Yelemiya 52 - Amazwi Yakwe Leza 2013

Ukuwa kwakwe Yelusalemu

¹ Zedekiya wali ni myaka yakuvyalwa amakumi yaili na onga apa nsita ino watandike ukuteeka mu Yuda. Nga wateesile mu Yelusalemu imyaka ikumi na onga. Nyina wali a Hamutali, umwana wakwe Yelemiya. Wene wali uwaku Libina.

² Mwene Zedekiya waifizye kuli Yawe, ndi vino umwene Yeoyakimu wacisile.

³ Caleka Yawe wasokile antu amu Yelusalemu nu mu Yuda cakuti wayainzile kulolekela ku cinso cakwe.

⁴ Zedekiya wasangukile umwene Nebukadineza waku Babiloni, cakuti nawe Nebukadineza wizile ni vita vyakwe vyonsi ku kwiza lwisya umusumba wa Yelusalemu. Cali apa wanda walenga ikumi, mu mwezi walenga ikumi mu mwaka walenga ikumi uwa wene wakwe. Yizile yakuula insakwe zyao ukunzi ya musumba, yauzinguluka, yatulika imitumba yiivu iya kulwisizya anisi yao.

⁵ Yasile yazingulwike umusumba ukufika nu mu mwaka walenga ikumi na onga wa wene wakwe Zedekiya.

⁶ Alino pa wanda walenga fundimbali mu mwezi wakwe ciini, lino inzala yaponyile ala antu yatakweti cakulya.

⁷ Yatulula ilinga mu musumba. Apakulola vivyo umwene na antu yakwe yapuuka usiku, yafuma mu musumba apa mpongolo yapakasi ka malinga yaili, umupipi ni calo ca mwene. Lilyo ala antu amu Babiloni yatiyazinguluka umusumba, yalondela ni nzila yaku Alabya.

⁸ Lelo ivita vya ina Babiloni ivizinganya umwene Zedekiya mpaka ivizana Zedekiya mu manyika yakwe Yeliko. Ivita vyakwe navyo ivimutazyela visalangana nu kusalangana.

⁹ Zedekiya yamulema nu kumutwala ku mwene Nebukadineza, wino wali mu musumba wa Libula, mu ciputulwa ca Hamati. Nebukadineza nawe ali pakumupingwila umulandu.

¹⁰ Ku Libula Nebukadineza akoma ana aonsi yakwe Zedekiya apa manso yakwe Zedekiya. Alino akoma na ana yakwe yacilolo amu Yuda yonsi pyu.

¹¹ Lyene aleka yatonkola Zedekiya amanso nga yamunyepa mu minyololo ya mukuwa nu kumusenda ku Babiloni. Zedekiya watenzi mu ng'anda yaminyololo mpaka na pa wanda uno wafwile.

Ukutamolwa kwa Ng'anda ikulu yakwe Leza

¹² Apa wanda walenga ikumi wa mwezi walenga isano, uwa mwaka walenga fundimbali wa wene wakwe Nebukadineza, umwene waku Babiloni, Nebuzaladani umukalamba wakwe yakalinda ya mwene waku Babiloni wingile mu musumba wa Yelusalemu.

¹³ Wene aoca Ng'anda ikulu yakwe Yawe, isano lya mwene na mang'anda yonsi amu Yelusalemu.

¹⁴ Ni vita vyonsi vino vyali nu mukalamba wakwe yakalinda ya mwene waku Babiloni, vyaongolola amalinga yonsi yano yazingulwike Yelusalemu.

¹⁵ Alino Nebuzaladani, umukalamba wakwe yakalinda ya mwene waku Babiloni, asenda yano yasile mu musumba, pamwi na yano walanga yasangukila umwene waku Babiloni, na yafundi yano yasile mwenemo.

¹⁶ Lelo, Nebuzaladani umukalamba wakwe yakalinda ya mwene waku Babiloni, wasile alanda yamwi yamwi mwenemo akuti yasyale yakulima amatingi ni vyalo vimwi vimwi.

¹⁷ Aina Babiloni yatamola nu tuvuwa tumwi tumwi twa mukuwa utwali mu Ng'anda ikulu yakwe Leza, ni ntontoka zya mipeto izyali mu Ng'anda ikulu yakwe Leza ukwikapo ni tanki, yasenda umukuwa onsi ku Babiloni.

¹⁸ Yasenda ni vikopo vyakupalilapo itwi, yafosyolo, imipeni, imbale zyakukanyizizyako, ni vyakusungilamo ubani pamwi ni viya vyonsi vya mukuwa vino yaomvyanga pa kupepa.

¹⁹ Musika wa vita wilya atoola amabeseni, ivyakupembelapo umoto, imbale zyakusansila amanzi ni vyakutekapo inyali, ivifutikilo ni ngeso navyuze vyonsi ivyapangwa na zaabu na siluva.

²⁰ Alino lyene incesi ziili, icifula conga, yacipambasi yaili a mukuwa, aali pa nkolelo ya cifula, ni ntontoka ya mipeto, vino umwene Solomoni wapangile Ng'anda ikulu yakwe Yawe, kutali kupima ukunyoma kwa mukuwa kwa viya vyonsi vii.

²¹ Ulucesi longa, lwene lwatalimfile amamita cinani mu utali, ukuzinguluka nu mwando uno ungatalimpa ukufika uku mamita angapalama kuli yasano na citika.

²² Vyakweti umuzeka apakasi. Papela yakwe cila lucesi lwatikime amamilimita amakumi cinimbali na citika. Zyali nu mutwe wa mukuwa apapela, ni cimo camukuwa cali na mamita ukuluta pali yaili. Alino yaciyemvizye nu tupikolezye utwakolana ni viseekwa vya pomegeleneti. Nato kwene twali tupomelelwe nu mukuwa. Ulucesi lwakwe ciili, kumwi ni viseekwa vyaluko vya pomegeleneti, lwali icili cimwi.

²³ Kwali kweneko iviseekwa vya pomegeleneti amakumi fundimbali na mutanda, vino vyanyinyindanga. Na vyonsi pamwi ivyalolekanga ku manso vyali umwanda onga.

Antu amu Yuda yasendwa ku Babiloni

²⁴ Nga ukulunda penepo, Nebuzaladani umukalamba wakwe yakalinda ya mwene waku Babiloni wasenzile Selaya Simapepo Mukulu, Zefaniya uwalondelile penepo mu ukalamba muli usimapepo, alino nayauze yatatu yakalinda ya Ng'anda ikulu yakwe Yawe, wa anyepwe.

²⁵ Umu musumba mwene asendapo umuomvi uwali umukalamba wa vita, nga na antu yasano yampandamano ya mwene yano yazanyile mu musumba. Nga alino na kalemba uwaombelanga umukalamba wa vita, wino walembanga antu amu mpanga ilya ku ulwi ukwikapo na asambazi amakumi mutanda yano yazanyile mu musumba.

²⁶ Nebuzaladani, umukalamba wakwe yakalinda ya mwene waku Babiloni, wayasenda nu kuyatwala ku mwene waku Babiloni uku Libula.

²⁷ Nu mwene waku Babiloni ayakoma kuku kwene ku Libula umu mpanga ya Hamati. Avino Ayuda yasenzilwe ku mpanga yakutali ukufuma ku mpanga yakumwao.

²⁸ Antu yano Nebukadineza wasenzile ku uzya mu mwaka walenga cinimbali, wa wene wakwe yali amazimbi yatatu na makumi yaili na yatatu.

²⁹ Mu mwaka walenga ikumi na cinani, namo imyanda cinani na makumi yatatu na yaili ukufuma mu Yelusalemu.

³⁰ Alino mu mwaka walenga amakumi yaili na itatu namo imyanda cinimbali, amakumi yani na yasano ayano yasenzilwe na Nebuzaladani. Yonsi pamwi yali amazimbi yani ni myanda mutanda yano yasenzilwe.

³¹ Mu mwaka uno Evili Melodaki wali umwene waku Babiloni, yalanzile uluse ku mwene Yeoyakimu waku Yuda nu kumufumya mu ng'anda ya minyololo. Cii cacitike apa wanda walenga amakumi yaili na yasano, mu mwezi walenga ikumi na iili, mu mwaka walenga amakumi yatatu na cinimbali, pano yafumizizye Yeoyakimu mu ng'anda yaminyololo.

³² Nupya wamucitilanga luse nu kumupeela icilimba cacindime pa vilimba vyakwe yamwene yauze, yano yali nawe pamwi ku Babiloni.

³³ Yeoyakimu, ali pakuzula ilaya lyamu ng'anda yaminyololo, walyanga napi tebulo lya mwene amanda yonsi aumi wakwe.

³⁴ Umwene waku Babiloni nawe amupeela vino walondanga amanda yonsi aumi wakwe, apakwikala umutende mpaka nu kufwa kwakwe.