Yelemiya 50 - Amazwi Yakwe Leza 2013

Umusumba wa Babiloni wapokwa

¹ Lii ilili zwi lyakwe Yawe, ilyalanzilwe pali Babiloni ni mpanga ya Babiloni, ku kanwa kakwe kasema Yelemiya.

² “Umini imbila mu mitundu, mwimike ni mendela. Pundini mutafisa umulandu, muvwange muti, ‘Yatiyapoka Babiloni, Beli watalemwa ni nsonyi, Maliduki watatamoka. Utuluwi twakwe twatituzewana. Ivyawinyi vyakwe vyati viongoloka.’

³ Pasi pano ku lusansa lwaku kayeya kwafuma umutundu wakumulwisya, casangula ni mpanga yakwe ulwangwa. Mutalatala nupya muce mwikale umuntu. Antu ni nyama vyativyutukamo, ivipita.”

Aina Izlaeli yalawela

⁴ Umu manda yaya na pa kasita kaka, aina Izlaeli yalawela. Yalafuma yakulila mu kulonda Yawe Leza wao.

⁵ Yaluzya inzila yaku Zioni, ali kuno yalalozya amanso ale yakuti, “Izini twemelele kuli Yawe, umu upangano wakuyelelela utanga wililikwe.

⁶ “Antu yane yali wa mfwele ziponge, yakacema yao ali yano yayaponzizye. Yayasile yakuzeuluka mu mpanga, yakululumba ukufuma ku mwamba uu yaya ku mulundu uze. Yasuka yaponga ni kola lyao lyampomvu.

⁷ Wensi wino wayakomenkanya ayatakanya. Na anisi yao ala yakuti, ‘Usi mulandu witu foo, nga vino yaifya kuli Yawe, ikola lyao lya mpomvu nu utailo wa vikolwe vyao.’

⁸ “Utukini mufume kuko ku Babiloni. Fumini mu mpanga ya ina Babiloni. Muye wa mbuzi zino zikutungulula ufyo.

⁹ Pano nemo ndaleta ivita vya mitundu ikalamba ivilalwisya Babiloni. Vilafuma ku ntunga ya kukayeya. Vilatantama nu kumulwisya ukufuma ku kayeya vilamupokolola. Inceto zyao zyaya wa vita ivicenjelesye, vino visiwela minwe.

¹⁰ Impanga ya ina Babiloni ilapokololwa icuma, na yayo yano yalavipokolola yalasuka yaivwangile ukuti, ‘Ee kwene vyavula!’ Ivyalanda ne Yawe.

Umusumba wa Babiloni wawa

¹¹ “Sansamukini, zangini mwemuno mwapokolwilwe caupyanyi cane! Cenini wa kana ka ng'ombe mu nyika ya mulemvwe, mulile wa mfwalasi zyaconsi.

¹² Ala nyoko insonyi zyatizimulema wakwe cimwi. Wino wamuviile watazewana. Awino lyene watacepesya pa mitundu yonsi. Wataya inyika, impanga yaula amanzi nupya ulwanga.

¹³ Atalatala aikalwemo nupya, pamulandu ni cipyu cakwe Yawe. Alasanguka ulwanga umwaulwa akali konsi na wensi aalapita ku Babiloni, alazunguka wakwe cimwi nu kulizya miluvi pamulandu nu ulanda wakwe onsi.

¹⁴ Tentemukilini ku kulwisya Babiloni, mumuzinguluke mwensi mwemuno mukavuwa amalapwa nu kufiika inceto. Mulasini ukwaula kutezela uluceto! Ukwaula kumutezela nanti uluceto! Mukatusizini impooma zya ulwi impanga zyonsi.

¹⁵ Watacimba, impungu zyakwe zyatiziwa. Amalinga yakwe yatiyaongoloka. Cii, ali cilanduzi cakwe Yawe. Ilandwilini mwenga kunoli, ndi vino wene wacisile, avino namwe mucite.

¹⁶ Ononini Babiloni, katovya wa mbezu, wino akalema cikwakwa mu nsita yakusinza. Cila muntu aswilile ku akazi kakwe, cila wenga autukile ku mpanga yakwe, apakuti apunsumuke ku lupanga lwa ononyi.”

Kuweluluka kwa ina Izlaeli

¹⁷ Aina Izlaeli yali wa mfwele zino zikulungwa kuli cisama. Apa kutandika cali umwene wa ina Asilya ali wino wayalile ivyala, alino piza palondelela Nebukadineza umwene waku Babiloni, nawe wizile akokota amafupa.

¹⁸ Ali cino fwandi Yawe Wamaka yonsi, Leza wa ina Izlaeli, wavwanga wati, “Namafulula umwene waku Babiloni kumwi ni mpanga yakwe yonsi ndi vino nacisile umwene waku Asilya.

¹⁹ Alino ndaswilizya Izlaeli kwi cemelo lyakwe, alalya cakulya cakwe ku mwamba wa Kalimeli ku citungu ca Basyani. Nupya alalya mpaka aiine, atelepe mu mpanga yakwe Efulemu nu mu Gileadi.

²⁰ Umu manda yaya na pa kasita kaka, mu mpanga yakwe Izlaeli mutalaya uyi foo, ni mpanga yakwe Yuda mutalaya inkota foo. Pano insyazi izilasyalako, ndaziyelela uluse.” Ivyalanda ne Yawe.

Yawe wapezya umusumba wa Babiloni

²¹ “Pitangini muye mukalwisye impanga ya Melataimu muwililile na ina Pekodi. Muyakomole nu lupanga, muyalovye. Mucite icili consi ndi muno munenile ukucita. Ivyalanda ne Yawe.

²² Ivyongo vya nkondo vikuvwika mu mpanga, nupya umulimo wa ononyi wa kaluma ncecete!

²³ Iye mwe vino Babiloni wali wa nondo ino ikutamola insi yonsi, alino lyene inondo kwene iyo yatitamoka! Yemwe Babiloni akusalosya antu ya mitundu yuze yonsi ku myenzo!

²⁴ Mwe ina Babiloni mwatimulemwa mu lukose, muno nemo namuteile ukwaula kuti mumanye. Asi papo lyene mwatimulemwa mwemuno mwandwisyanga, ne Yawe.

²⁵ Lyene mwalola! Ne Yawe ninjula mu nkoma ya vyanzo vyane, natimvifumyamo cipyu cipyu, pano ne Yawe Simwandalali Wamaka yonsi indi nu mulimo wakuomba mu mpanga ii ya Babiloni.

²⁶ Aleni fwandi lyene, muciwililile monsi monsi, tamolini izyankoma muno yakasezezya ingano zyao! Vino mumapokololanga, muvitulike mu mitumba ndi vino yakatulika ingano. Ononini musumba! Mutasya mwenemo akantu nanti kamwi.

²⁷ Komolini alumendo ya nkondo yano yakwata yonsi. Muyafyemfyente! Iye mwe, amanda yayazana! Amanda yafika akuvunuka aina Babiloni!

²⁸ Imbutusi zino zikupuuka mu mpanga ya Babiloni nu kwiza mu Zioni, azizyo muzyuvwe kuno zikulanda vino Yawe wanenyile aina Babiloni, pali vino yacisile ku Ng'anda ikulu yakwe Leza.

²⁹ “Amini yano yacenjela kufiika inceto yize yalwisye aina Babiloni. Mwame sile yonsi pyu yano yamanya kuzumba amalapwa. Zingulukini umusumba, mutaleka nanti wenga apuuke. Mulandule apa vicitwa vyao, ndi vino nayo yacisile. Pano kwene yacita icilumba kuli Yawe, Wamuzilo wilya wakwe Izlaeli.

³⁰ Caleka fwandi, alumendo yayo yamafwila mu miseo ntangali ntangali. Ivita vyao vyonsi ali kulowelela pyu apa wanda kwene ulya.” Ivyalanda ne Yawe.

³¹ Lolini mwe ina Babiloni, mwe viyantu vya cilumba. Nemo ne Mwene, Yawe Wamaka yonsi, natimukatukila. Pano insita inu yatifika, iyakuti muvunukwe.

³² Mwe antu amu mutundu wacilumba, mumatangananga sile nga nu kupona mumaponanga. Nu wakumukatusya kutalaya. Nemo namaoca imisumba yonsi ni vintu vyonsi, ivyaya umu mbali mbali navyo kwene vili nu kupya.

³³ Nga alino nupya kwene Yawe Wamaka yonsi wavwanga wati, “Aina Izlaeli na ina Yuda pasi pakucula mwe. Yonsi yano yalemwa nu kuyasenda mu uzya yayasinamo ni ngala, kusi nu kuyata foo.

³⁴ Lelo apano naya ne Wamaka, nemuno ningayatuula. Anene nemuno nkaamwa ukuti Yawe Wamaka yonsi. Anene namayatuula, nu kuleka kuti antu yaikalile ku matwi cele. Lelo aina Babiloni yene namayaponyezya sile isyamo.”

³⁵ Caleka Yawe wavwanga wati, “Ulupanga lwa nkondo lukulwisya aina Babiloni! Lwene lukulwisya yayo aikala mu Babiloni kumwi na yano yakayapandako amano.

³⁶ Ulupanga lwa nkondo lukulwisya yakasema, kuti yasanguke iviwelewele! Ulupanga lwa nkondo lukulwisya ivita vyakwe, kuti vice vyazakaza sile uku ntete.

³⁷ Komolini imfwalasi zyao na maceleta yao kwene! Komini kumwi ni vita ivyenyi, ivyafuma ku mitundu yuze, vino yingizya incito uku ina Babiloni apakuti yayazwe. Yene icili conga sile wakwe yamangu. Ononini ni vyuma vyao kwene vino yasunga. Muvisampe visendwe nu kusendwa.

³⁸ Lekini impanga ilangoke, inguzi kazikamilwe, pamulandu wakuti impanga yatuluwi, utwalenga nu kuti antu yaye kwati ayacipena.”

³⁹ “Ali cino fwandi umu mpanga ya Babiloni mumaikalanga sile yacimbwi, nga kuku kwene yasinsimwe yamaya nu wikalo. Nupya mutalatala mwikale mwenemo umuntu nanti wenga, insita iili yonsi.

⁴⁰ Ndivino cali lino nononyile Sodoma na Gomola, kumwi ni mizi ino yali umu mbali, ali vino namacitila Babiloni. Mutalatala mwikale umuntu nanti apa kasita akanono.” Ivyalanda ne Yawe.

⁴¹ Lola! Antu ayayo yakufuma uku kayeya, nupya yene antu amutundu umwi uwa maka. Yali na yamwene avule, ukufuma kumwi kuno kutaitalimpila. Yizile ku kulwa inkondo.

⁴² Yasenzile amalapwa na masumo. Antu yamwi akakate, nu luse yatakwata. Imitinti ya mfwalasi zyao ikuvwika kwati a yemba uwatakatusya amaimbi. Yene yakwizila Babiloni.

⁴³ Umwene waku Babiloni apakuvwa impwelo pali alio, atandika kuzakaza mu mimfyompo. Pasi pakuteza kwati umwanaci wino ali pipi nu kulela.

⁴⁴ “Nemo ne Yawe apakwiza, nkwiza wakwe cisama wino walompoka mu matesi amu Yodani, apakulungama ku nyika ya mulemvwe kuno antu yakacemela iviteekwa vyao. Avino ndapumikizya aina Babiloni, nu kuyazinga mu musumba wao. Uzye aweni wino ndaisolwela uwakuteeka umutundu ndi uu? Aweni angaya, wakwe nene angailinga kunondi? Uzye akacema cii, wino angancilima?

⁴⁵ Fwandi mwemo mule muvwe sile kunondi, navino napingila ukucita umusumba wa Babiloni ni mpanga. Cacumi, nu twana utunono nato kwene yalatwalanganya apa kutusendela kumwi, cakuti nu muntu wensi sile alazunguka.

⁴⁶ Lino impanga ya Babiloni ilawa, kuluvwika icilundumusi. Antu amitundu yonsi yaluvwa impooma zya ina Babiloni.”