Yoane 14 - Amazwi Yakwe Leza 2013

Yesu ali nzila ya kuli Tata

¹ Yesu anena alondezi yakwe ati, “Mutaleka myenzo inu yaaziwa. Tailini Leza, mutaile nani kwene.

² Mu ng'anda yakwe Tata muli miputule iingi, nga nani nkuya kukumuteyanyizizya ncende. Ndi cisi vivyo, nga namunena.

³ Lyene ndi napita kukumuteyanyizizya ncende, ndawela kwiza mutola kuti kunondi akuno namwe mukaye.

⁴ Mwemo kuno nkuya mumanyile nzila.”

⁵ Tomasi amunena ati, “Mwene, tutamanyile kuno ukuya, nga tungamanya uli nzila yakuya kuko?”

⁶ Yesu amwaasuka ati, “Nene ndi nzila, ni cumi, nu umi. Pasi umwi angiza kuli Tata suka wizila muli nene.

⁷ Ndi mwamanyile nene, nga mwamanya na Tata kwene. Kufuma ndakai mwati mumumanya nu kumulola.”

⁸ Filipo amunena ati, “Mwene, tulange So pano cico kwene sile acino tukulonda.”

⁹ Yesu amunena ati, “Nati nikala namwe nsita ntali, lelo Filipo wemo utamanyile nene? Wino wandola, walola na Tata kwene. Uzye pacani ukuti, ‘Tulange So?’

¹⁰ Filipo, uzye utataile vino Tata nani twaya wenga? Mazwi yano nkamunena, insiivwangila! Lelo Tata, wino akaikala munondi, akacita milimo yakwe.

¹¹ Untaile lino nalanda vino Tata nani twaya wenga. Nanti untaile pa milimo ino nkacita.

¹² Cumi namunena nati, wino akuntaila wene alacita vicitwa vino nkacita, nga ni vikulu kuluta, pano nkuya kuli Tata.

¹³ Na consi cino mulalenga mwi zina lyane, acino ndacita, kuti Tata alumbanyiwe mu Mwana.

¹⁴ Ndi mwandenga cimwi mwi zina lyane, ndacita.

Yesu walaya kupeela Mupasi Wamuzilo

¹⁵ “Ndi mwantemwa mwayela masunde yane.

¹⁶ Nani ndapepa kuli Tata, nawe alamupeela kaazwa muze, kuti aikale namwe manda pe.

¹⁷ Wene a Mupasi wa cumi, wino akasokolola cumi ca pali Leza. Antu atemwa sile vya nsi yatangamuzengela, pano yatangamulola nanti kumumanya. Lelo mwemo mwamumanya pano akaikala namwe, nupya amaikalanga munomuli.

¹⁸ “Ntalamusya mwenga wa ana asyale, lelo ndawela kunomuli.

¹⁹ Pa kasita kanono antu amu nsi yatalandola, lelo mwemo mulandola. Ndi vino nemo ndi nu umi, namwe kwene mulaya nu umi.

²⁰ Mu wanda ulya, mulamanya vino nemo na Tata twaya wenga, nga namwe kwene pamwi nani twaya wenga.

²¹ “Wino wensi akapokelela masunde yane nu kuyayela, ala wene uwantemwa. Na wino wensi uwantemwa, wene alatemwikwa na Tata. Nani kwene ndamutemwa nu kuisokolola kunoli.”

²² Yuda (asi Yuda Iskalyoti) amuuzya ati, “Mwene, uzye cingaya uli kuti wemo uisokolole kuli sweswe, lelo ku antu amu nsi foo?”

²³ Yesu amwaasuka ati, “Wino wensi uwantemwa, wene akayela mazwi yane. Wene alatemwikwa na Tata, nga Tata nani tuliza kunoli nu kwikala nawe.”

²⁴ Wino wensi atantemwa wene asyayela mazwi yane. Na mazwi yano muvwa yene yatafuma kunondi, lelo yafuma kuli Tata, wino uwantuma.

²⁵ “Vintu vii namunena lino ncili namwe.

²⁶ Lelo kaazwa, Mupasi Wamuzilo, wino Tata alatuma mwi zina lyane, wene alamusambilizya vintu vyonsi nu kumwiusya vyonsi vino namunena.

²⁷ “Namusila mutende, mutende wane auno namupeela. Ntamupile mutende ndi vino amu nsi yakapela. Mutaleka myenzo inu yaaziwa, nanti kuvwa intete.

²⁸ Mwali muvwa vino nali nati, ‘Nkupita, lelo ndawela kunomuli.’ Ndi mwantemwa, mungazanga pa kuvwa vino nkuya kuli Tata. Pano Tata andusile.

²⁹ Ndakai namunena cii lino citali cicitike, kuti alala cacitika, mukataile.

³⁰ Ndakai ntangalanda namwe pa nsita ntali pano kateeka wa nsi ii akwiza. Wene asi na maka munondi.

³¹ Lelo antu amu nsi yalinzile yamanye vino natemwa Tata. Uli mulandu uno nkacita vyonsi vino wampeela ilamulo kuti ncite. “Katukini, tuini tufume pa ncende ii.”