Yoane 10 - Amazwi Yakwe Leza 2013

Mulumbe wa citata ca mfwele

¹ Yesu avwanga ati, “Cumi namunena vino umuntu asyaingilila pa mulyango wa citata ca mfwele, lelo akakwela nu kwingilila pauze, wene umwivi nupya cipondo.

² Lelo umuntu akaingilila pa mulyango, wene mucemi wa mfwele.

³ Awino na kalolela wa mulyango akayulila. Ni mfwele zyakwe zikauvwa izwi lyakwe lino akuzyama mazina nga nu kuzitungulula kunzi.

⁴ Lino wafumya mfwele zyakwe zyonsi, azikolelela, nga nazyo zimulondela pano zyamanya izwi lyakwe.

⁵ Mfwele zisyalondela umuntu muze. Zyene zikautuka umuntu muze pano zitamanya izwi lyakwe.”

⁶ Yesu wayanenyile mulumbe uu lelo yatilwike vino ukusenula.

Yesu ali mucemi musuma

⁷ Nupya Yesu ati, “Cumi namunena vino nemo nene mulyango wakwingililapo mfwele.

⁸ Yauze ankolelile yene aivi nupya vipondo, nga ni mfwele zitayuvwile.

⁹ Nene mulyango! Wino wensi uwingila pali nene, alatuulwa. Wene alingila, alafuma nu kuzana vyakulya.

¹⁰ Mwivi akaizila sile kwiya, kukoma, nu konona. Nemo nizile kuti muye nu umi, umusi ukuulilwa.

¹¹ “Nene mucemi musuma. Mucemi musuma akapeela umi wakwe pamulandu wa mfwele.

¹² Lelo wino walembwa sile incito, asi mucemi, nga ni mfwele zisi zyakwakwe, lino walola mumbulu ukwiza, amasya mfwele autuke. Nu mumbulu wize uleme yonga nga ni zyuze zipasike.

¹³ Wino uwalembwa sile incito wene akautuka pano wene walembwa sile incito nupya asyasakamala mfwele.

¹⁴ Nene mucemi musuma. Namanya mfwele zyane nga nazyo zyamanya.

¹⁵ Ndi vino Tata wamanya, nani namanya Tata, nga naipela kufwila mfwele.

¹⁶ Nkweti mfwele nazyuze zino zisi zyamu citata cii. Nazyo kwene namala nde nzilete. Ziluvwa izwi lyane nga zilaya ufyo onga nu mucemi wenga.

¹⁷ “Acino Tata wantemelwa, pano naipela ukufwa kwaula kupatikiziwa, kuti ince nje umumi nupya.

¹⁸ Pasi umwi angankoma suka naleka kuti acite cico. Nene indi ni nsambu yakuleka kuti nkomwe nga nupya ningakatuka nje umumi. Ilamulo lii nafumya kuli Tata.”

¹⁹ Antu nupya yapalukana pa mazwi yaa.

²⁰ Na aingi munoyali yavwanga yati, “Ali nu mupasi wa nkota! Wene wapena! Uzye pacani mukumuvwa?”

²¹ Lelo yauze nao yavwanga yati, “Umuntu wino ali nu mupasi wankota atangavwanga mu musango uu! Uzye mupasi wankota ungalenga uli impafu kulola?”

Ayuda yakana Yesu

²² Mu Yelusalemu mwali Cimulo ca kuzevya kwa kupeela Ng'anda ikulu yakwe Leza kunoli. Yali nsita ya mpepo.

²³ Yesu wapitananga mu Ng'anda ikulu yakwe Leza, mu lukungu lwakwe Solomoni.

²⁴ Caleka Ayuda yamuunganila nga yamuzya yati, “Uzye umatusya muli sisi manda yanga? Ndi wewe uli Katuula uwalavilwe tunene paswe.”

²⁵ Yesu aasuka ati, “Nati munena, lelo mutataile vicitwa vino nkacita mwi zina lyakwe Tata. Vyene vikapeela umboni pali nene.

²⁶ Lelo mwemo mutantaila pano musi amu ufyo wa mfwele zyane.

²⁷ Mfwele zyane zikauvwa izwi lyane. Nazimanya nga nazyo zikandondela.

²⁸ Nemo nazipela umi wapee nga nazyo zitalalowa. Pasi umuntu alazisompola mwi kasa lyane.

²⁹ Tata wino wazimpela waluta onsi. Acino pasi umuntu nanti umwi angazisompola mwi kasa lyakwe Tata.

³⁰ Nemo na Tata twaya wenga.”

³¹ Nupya kwene Ayuda yatoola mawe kuti yamutame.

³² Yesu ayanena ati, “Nati ncita vicitwa vingi visuma vino Tata wampile kuti ncite. Uzye apa vicitwa vii pano mukulonda kuntama na mawe?”

³³ Ayuda yaasuka yati, “Pasi apa vicitwa visuma pano tukulonda tukutame na mawe, lelo apa mazwi yako a misuli kuli Leza! Wewe muntu sile nga ukwezya ukuicita kwati wewe Leza.”

³⁴ Yesu avwanga ati, “Uzye citalembwa mu Masunde inu vino Leza wati, ‘Mwemwe tuleza.’

³⁵ Twamanya ukuti vino malembelo yalanda vyene ivya cumi manda pe. Antu yaya yamilwe na Leza ukuti a tuleza, antu yano Ilandwe lyakwe Leza lyapilwe kunoyali.

³⁶ Nemo Tata wansolola nu kuntuma mu nsi. Uzye lyene mungati uli nkuvwanga mazwi ya misuli kuli Leza, pano inavwanga vino nene Mwana wakwe Leza?

³⁷ Ndi nsyakucita vintu vino Tata akasi kuti nacita, lyene mutantaila.

³⁸ Lelo ndi nkuvicita, nanti mutantaile, mulinzile kutaila nanti vicitwa vyane, kuti mumanyile limwi vino Tata nani twaya wenga.”

³⁹ Nupya kwene yalonda kulema Yesu, lelo aongoloka pano yali.

⁴⁰ Yesu apita nupya ku mbalama yuze ya luzi lwa Yodani, ku cifulo cino Yoane watandikile kuwatizya, akuno aya aikala.

⁴¹ Antu aingi iiza kunoli yamunena yati, “Yoane atacisile cilangililo. Lelo vintu vyonsi vino Yoane wavwanzile pamulandu nu muntu wii vyali vya cumi.”

⁴² Antu aingi kuku yamutaila.