Yelemiya 48 - Amazwi Yakwe Leza 2013

Ukononwa kwakwe Moabu

¹ Pamulandu wa ina Moabu Yawe Wamaka yonsi, Leza wa ina Izlaeli, walanda wati, “Kalanda ku musumba wa Nebo, wasanguka ulwanga. Kilyataimu yalamupupanya nu kumupoka. Ilinga lyauko lyamaka yalalipupanya nu kulitamola.

² Moabu yatalamulumbanya nupya. Umu Hesyiboni ali muno yakupangila ukuwisya umusumba wa Moabu. Yakuti, ‘Izini kuno, lekini tulovye uluko lulu.’ Namwe kwene, mwemuno mwikala mu Madimeni, yalamulenga ukuya cele. Ivita vilamuzinganya ku lupanga.

³ Inkuuta azizyo. Uvwini vino aina Holonaimu yakupunda yati, ‘Ala cinduvyanya nu ononyi mwe!’

⁴ Impanga ya Moabu yatiyononeka. Inkuuta zyao zikuvwika mpaka nu ku Zoa.

⁵ Yakutumbela ukuya ku Luiti. Yafumile yakulila nzila yonsi, uku mutelemuko waku Holonaimu. Impooma zya ulanda ala azizyo zikuvwika.

⁶ Simulini mwe, mupususye umi winu umu kukolanya coolwa.

⁷ Pamulandu wakuti mwemo mwataila mu vicitwa vinu nu mu vyuma vinu, namwe kwene mulasendwa mu uzya, nga na Kemosyi alasendwa mu uzya, kumwi na yasimapepo yakwe nga na makombe yakwe.

⁸ Umononyi wilya aliza ku konona umusumba uli onsi, nga kusi umusumba nanti onga uno alapanya. Icifoloma cilononwa kumwi ni mpanga itambalale, pano Yawe uwatavwanga.

⁹ Muceule Moabu, pano kwene alononeka. Imisumba yakwe ilasanguka ulwanga, umusyaikala nanti umuntu wenga.”

¹⁰ Watipwa umuntu wiyo wino akaomba umulimo wakwe Yawe ukasu ukasu! Watipwa umuntu wino akalesya ulupanga lwakwe ukuzwisya uwazi!

Imisumba yamu Moabu yononwa

¹¹ Yawe wavwanga wati, “Moabu ukutandikila sile ku wance wakwe wikalanga ku matwi cele. Atatazile asendwepo ku uzya. Impanga ya Moabu yaya wakwe waini, umwikalilile, wino yatatala yitulwila umu nkolo zyuze. Fwandi nu kununkila kwakwe kutatala kusila. Kwaya sile mumu kwene muno kwayela.”

¹² Lelo Yawe wavwanga wati, “Cenjelini, amanda yaliza lino ndamutumila antu yakitulula, akumwitulula. Yalapakulula iviya vyakwe nu kutamola inkolo zyakwe.

¹³ Alino lyene Moabu insonyi zilamulema pali Kemosyi, ndi vino zyalemile ang'anda yakwe Izlaeli lilyo lino yataile muli Betele, kaleza kaluzi.

¹⁴ Mwe ina Moabu, uzye mungalanda uli ukuti mwemwe vita vyamaka, yanyela uku kulwa inkondo?

¹⁵ Ala nkumunena ukuti umononyi wakwe Moabu ni misumba yayamo wataiza ku kulwisya. Alumendo yaya kwene asopoloke aku Moabu yatiyatelemukila uku kukomwa.” Ivyalanda ne Yawe, Leza Wamaka yonsi.

¹⁶ “Uononyi wapali Moabu watiupalamila. Isyamo lyakwe lyamwizila lwilo lwilo.

¹⁷ Mulililini mwensi mwe inipamba lyakwe, mwensi mwemuno mwamanya izina lyakwe mule muti, ‘Iye mwe! Intuwa yakwe ya maka vino yakontoka! Intuwa yakwe iya wene wa ucindami!’

¹⁸ Ika papo apa cilimba cako caucindami, uivwenteke apa citumba, we mukazyana mwana Diboni, we muno watenzi lyonsi umu mutende. Pasi pano lyene umononyi wakwe Moabu wiza ku kulwisya. Wene wataonona na malinga yako.

¹⁹ Mwe ina Aloeli imililini pa museo, mwacevya. Uzyini imbutusi na yano yasyala impondo muti, ‘Kuli ci mukwai?’

²⁰ Insonyi zyatizilema Moabu, pano wene wataononeka. Pongomokini mulayeele! Laizini uku Alinoni muti, ‘Moabu wataononeka!’

²¹ “Akasita lyene kati kapalama akakupingwila impanga itambalale, uku Holoni, uku Yaaza nu ku Mefaati.

²² Uku Diboni, uku Nebo nu ku Beti Dibulataimu,

²³ Uku Kilyataimu, uku Beti Gamuli nu ku Beti Meoni,

²⁴ uku Kelioti nu ku Bozila nga nu ku misumba yonsi yaku Moabu, iya kutali ni ya mupipi.

²⁵ Amaka yakwe Moabu yatiyononeka, ni kasa lyakwe lyamaka lyatilikontoka.” Ivyalanda ne Yawe.

Moabu yalamucefya

²⁶ Mukolesyini sile akoleke, pano watatalamila Yawe. Lekini Moabu aivumvunye mu malusi yakwe. Lekini asekwe.

²⁷ Uzye asi wewe wasekanga Izlaeli? Uzye yamulemile apakasi ka ivi, apakuti lyonsi wemo wapukanya sile umutwe wako, lyonsi lino walumbula izina lyakwe?

²⁸ “Mwe ina Moabu mwe, fumini sile mu musumba. Ikalini mu vimawe. Mukolanye icipeele cino caluka cinsanzo mu lwema lwa mipokapoka icenjemale.

²⁹ Twatituvwa icilumba cakwe Moabu, icilumba cimwi icitaikulila. Iye mwe vino akaitanka nu kuvimbana, vino waya na macacali nu kuikuzya umu mwenzo wakwe.

³⁰ Namanya icilumba cakwe. Lelo ukuitanka kwakwe ukwaufi, nga ni vicitwa vyakwe navyo kwene ivyaufi.

³¹ Caleka nemo nkulilila Moabu ulanda. Nkupomola ni mpooma pali Moabu wensi. Nkulosya antu aku Kili Haleseti.

³² Nkukulilila ulanda ukuluta na pali Yazeli. Iye mwe, mwe matingi aku Sibima, mwemuno insala zinu zyasapalala ukufika nu ku mbalama yakwe Yemba wa Musilya, mpaka ukufika nu ku Yazeli kwene. Lyene umononyi watafika, wawililila na pa matingi yako ace nga na pa uzombozi wako uze uno wazombola.

³³ Uluzango ni nsansa vyativifuma mu mpanga ya Moabu. Natindesyanya ukupangwa kwakwe waini. Kusi umwi akuzangila pa kufena amatingi, ni congo icili mwenemo cisi congo ca luzango awe.

³⁴ “Aina Hesyiboni na ina Eleale yakulayeela impooma. Ukulayeela kwao kukuvwika mpaka nu ku Yaazi, ukutandikila sile ku Zoali mpaka nu ku Holonaimu nu ku Egilati Syelisyiya. Pano na manzi kwene aku Nimulimu yatiyakama.

³⁵ Namalovya umuntu ali wensi umu Moabu, wiyo wensi akutuula impolelwa nu kocela ka leza kakwe ubani, umu ncende yakupepelamo.” Ivyalanda ne Yawe.

³⁶ “Acino umwenzo wane ukulilila Moabu kwati a mutolilo. Wene ukulilila antu aku Kili Haleseti kwati a mutolilo, pamulandu wakuti cuma cao consi cino yatulumanika caticilowa.

³⁷ Cila muntu lyene watapela ulukuzu ku mutwe nga apeela ni vilezu. Iminwe yakwe ali wensi yaticembolwa. Yonsi yatiyapeteka ivyakuzwala vya ndosya mu misana.

³⁸ Apa mapaala ya mang'anda yonsi aku Moabu nu mu miseo kwene muli mpooma zitupu, pamulandu wakuti natintamola Moabu wa nsembo ino yonsi yasuula. Ivyalanda ne Yawe.

³⁹ Iye mwe! Silolini vino Moabu wataononeka! Si uvwini vino akulilila antu yakwe! Si lolini vino wene watapuuka umu kupupana! Moabu wataya icintu cakusoweka, icintu cakoofya kuli yayo yonsi amulizizya.”

⁴⁰ Yawe wavwanga wati, “Silolini! Lyang'anda akuvwelukila pansi, wataanza na maapa yakwe pali Moabu.

⁴¹ Umusumba wa Kelioti ulapokwa nga na malinga yalapokwa. Mu wanda ulya imyenzo ya vita vyaku Moabu ilaya wa mwenzo wa mwanaci wino ali pipi nu kulela.

⁴² Moabu alononwa wa luko, pamulandu wakuti wene wasangukila Yawe.

⁴³ Intete nu ucinga ni viteyo vikulolela mwemwe, mwe antu aku Moabu, Ivyalanda ne Yawe.

⁴⁴ Wiyo wensi amapuuka pamulandu ni ntete, alaponela mu ucinga. Na wino alafuma mu ucinga alalemwa mu viteyo. Pano vikwene ali vino ndavunukilako Moabu umu nsita yakononwa kwakwe, ivyalanda ne Yawe.

⁴⁵ Imbutusi azizyo zimilila mu cisao ca Hesyiboni nupya zyatizitonta, pano umoto watiufuma mu Hesyiboni, icimbilimbili caticifuma pakasi kakwe Siooni. Umoto watioca amausyu ya ina Moabu, nu tupanga twakwe yakawawata ya lwete.

⁴⁶ Kalanda kunuli, we Moabu! Antu aku Kemosyi yononwa. Ana yako aonsi yasendwa ku uzya na ana yako anaci nayo yalemwa.

⁴⁷ Lelo kwene umu manda aliza ndawezezya Moabu isyuko lino wakweti,” Ivyalanda ne Yawe. Paa, apapelela upinguzi pa ina Moabu.