Yelemiya 5 - Amazwi Yakwe Leza 2013

Iifyo lyakwe Yelusalemu

¹ “Mwe antu amu Yelusalemu, simulini mu miseo inu! Mucelecensye nu kuilolela! Mulondelezye umu misolo yonsi iyaya mwenemo, tulole ndi cakuti mumazanamo umwi wino akacita visuma nu kwezya ukuya wacumi kuli Leza. Ndi kungaloleka umuntu umwi, wino angaya wacumi kuli Leza, ale lyene ndelela umusumba uu wa Yelusalemu.

² Nanti angala yene yakavwanga yati, ‘Tukapepa Yawe,’ yene yasicita vino yakalanda.

³ Cumi kwene Yawe akalolekesya pa vyacumi. Wene wamuzanzile, lelo mwemo mutuvwile ukali. Wene wamusyunozile, lelo mwakanyile ukusambililapo cimwi. Mwemo mwakoma imitwe ukuluta iwe nga nupya mwakana nu kuzenzuka.

⁴ Lyene nani nelenganya inti, ‘Antu yaa apina sile. Yene awelewele. Pano yatamanyile vino Leza akalonda, na vino wene akasi kuti yacita.

⁵ Acino namaya ku ntunguluzi kuti nkazilandile. Cumi kwene zyene zimanyile inzila zyakwe Yawe, na vino wene akalonda kuti zyacita.’ ”

⁶ Ali cino na cisama ukufuma mu mpanga aliza ayakome, nu mumbulu uwamu lwanga uliza uyalepole mu tumpilinsya. Inangu nazyo zilateyamila apipi ni misumba yao kuti zisanyole wiyo wensi alalonda ukufuma. Pasi pano uyi wao watiupitilila, na ucisanguka wao nao pasi pakuvula.

⁷ Yawe auzya ati, “Uzye pacani cino ningelela amaifyo ya antu yane? Yene yamfutatila nupya yakapepa tuleza utusi twacumi. Nemo nimwile antu yane mpaka yikuta, lelo yene yacisile ulenzyo nu kwizya pamwi na yacizelele.

⁸ Yene yali wa mfwalasi zyakalume zyalunkumbwa nupya iziine. Cila mfwalasi yakwelelanga muka muze.

⁹ Uzye kwene mwati ntalayavunuka apa vintu vii vyonsi nu kucita icilanduzi pa antu amu luko ululi ndi luu? Ivyalanda ne Yawe.

¹⁰ Yangini musalale mu vyalo vyao vya matingi, Vyononini lelo mutavimalila. Putulini insaala pano zisi zyakwe Yawe.

¹¹ Aina Izlaeli na ina Yuda yansangukila wakwe cimwi. Ivyalanda ne Yawe.”

Yawe wakana Izlaeli

¹² Antu yakwe Yawe yatiyamukana nga yavwanga yati, “Kusi cino Yawe alacita nupya kusi iciipe cimwi icilatuponela. Tutalatala tuponelwe ni nkondo nanti cipowe.”

¹³ Yene yavwanga ukuti yakasema imiza sile nupya yatakweti amazwi yakwe Yawe.

¹⁴ Acino Yawe avwanga kunondi ati, “We Yelemiya, pamulandu wakuti antu yaa yatiyavwanga ivintu vyamusango ndi uu, nemo ndaleka amazwi yane yaye wa moto umu tunwa twao. Nupya antu yaa yalaya wa nkwi, nga nu moto ulayoca mpaka yalokote.”

¹⁵ Yawe walanda wati, “Ala mwine mwe ina Izlaeli, anene nemuno nkuleta antu ukufuma ku luko ulwa kutali kuti yize yamulwisye. Yene uluko lumwi ulukome, nupya mwemo mutamanya icilimi cao.

¹⁶ Ivyanzo vyao vikoline ni lindi ilyasame. Yonsi pyu pano yapela ivita vyamaka.

¹⁷ Yene yaliza yamalile ivyakulya pamwi ni viseekwa vinu vyonsi pyu. Yalakoma ana inu aonsi na anaci kwene. Yene yalafyula iviteekwa vinu na maufyo inu nu konona amatingi kumwi ni misamvu inu. Anisi inu yalonona imisumba inu yamalinga, ino mwataila mwenemo.

¹⁸ “Lelo mu manda kwene yayo ntalamonona imumalile, awe.

¹⁹ Lino antu yati, ‘Uzye pacani cino Yawe Leza witu watucitila vii vyonsi?’ Namwe muce muyasuuke muti, ‘Vivi kwene vino mwemo mwantazyela nga mutandika nu kutumikila tuleza twa inamasi umu mpanga inu kwene, ali vino mulatumikila ainamasi umu mpanga ino isi yakwinu.’ ”

Leza wasoka antu yakwe

²⁰ Yawe walanda wati, “Umini imbila ii uku amu mupanda wakwe Yakobo, munene antu amu Yuda muti

²¹ sumbiniko amano, mwe antu atumpe nupya aulwa amano, mwemuno mwakwata amanso, lelo musilola nupya mwakwata amatwi, lelo mwemo musiuvwa.

²² Nene indi Yawe. Uzye lyene pacani cino musioopa nene? Uzye pacani cino musizakaza pa manso yane? Nemo nisile umusensenga uwamu nkumba yakwe yemba kuya ali nande kuli yemba, nande wakuyelelela wino mutalatala muciluke. Amayimbi yakwe yemba yangakatuka, lelo suka yaposiwe. Nanti yangapooma uli, lelo yatange yaciluke, awe.

²³ Lelo antu yaa yatalama imyenzo nupya iyumalale. Yene yamfutatila nu kunsya.

²⁴ Yasitala yelenganya mu myenzo yao yati, ‘Katoope Yawe Leza witu, wiyo akatupeela imvula ya mooko na coola mu nsita zyaiko nu kutupela insita ya uzombozi cila mwaka.

²⁵ Lelo kwene imicitile ya kuluvyanya kwinu, na maifyo inu vyamupoka ivintu vii.

²⁶ Umu antu yane mwaya antu aipe yano yakateyamila wakwe yakateya ya vyunyi. Yene yakateya inkose, lelo antu ayano yakalemya.

²⁷ Mu mang'anda yao mwazula ivisampwe kwati ivyamu cinsalanga ca vyunyi. Uli mulandu uno yaya akama nupya yali na maka.

²⁸ Yaya antu yamwi aine nupya atozoke indilwa, nga ni vicitwa vyao iviipe wakwe cimwi. Yene yasipela ana asyale insambu zyao nanti kucita vyaulungi kuli yao azunyiwa.’ ”

²⁹ Yawe walanda wati, “Uzye ntange njavunuke pa vintu vii? Uzye kwene ntange njilandwile pa luko lwa mwata ndi uu?

³⁰ Ivintu vimwi vyakuzunguka nupya vyakoopa, ali vino vikucitika umu mpanga.

³¹ Yakasema yakusema vyaufi na yasimapepo nayo yakusambilizya sile vino yatemwa. Lelo antu yane nayo aula ukuyalesya. Uzye lyene mulacita uli lino vii vilasila?”