Yelemiya 51 - Amazwi Yakwe Leza 2013

Uputuzi nauze wa pali Babiloni

¹ Yawe wavwanga wati, “Lola, nemo nasya mvulumule umupasi wa mononyi, uwakulwisya Babiloni na antu aikala uku Babiloni.

² Namatuma ainamasi uku Babiloni ku kwelulula aikazi ya mwenemo, ndi vino umuza ukaelulula cungu mu malezi. Uwanda uo uwa ononesi ndi waca wafika, yalayazanza konsikonsi nu kusya impanga mwanku umwaula nanti cimwi.

³ Cisi cakwezya kuzumilizya ivita vya ina Babiloni visyukile penepo akasita aka kulasilapo inceto zyao nanti akakuti yazwalile penepo ivilwilo vyao vya nkondo. Apa alumendo yayo cisi cakwezya kupanya penepo nanti wenga! Mulovye ivita vyao vyonsi pyu!

⁴ Lekini yalukute pansi, yafwile nu mu mpanga yao kwene, umu Babiloni, umu miseo ya misumba yao kwene.

⁵ Pasi pano ne Yawe Wamaka yonsi, ne Leza wao, ntatazyela Izlaeli nanti Yuda, nanti angala yene yifya kunondi, ne Wamuzilo wilya wakwe Izlaeli.

⁶ Puukini mufume kuko ku Babiloni. Cila muntu apususye umi wakwe. Mutaleka mulowelele pamulandu wa uyi wakwe. Insita ya cilanduzi cakwe Yawe yakulinganya pali vino yacisile yatifika.

⁷ Babiloni wali wa cikombe cakwe zaabu umu minwe yakwe Yawe. Wene walenzile nu kuti insi yonsi imwe ikoleke, pano imitundu yonsi yamwanga waini wakwe nu kupena ipena.

⁸ Babiloni yalamwiukizya, nga nawe alapona nu kukontoka. Fwandi mulosyini mwe! Mulondelini umulembo wakupaka pa vilonda vyakwe, limwi angapola.

⁹ Alino ainamasi nayo ali pakwasuka yati, ‘Swemo twezya na maka itu yonsi ukupozya Babiloni, lelo twaposiwa. Acino lyene katumusye sile wenga, cila muntu kaswilile ku mpanga yakwe. Pasi pano upinguzi wakwe watiufika papela pela, watiukatuka ukufika nu mu makumbi.’ ”

¹⁰ Yawe lyene watalanga ulungami witu. Fwandi katwapita tukalande uku Zioni, ivicitwa vyakwe Yawe Leza witu.

¹¹ Nyolini inceto, muzwalile visyangu. Yawe watakatusya umwenzo wa mwene wa ina Medi, pano watapanga ukonona Babiloni. Ali cilanduzi cakwe Yawe, icilanduzi capa Ng'anda yakwe ikulu.

¹² Tumpulini imendela iyakuwisya amalinga yakwe Babiloni. Muvuzye yakalinda, mwike na yakasopa, mufise na akuteyamila. Pasi pano Yawe wapangila aina Babiloni, nupya wayacitila ndi muno wayalaile.

¹³ Wemuno wikala apa manzi nyanya, wemuno waitulikila ivyuma ivingi, ala impelelekezyo yako yatikufikila, casila waputukilwa.

¹⁴ Yawe Wamaka yonsi walaya umwisikulu ukuti alavuzya antu avule wakwe makanta mu Babiloni, lelo yalakuta impooma yaluzango apa kukulwisya.

Ulwimbo lwa kulumbanya Yawe

¹⁵ Yawe aliwe waumba insi uku maka yakwe. Aliwe kwene wasimpa impanga yonsi uku mano yakwe, nu kwanza amayulu ku kucenjela sile kwakwe.

¹⁶ Ndi cakuti wapangalansya, ikuya icilulumo ca manzi umwiyulu. Aliwe akafumya amakumbi ku mpela zyonsi zya nsi. Aliwe akalenga inkuwa zimyansya umu mvula nu kutuma umuza ukufuma umu nkoma zyakwe.

¹⁷ Icintu cico cikazungula antu yonsi nu kuyapezya amano. Musyanyi wensi wino akasula ivyela, insonyi zimulema pamulandu wakuti tuleza tuno akapanga utwaufi nupya tusi nu umi.

¹⁸ Twene utwaciwelewele nupya utwakusuula sile. Twene tuliza tononwe lino Yawe aliza atupezye.

¹⁹ Wiyo wino waya icuma cakwe Yakobo wene atakoline nato, awe. Pano wene ali kaumba wakwe vyonsi, ukwikapo nu mutundu wa Izlaeli, caupyanyi cakwe. Izina lyakwe a Yawe Wamaka yonsi.

Inondo yakwe Yawe

²⁰ Yawe wavwanga wati, “Babiloni awewe uli nondo yane, canzo cane cakulwilako inkondo. Naomvizye wewe kuti imvungole inko na mawene,

²¹ kuti nonone imfwalasi na akapitapo, kuti nonone amaceleta na yano yakwelangapo,

²² na kuti inkome aonsi na anaci, kuti inkome akote na ance kwene, kuti inkome alumendo na akazyana,

²³ kuti inkome yakacema na maufyo yao, kuti inkome alimi na yamasaye yao akulimila, kuti inkome alasi ni ntunguluzi kwene.”

Kuvunukwa kwakwe Babiloni

²⁴ Yawe wavwanga wati, “Mulailolela mwenga na manso inu kuno nkuvunuka aina Babiloni yonsi apa lufyengo luno yacitile Zioni.

²⁵ We Babiloni, wemo ukoline umwamba uno ukaonona insi yonsi, lelo ne Yawe, nene ndi mwanisi wako. Ndakulema nu kukukunkulusya ukufuma pa vimawe vivyo ivitali. Ndakusangula wa mwamba uno wapya ku moto.

²⁶ Ukufuma kunuli yatalatala yatole iwe lya kukuulila ing'anda yuze. Wemo ulaya wa lwanga, amanda pe.” Ivyalanda ne Yawe.

²⁷ “Imikini ulunga mu mpanga yonsi! Lizini intandala apakuti inko zyuvwe! Teyanyini antu amu nko ku kuyalwa inkondo na ina Babiloni! Amini ukufuma ku Alalati, uku Mini, nu ku Asyikenazi yamwene akuyamuwililila. Sontini musika uwakutungulula ulwi uo. Tumini kweneko imfwalasi zivule wa cikundi cakwe makanta.

²⁸ Teyanyini antu amu nko akuti yamulwisye. Amini umwene waku Medesi, na yamusika yakwe ukwikapo na alasi nga ni ntunguluzi, nga ni viya vya mpanga yonsi ivyaya mu mawene yao.

²⁹ Alino lyene impanga ilatenta nu kusunkana, pano lyene umwene alafikilizya amapange yakwe, yano wapangile Babiloni, akusangula impanga ya Babiloni ulwanga, umutange mwikale umuntu.

³⁰ Alino lyene ivita vyaku Babiloni vilata ukulwa, vilikala sile cele, umu maceleta yaviko. Amaka yaviko yalasila. Vilaya sile wa anaci. Amang'anda yakwe Babiloni yalatumuka umoto. Imikolongelo ya mpongolo zyakwe ilavunoka.

³¹ Inkombe ya lwilo yalondelela ulwilo inkombe yuze. Umutumwa nawe walondelela umutumwa muze, ku kuyanena umwene waku Babiloni ukuti yati yapokolola umusumba wakwe onsi.

³² Anisi yatiyapoka na malambwa yakwe, amalinga yakwe yatiyapya. Asilika nayo intete zyatiziyalema wakwe cimwi.”

³³ Yawe Wamaka yonsi, Leza wa ina Izlaeli, wavwanga wati, “Umwana mukazyana wakwe Babiloni akoline nu lwano lwa kupuulilapo ingano pa nsita ino yakupuula. Insita yakumuzombola yatipalamila ukwiza.”

³⁴ Nebukadineza umwene waku Babiloni waputozile Yelusalemu nu kumulya. Wene wamalizile umusumba kwati awiya wino akukombesya umu ntendo. Wataumila kwati a musato, nu kuzuzya indilwa yakwe. Watasumba ivyasyala

³⁵ Aina Zioni kayalukuti, “Ee, cumi aina Babiloni kayayafulule sile, pali vino yene yatucuzizye!” Antu amu Yelusalemu nayo kayale yalukuti, “Eya, aina Babiloni kayayafulule, pali vino yamucuzizye!”

Yawe alazwilizya aina Izlaeli

³⁶ Caleka Yawe anena antu amu Yelusalemu ati, “Umulandu winu, anene ndausumbako amano, nupya anene ndamulandwila kweneko. Nemo ndakamya intulo zya manzi umu Babiloni kumwi ni nguzi kwene.

³⁷ Alino lyene umusumba wa Babiloni ulasanguka itongwa umulaikala sile yankusa. Antu yalati yalolekesya, iciyaputula ni misana. Mutalikala umuntu nanti wenga na yano yalalola vino caya yalazunguka.

³⁸ Aina Babiloni yalang'anza wakwe cisama nu kuuza wa twana twakwe cisama.

³⁹ Uzye tumati manye yene yafunuka? Nemo fwandi kanjateyanyizizye cimulo. Ndaleka yakoleke, yace yasansamuke. Yene yalakasula utulo tuno yatalatala yazyuke.

⁴⁰ Ndayasenda wa mfwele, wakwe yasuuku, wakwe yasawe, nkayatwale nu ku kuyafyula.”

Ukusyama kwakwe Babiloni

⁴¹ Yawe wavwanga pali Babiloni ati, “Iye mwe Babiloni vino wapokwa, umusumba uno antu yonsi pano nsi yalumbilizya! Iye mwe lyene vino antu yonsi yakupukanya sile imitwe apakulola vino Babiloni ali!

⁴² Yemba watakatukila Babiloni na maimbi yakwe yano yatiyakatuka yakumutuwizya.

⁴³ Imisumba yamu Babiloni kusi angatemwa ukuilola. Yene ili sile wa lwanga umutaya amanzi, umutange mwikale umuntu, umutangapita nu mwana wa muntu.

⁴⁴ Nemo lyene namavunuka Beli, leza wa ina Babiloni. Namamupokolola ni vyuma vyakwe vya wivi. Antu ya mitundu yuze ale lyene casila yasikumupepanga, awe. Na malinga yakwe Babiloni yalaongoloka!

⁴⁵ Puukini mufume mwenemo mwe ina Izlaeli. Utukini mupususye umi winu ku ukali wane ukulu.

⁴⁶ Mutaleka imyenzo inu itovoke ku vyakuvwauvwa. Cila mwaka impwelo ipusanepusane ikusalanganyiziwa. Ukukakata kulateeka impanga. Kateeka wenga alalwisya kateeka muze.

⁴⁷ Lola, amanda yaliza yano ndavunuka utuluwi twa ina Babiloni ni mpanga yakwe insonyi zilailema. Na antu yakwe yano yalakomwa yalalala yonsi pyu umukasi kakwe.

⁴⁸ Alino lyene iyulu ni nsi na vyonsi ivyaya mwenemo vilazanga ni nsansa pakulola kuno Babiloni wawa. Pano lyene aononyi yalafuma ku katutu ku kumulwisya.

⁴⁹ Babiloni nawe alawa pamulandu wakwe yano yakomilwe umu Izlaeli, ndi vino wene wakomile antu aingi umu mpanga zyao.” Ivyalanda ne Yawe.

Imbila yakwe Leza ku ina Izlaeli

⁵⁰ Mwemuno mwapuswike ku lupanga lwakwe, fuminimo mutasyala mwenemo. Mwaiusya ne Yawe umu mpanga ya kutali nupya mwaiusya na Yelusalemu.

⁵¹ Mwalanda muti, “Twali ni nsonyi apakuvwa umuzewanya, ala pasi pa nsonyi pa mausyu itu pamulandu na enyi yano yingile mu ncende zyamuzilo zya Ng'anda ikulu yakwe Leza.

⁵² Lelo amanda yaliza lino Yawe alafulula utuluwi twa ina Babiloni, ni mpondo zilateeka mu mpanga yonsi.

⁵³ Babiloni nanti angakwela ukwiyulu, nu kukuula icele lyakwe litali uli, nemo ndamwisya pululu. Ndamutumila aononyi akumulwisya.” Ivyalanda ne Yawe.

Ukutwalilila ukonona Babiloni

⁵⁴ Yawe wavwanga wati, “Uvwini impooma zino zyafuma ku Babiloni, izikulosya pa lwa kononeka kwa mpanga.

⁵⁵ Inkonona Babiloni nu kumuzimya. Ivita vikukuwika kwati ukululuma kwa maimbi, nu kuzanza na mazwi yao acongo nayo yuvwika.

⁵⁶ Yiza ku konona Babiloni. Ivita vyakwe vyalemwa na malapwa yao yakontolwa. Nene indi Leza akakalipila uyi, nupya ndacitila Babiloni ndi muno akalondela, ukulingana ni sunde.

⁵⁷ Asambazi yakwe namayamwesya ivyakuti yakoleke, kumwi na alasi yakwe, yamusika yakwe ni vita vyakwe kwene. Yalapona mu tulo twa muyayaya, yatalatala yazyuke nupya. Ivyalanda ne Mwene wino izina lyakwe a Yawe. Izina lyane anene Yawe Wamaka yonsi.”

⁵⁸ Yawe Wamaka yonsi wavwanga wati, “Ilinga lyakwe Babiloni lyamutika, lilaongoloka mpaka na pansi. Ni mpongolo zyakwe izitumpuke zilapya nu moto. Acino fwandi umulimo wa maka ya mitundu, uwakuicuzya sile. Amaka ya mitundu yapelela sile mu cininkwa ca moto.”

Usemo wakwe Yelemiya watumwa ku Babiloni

⁵⁹ Lii, ali sunde lino Yelemiya wapile kuli Selaya, umwana wakwe Nelya, umwizikulu wakwe Maseya, wino Zedekiya umwene waku Yuda watumile ku Babiloni. Cico cali mu mwaka walenga iini wa wene wakwe. Selaya wali ali musika wa pa lwendo.

⁶⁰ Yelemiya walemvile umu lupapulo amasyamo yonsi yano yali nu kuponela Babiloni, na vyonsi vino vyali nu kufikila Babiloni.

⁶¹ Yelemiya ali pakunena Selaya ati, “Ndi cakuti wafika ku Babiloni, uce uteke umwenzo apakuyawelengela amazwi yonsi yano yalemvilwe muli kalata wii.

⁶² Alino uce ukonkomezye sana uti, ‘Yawe wavwanga ndi vino ali nu konona incende ii, mutalasyala nanti ca umi cimwi. Antu yonsi kumwi ni nyama kwene. Ilasyalilila wa lwanga amanda pe.’

⁶³ Alino ndi wamala ukuwelenga vyamu lupapulo luu, uce ulunyepelele ukwiwe, nu kulusimpila pakasi ka luzi Yufulate.

⁶⁴ Uvwange nu kuti, ‘Ali vino Babiloni alalowa. Atalatala nupya azyuke kwi syamo lino ndamuletela.’ ” Apa pelela amazwi yakwe Yelemiya.