Yelemiya 47 - Amazwi Yakwe Leza 2013

¹ Yaa amazwi yano Yawe walanda kupitila muli kasema Yelemiya, yano yakumile aina Filisti, lino Falao atacili onona Gaza.

² Wene wavwanzile ati, “Lolini vino amanzi yatumbalala ukufuma ku kayeya. Yali kwati uluzi ulwati luzula, yakuunzya impanga kumwi na vyonsi ivyayamo, imisumba na ikazi ya mwenemo. Antu yakupunda, na ikalansi yonsi yakulila ulanda.

³ Apa kuvwa imitinti ya mfwalasi ni congo ca maceleta, nu kukolokonsya kwa mipeto, awe cumi icaulanda. Ya isi ya ana kusi kwiusya ana yao. Amakasa yao yatiyatemboka.

⁴ Pasi pano lyene uwanda watiwiza uwakulovya aina Filisti yonsi, uwanda wakucilikilako asyala yonsi yano yangazwilizya aina Tuli na Sidoni. Yawe ali pipi nu konona aina Filisti, insyazi zyamu nkumba yakwe Kulete.

⁵ Antu aku Gaza yatiyapela inkuzu apakulosya. Umu Asyikeloni mwazuka. Nawe we Asyidodi, wemuno wasyala mu ina Anaki, uzye umaicembola mpaka lilaci?

⁶ Mwemo mukuti, ‘Iye mwe, we lupanga lwakwe Yawe, ulapuza lilaci? Sungala uswilile mu cituwo cako, nenuka, ikala cele.’

⁷ Uzye ulupanga lungapuza uli, vino Yawe aliwe uwatalupela ilamulo lyakuya zanza Asyikeloni ni nkumba yakwe yemba.”