Yelemiya 8 - Amazwi Yakwe Leza 2013

¹ Yawe wavwanga wati, “Umu manda yaya amafupa yakwe yamwene aku Yuda, na mafupa ya ntunguluzi, na mafupa yakwe yakasema na aikazi amu Yelusalemu yalafumiziwa mu malindi yao.

² Mu cifulo cakuti yakonganikwe nu kuzikwa, amafupa yao yalaya wakwe citindi uwatatulumana pa musili. Yene yalaanikwa ku kasanya, ku mwezi nu ku ntanda, uku vintu kwene vivyo vino yatemilwe ukutumikila, vino yakalondela nu kuuzya kuno vili nga nu kuvipepa. Kutalaya uwakuyakolonganika nu kuyaziika. Yalikala pa musili wa muvundo.

³ Alino asyala yano yalapusuka ku luko kwene lulo ulwipe yalatemwa imfwa kuluta ukuya nu umi, ukuli konsi kuno ndayazingila. Vii ivyalanda Yawe Wamaka Yonsi.”

Uyi nu uvunuko

⁴ Yawe anena kuti nene antu yakwe inti, “Uzye lino umwi wapona atange akatuke nupya? Na wino waponga inzila, uzye atange aweluluke nupya?

⁵ Uzye pacani cino antu yaa yamfutatila? Yene yanyinyinda sile ku vyaufi ukwaula kuweluluka.

⁶ Ninkutikila awe cumi ntange nuvwe kuno yakulanda vyampomvu. Kusi nanti wenga wino watazenzuka ku uyi wakwe, wakuti avwange ati, ‘Uzye icani cino nacita?’ Yonsi pyu yali sile apumboke nu kulondela inzila zyao kwati i mfwalasi ino yalucocoma umu nkondo.

⁷ Nanti sile amazela mu lwelele yakamanya insita iyapimwa. Ivipeele, utumimbi ni ngoli, navyo kwene vikasunga insita izili nu kwiza. Lelo antu yane yaa yatamanya vino ne Yawe napingula.

⁸ Uzye mungalanda uli ukuti mwemwe yamano nupya mwakwata na masunde ya Mwene. Silolini vino amasunde yasenulwa na yakalemba incenjezi.

⁹ Antu inu aamano insonyi zilayalema. Yalazewana nu kulemwa mu lukose. Na yayo akasuula Yawe, ale lyene amano yao ivyani vino yakayatumbwila?

¹⁰ Icaleka indapeela aci yao kuli yauze, ni vyalo vyao kuli yakacimvya ya mpanga. Pano yonsi sile, anono na akalamba, ukutandikila kuli yakasema ukufika kuli yasimapepo yacita ucenjezi uwiipisye.

¹¹ Yene yakanyepela icilonda ca muntu wane umu kusakaizya, ala yakuti, ‘Ulongo, ulongo, nalino kusi ulongo.

¹² Insonyi zilinzile kuyalema apa vicitwa vyao iviipe, ivya lupato. Lelo camupamba yene yasyauvwa insonyi, awe. Icaleka fwandi yalapona pamwi na ali nu kupona. Lelo ndiza njavunuke, yalasumbwa pansi.’ ” Ivyalanda ne Yawe.

¹³ Yawe wavwanga wati, “Nalondesyanga ku kolonganika antu yane ndi vino umulimi akakoozya ivyakulya. Lelo yene yakoline wa mutingi usi na matingi, wa musamvu usi na masamvu. Na mafwa kwene yumila kumwi. Caleka natinzumilizya ainamasi kuti yapoke icalo.”

¹⁴ Antu yakwe Leza yuzya yati, “Uzye pacani cino twikala ukwaula kucita cimwi? Konganini, tulungame ku misumba ya malinga, akuno tukafwile. Pano Yawe Leza witu akulonda kutulovya nu kutumwesya amanzi yausungu, pamulandu wakuti twifya kunoli.

¹⁵ Twapaalilanga ulongo, lelo tutalola icisuma nanti cimwi. Twalolelanga ukupola, lelo kwiza sile intete izikalamba.

¹⁶ Ukufuteka kwa mfwalasi zya anisi yao kuuvwika ukufuma kuli Dani. Ni cilulumo cakwe yacipambasi ya mfwalasi yano yakulila catensya impanga yonsi. Anisi itu yiza ku konona impanga itu kumwi na vyonsi ivyaya mwenemo, ni misumba itu kumwi na ikazi ya mwenemo.”

¹⁷ Yawe nawe ati, “Lolini namamutumila inzoka, yacipili yano mutange mulesye ku wanga uli onsi. Yene yalamulumola nu kupola mutalapola, awe. Ivyalanda ne Yawe.”

Yelemiya uvwila antu yakwe ulanda

¹⁸ Iyee mwe, ala ulanda wane utangasila. Umwenzo wane pasi pakunyongoloka.

¹⁹ Si kutikini! Umu mpanga yonsi kwene, nkuuvwamo sile impooma zya antu yane yakuti, “Yawe asi mwenemo muno mu Zioni? Uzye Mwene wino wateeka muno mu Zioni, asi mwenemo vwile?” Yawe wino wayateeka nawe ali pakwasuka ati, “Uzye pacani cino mwaleka kuti insoke, pamulandu nu tuluwi twinu, na pamulandu wakwe tuleza twinu utwaciwelewele nupya utwa inamasi?”

²⁰ Antu nayo ali pakutaizya iyati, “Ala insita yakuzombwelapo ivyakulya yatipitingana, icisanya naco caticisila. Lelo swemo tutatala twapusuka, awe.”

²¹ Lyene nemo ne Yelemiya ala cikumbaya wakwe cimwi ku mwenzo pamulandu wakuti antu yane yaculisya. Nemo nkulosya, caticimputula nu musana.

²² Uzye mu mpanga ya Gileadi umulembo wasila? Uzye mutaya sing'anga nanti wenga sile? Uzye pacani fwandi cino antu yane yatapoziwa?