuli, kuti mumanye vino nemo ntamuzanyile nu mulandu.”

⁵ Caleka Yesu afuma, ala azwite ingala ya myunga nu mwingila uyenzulukile. Lyene Pilato ayanena ati, “Lolini! Umuntu auwi!”

⁶ Lino yasimapepo akalamba na yakalinda ya Ng'anda ikulu yakwe Leza yamulola, yasanzika mazwi yao yati, “Atanwe pa lupanda! Atanwe pa lupanda!” Pilato ayanena ati, “Mwemwe kwene musendini mukamutane, pano kwene nemo ntamuzanyile nu mulandu.”

⁷ Iumba nalyo lyasuka liti, “Swemo twakwata isunde litu lino likati alinzile ukufwa, pano wene akuilanda vino Mwana wakwe Leza.”

⁸ Lino Pilato uvwa vino yavwanga, auvwa intete cuze.

⁹ Alino aingila nupya mwi sano, nga auzya Yesu ati, “Uzye kuno wafuma aukwi?” Lelo Yesu ataaswike.

¹⁰ Alino Pilato amunena ati, “Uzye ukunziya uli? Iusya vino nemo nkweti insambu iya kukusapula nga ni nsambu iya kukutana pa lupanda.”

¹¹ Yesu amunena ati, “Utangaya ni nsambu panondi, suka ndi nsambu yapeelwa kunuli kufuma kuli Leza. Caleka wino uwatapela nene kunuli ali ni iifyo likulu kuluta.”

¹² Lyene lino Pilato uvwa cii, aezya kulonda inzila yakuti asapule Yesu. Lelo iumba lisanzika izwi liti, “Ndi umamusapula, ale usi cuza wakwe Kesa! Wino wensi akuitaka vino wene mwene ala akusangukila Kesa!”

¹³ Caleka lino Pilato uvwa mazwi yaa, afumya Yesu panzi aikala na pa cilimba cakwe kapingula wa milandu mu ncende ii yamwangwa ukuti, “Musolo wa mawe.” (Mu Ciyebulai incende ikaamwa ukuti, “Gabata.”)

¹⁴ Cali pa wanda wa kuteyanya kuzevya Cimulo ca Ucilo, manye lino ilanzi lyafika mutwe papela (12 koloko). Pilato anena antu ati, “Mwene winu auwi kuno!”

¹⁵ Caleka yasanzika mazwi yao yati, “Mukome! Mukome! Atanwe pa lupanda!” Pilato ayauzya ati, “Uzye mukulonda ntane mwene winu pa lupanda?” Yasimapepo akalamba yaasuka yati, “Tutakweti mwene muze suka Kesa!”

¹⁶ Lyene Pilato amupeela kunoyali kuti atanwe pa lupanda. Caleka asilika yasenda Yesu.

Yesu watanwa pa lupanda

¹⁷ Yesu nawe afuma mu musumba, ala asenzile lupanda lwakwe, aiiza ku cifulo camwangwa ukuti, “Pa cifulo ci Panga.” (Mu Ciyebulai cikaamwa ukuti, “Gologota.”)

¹⁸ Kuku akuno yamutana pa lupanda, nga yatana na antu yauze yaili, wenga kwi kasa lilunji nu muze kwi mani lyakwe, wene yamwika pakasi kao.

¹⁹ Pilato walemvile cimanyisyo nu kucipampamila pa lupanda. Palemvilwepo ukuti “Yesu uwaku Nazaleti, Mwene wa Ayuda.”

²⁰ Antu aingi yaciwelenzile, pano cifulo cino Yesu watanyilwepo citali kutali nu musumba wa Yelusalemu. Cimanyisyo cii calemvilwe mu Ciyebulai, mu Cilatini, nga nu mu Cigiliki.

²¹ Yasimapepo akalamba yanena Pilato yati, “Utalemba ukuti, ‘Mwene wa Ayuda.’ Lelo ulembe ukuti, ‘Umuntu wii wailandanga vino wene Mwene wa Ayuda.’”

²² Pilato nawe aasuka ati, “Cino nati ndemba, nati ndemba.”

²³ Lino asilika yatana Yesu pa lupanda yatoola vizwalo vyakwe yankanya pani, nga cila musilika atoola cino yamwankinye. Yatozile nu mwingila wakwe kwene, uno wapanzilwe kwaula mulundo.

²⁴ Asilika yavwanzyanya yati, “Lekini tutaulepula. Lekini tupendole kuti tulole wino amautola.” Cii cacitike kuti cifikiliziwe cino calembwa mu malembelo cikati, “Yankine nsalu zyane aisikulu nga na pa mwingila wane yacita usilizi.” Vii avino asilika yacisile.

²⁵ Pipi nu lupanda lwakwe Yesu paimi nyina wakwe Yesu, na kaci muze mwina wakwe nyina, na Maliya muka Keleopa, nga na Maliya uwaku Magadala.

²⁶ Lino Yesu walola nyina, nu mulondezi wino watemilwe cuze, ala yaimi pipi, anena nyina ati, “Mayo, wii umwana wako.”

²⁷ Alino anena nu mulondezi wakwe ati, “Mwana, wii a nyoko.” Kufuma pa kasita kwene kako mulondezi amutola kuti aikala nawe ukwakwe.

Imfwa yakwe Yesu

²⁸ Alino pa nsita ilya Yesu wamanyile vino vyonsi vyati visila, nga pakuti cifikiliziwe cino calembwa mu malembelo, avwanga ati, “Nuvwa lusala.”

²⁹ Ulweso lwali penepo, ulwazilemo waini musasalume. Caleka yaombeka umwepu muli waini, nga yautunga ku kamuti kakwe isopu nga yamutambikila pa mulomo.

³⁰ Lelo lino Yesu wafyompako, avwanga ati, “Casila!” Alino ainama nga afwa.

Yesu yamutota ni sumo mu mbazo

³¹ Wali uwanda wakuteyanya Sabata. Na Sabata walondelile wali uwamuzilo kuluta. Na Ayuda yatalondanga antu kusyala pa lupanda pa wanda wi Sabata. Acino yuzya Pilato kuti yavune maulu yakwe yao atanyilwe, nga yaisye.

³² Caleka asilika yaya yavuna maulu yakwe wiyo wakutandika nga namuze kwene, yao atanyilwe pamwi na Yesu.

³³ Lelo lino yafika pali Yesu, yalola vino watafwa mpiti. Caleka yatamuvunyile maulu.

³⁴ Lelo wenga uwamu asilika amutota ni sumo mu mbazo, nga lilyo kwene mufuma wazi na manzi. (

³⁵ Wiyo uwaweni kuno vintu vii vikucitika, watapela umboni, kuti namwe kwene mutaile. Umboni wakwe uwa cumi, nupya wamanya vino akavwanga icumi.)

³⁶ Cii cacitike kuti cifikiliziwe cino calembwa mu malembelo cikati, “Kusi ifupa lyakwe nanti lyonga ililavunwa.”

³⁷ Nacuze calembwa mu malembelo cikati, “Antu yalalola wino uwatosilwe ni sumo mu mbazo.”

Kuzikwa kwakwe Yesu

³⁸ Pacisila ca vintu vii, Yosefu uwaku Alimatiya aya alenga Pilato kuti amuzumilizye kusenda icala cakwe Yesu. (Yosefu wali mulondezi wakwe Yesu mu umfisolo, pano oopanga intunguluzi zya Ciyuda.)

³⁹ Nikodemo, wino nkolelo waile kuli Yesu usiku, nawe waileko pamwi na Yosefu. Ala asenzile vya mununko usuma, mulembo mule uminkane na aloe, kulingana na yalita ikumi.

⁴⁰ Antu ya oili yatoola icala cakwe Yesu, yacipomba mu nsalu itiswe yamutengo kumwi ni vya mununko usuma, kulingana nu lutambi lwa Ciyuda lwa kuteyanya kuzika icala.

⁴¹ Kuno Yesu watanyilwe kwali calo, nga nu mukasi kaciko mwali lindi muno mutatazile mwikwemo icala.

⁴² Pamulandu wakuti wali uwanda wakuteyanya uwa Ayuda, nga na pano ilindi lyali pipi, antu yaa oili iika cala cakwe Yesu mwenemo.