Yelemiya 9 - Amazwi Yakwe Leza 2013

¹ Cange cizipe umutwe wane iwuya cifula ca manzi, na manso yane yaye akafukoka ka minsozi, apakuti antu yane yano yakomola, injalosye usiku nu musanya.

² Lelo kwene ningatemwisya ukuzanako incende imwi umu lwanga, ukwakuti ningaya apakuti mfuntuke ku antu yane, Pano yonsi sile yatalama, nupya yene iuvi lyakwe yacisanguka.

³ Lyonsi sile yene yatemwa ukusomba vyaufi. Yene intumpu azino zyateeka insi. Yawe wavwanga wati, “Antu yane yakomela sile ukucita ivintu viipe, nupya yakana nu kumanya.

⁴ “Umuntu wensi alinzile wasopa cuza wakwe, nga kusi nu wakutaila umwina. Pano cila mwina umucenjezi ku muze ndi vino Yakobo wali. Nga cila wenga akaamba umuze.

⁵ Yonsi yakatumpwilana sile na auze. Kutaya nanti wenga akalanda vyampomvu, lelo yaelezya sile kulanda vyantumpu. Yene yaipisya cakuti cayaposya nu kuzenzuka.

⁶ Yene yakomela sile ukucita vyaukakasi ni vyaucenjezi. Yene yaposiwa kumwi nu kumanya ne Yawe Leza wao.

⁷ Caleka pamulandu wakwe cico Yawe Wamaka yonsi wavwanga wati, Namaengulula antu yane wa mukuwa nga lyene njezye nu kuyezya. Antu yane yacita iviipe. Uzye lyene icani cuze cino ningayacitila?

⁸ Indimi zyao zyakolana wa nceto izyaulembe, pasi pakulanda ivya ucenjezi. Apakulanda ku ance yakalanda wakwe yacuza, lelo mukasi ka myenzo yao ala yatiyateyanya vyakuyafutukila.

⁹ Uzye kwene nemo ntalayavunuka apa vintu vivyo viipe? Uzye kwene umutundu wa musango ndi uo ntange ndandule? Ne Yawe natindanda.”

¹⁰ Alino ne Yelemiya mvwanga inti, “Awe cumi nemo kanaloosya imyamba. Kanalilila umulemvwe umwakucemelamo iviteekwa, pano mu myamba mwatimuma, nu mulemvwe nao watiuma. Musi umuntu nanti wenga akupita mwenemo. Umutinti wa viteekwa usikuuvwika, ivyunyi pamwi ni nyama zya mpanga vyativyutuka.”

¹¹ Yawe nawe avwanga ati, “Umusumba wa Yelusalemu namausangula amatongwa. Umaya uwikalo wakwe yankusa. Imisumba yamu Yuda ilaya wa lwanga, incende umusiikala umuntu nanti wenga.”

¹² Alino lyene nuzya inti, “We Yawe uzye pacani cino impanga yononekela vii nu kuumalala wa lwanga, cakuti mwakana ukusyala nanti umuntu uwakupita mwenemo? Uzye aweni angakwata amano akumanya icintu cii muno calola? Uzye akuli weni kuno walondolola icintu cico pakuti nawe anganena auze?”

¹³ Yawe nawe angasuka ati, “Icaticilenga kuti cii cicitike umulandu wakuti antu yane yatiyasuula amasunde yane yano nayapeela. Yene yasinjeela awe, nupya yasicita na vino nayanenyile ukucita.

¹⁴ Nemo yantalamila nupya yakupepa na tuleza utuluwi twakwe Baali, ndi muno ivikolwe vyao vyayasambilizye ukucita.

¹⁵ Acino wemo unguvwe, uvwe vino namacita ne Yawe Wamaka yonsi, Leza wa ina Izlaeli. Namaliisya antu yane ivilule, namayamwesya na manzi umuli sumu.

¹⁶ Namayasalanganyizizya umu antu amu mitundu yuze ino alio nanti ivikolwe vyao vitatazile vyuvwe. Ndayatumila ivita vya anisi yao mpaka viyalovye.”

Antu amu Yelusalemu yalila tutulwe

¹⁷ Yawe Wamaka yonsi wavwanga wati, “Elenganyini pa vintu ivikucitika! Amini yamangu akulosya kuti yize. Tumini akuya aama yamangu amanyikisya ukwimbila inyimbo zya ndosya.”

¹⁸ Antu nayo ali pakuvwanga yati, “Lekini yize zuwa yatwimbile ulwimbo lwa ndosya, mpaka ivipa vitu vizuule aminsozi, ni nkopyo zitu zitipate na minsozi apa kulosya.”

¹⁹ Uvwini impooma zya antu mu Zioni, zikuti, “Owe mwe, lyene casila twalowa! Owe mwe, vino twazewana! Tulinzile twasya impanga itu. Pamulandu wakuti amang'anda itu yatiyaongololwa.”

²⁰ Alino nani imvwanga inti, “Mwe yamangu ala siuvwini vino Yawe wavwanga. Sumbini amano ku mazwi yakwe. Sundini ana inu yakaci umusango wakulosezyamo. Musunde na yacuza inu kwene vya kwimbila inyimbo zya ndosya.

²¹ Imfwa yatitwingilila umu mawindo itu yatiingila nu mu mang'anda itu acindame. Yatikoma ana anono umu miseo na ance mu masokoni.

²² Ivyala vya antu vimaya sile monsi ntangali ntangali, wa mitumba yakwe citindi mu vyalo, wa ngano zino yakasinza yatiyasinza nu kuzisya insansalila. Vii avino Yawe watanena ukulanda.”

²³ Yawe wavwanga wati, “Uwamano atayuvwa pa mano yakwe, nanti uwamaka atayuvwa pa maka yakwe, umukama nawe atayuvwa pa vyuma vyakwe.

²⁴ Ndi umwi akasi kuyuvwa, alinzile wayuvwa apakumanya nene nu kwiluka vino naya, pamulandu wakuti nene indi Yawe wino akacita uluse. Nupya nkacita vyaulungami ni vyaololoke umu nsi, pano vii vili vintu vino vikanzanzya. Ivyalanda ne Yawe.”

²⁵ Yawe nupya avwanga ati, “Insita imwi iliiza lino nemo ndavunuka antu yonsi, yano yasilamulwa sile uku mwili. Antu yaa yonsi yasilamulwa, lelo ukwaula kusunga upangano uno cimililanga.

²⁶ Antu yayo ali ina Eguputo, na ina Yuda, na ina Edomu, na ina Amoni, na ina Moabu nga na yonsi aikala mu lwanga, yano yakapela inkuuzu lwa pa mausyu yao. Kusi nanti wenga pa antu yaa nanti umwina Izlaeli kwene wino wasunga upangano wane.”