Yelemiya 44 - Amazwi Yakwe Leza 2013

Yelemiya wasoka antu kuti yate upefi wa tuluwi ku Eguputo

¹ Izwi lii lyafikile Yelemiya pamulandu wa Ayuda yonsi yano yikalanga mu mpanga ya Eguputo, ku Migidoli, ku Tapenesi, ku Memfisi nu ku mpanga ya Patilosi.

² Yawe Wamaka yonsi, Leza wa ina Izlaeli wavwanga wati, “Mwalola mpiti ulanda onsi uno naletile Yelusalemu ni misumba yonsi yakwe Yuda, pali ndakai ivitala ng'anda umu siikala antu.

³ Apamulandu nu uyi uno yacisile, wakunsosya umwenzo lino yaile kuli tuleza utwenyi tuno yatamanyile aeneco kwene nanti ivikolwe vyao cakuti yatocela ubani nu kututumikila.

⁴ Ukuya kwene nemo namutumilanga lyonsi aomvi yane yakasema. Nayo yamulesyanga ukucita icintu cico ca winyi cino napata wakwe cimwi.

⁵ Lelo mwemo mutakasi ukuvwa, nanti ukusumbako amano. Mutalondanga ukuta cimusango cinu cakutuula tuleza twinu ubani.

⁶ Fwandi lyene nani icipyu cane cayaponile nu koca imisumba yamu Yuda ni miseo ya musumba wa Yelusalemu yasanguka amatongwa na antu apakuilola yakakunta sile imitwe ukufika na pilelo.

⁷ “Lyene Yawe Wamaka yonsi, Leza wa ina Izlaeli, akuti, Uzye pacani cino mungailetelela uzanzo ndi uo? Uzye mukulonda sile ukuletelela aonsi na anaci, utwance nu tunya kumwi, cakuti kuno muli kutakasyale nanti umwi uwa mbezu?

⁸ Uzye pacani cino mwamvulumwila icipyu uku vicitwa vya minwe inu, apa kocela tuleza utwenyi ubani umu mpanga ya Eguputo, kuno mwiza sile ku kwikala? Apa kucita camusango uo, mukulonda sile ukuilovya mwe eneco, cakuti antu amitundu yonsi pano nsi yakumuseka nu kumuwela. Yene yakaomvya ni zina linu alino yakulumbula apa kutipwila.

⁹ Uzye mwilila uyi wa vikolwe vinu, uyi wakwe yamwene aku Yuda nu wa aci yao, nu uyi winu mweisikulu nu wa aci inu, uno wacitike mu mpanga yakwe Yuda nu mu miseo yamu Yelusalemu.

¹⁰ Alino lyene ukufika na pilelo mwemo mutazenzuka foo. Mutankwatila icoopo, nupya musilondela amasunde yane yano napiile kuli mwemwe nu ku vikolwe vinu.

¹¹ “Caleka fwandi ne Yawe Wamaka yonsi, Leza wa ina Izlaeli, ndamulovya, ndonona ni mpanga yonsi yakwe Yuda.

¹² Alino lyene ndasenda antu alasyalapo amu Yuda yano yapanzile ukuya ikala ku Eguputo. Ndalola inzila yakuyalovezyamo, muno kwene mu Eguputo. Yalafwa ku nkondo, uku cipowe nu ku mpungo. Antu yalazunguka sile pa kuyalola. Yalayawela nu kuomvya izina lyao apakuyatipwila.

¹³ Ndiza imvunuke yano yalikala umu Eguputo ndi vino nacitile Yelusalemu, uku nkondo, icipowe ni mpungo.

¹⁴ Alino apa antu asyalapo mu Yuda, yano yaile ku Eguputo ku kwikala, patalapusuka nanti wenga uwakuti akaswilile uku mpanga ya Yuda, ino yene yakalukisya wakwe cimwi ukuya ikala mwenemo. Pano kwene patalapusuka nanti wenga, suka sile imbutusi zimwizimwi.”

¹⁵ Apakuvwa vivyo, aonsi yonsi yano yamanyile ukuti aci yao yatuuzile tuleza utwenyi ubani, alino na anaci yonsi yano yazanyilwe kweneko, ukwikapo sile na ina Yuda aikalanga uku citungu ca Patilosi umu mpanga ya Eguputo, yaasuka Yelemiya yati,

¹⁶ “Swemo vino watunena umwi zina lyakwe Yawe, twakana, tusikulondela izwi lilyo.

¹⁷ Swemo tumatwalilila ukucita vino twalaya. Tumaocelanga namwene wa mwiyulu ubani. Tumamupongolwelelanga na mawila ya vyakumwa. Vivi kwene sile vino twacitanga sweisikulu, ivikolwe vitu, yamwene itu, intunguluzi zitu, ndi vino antu yacitanga mu misumba yamu Yuda nu mu miseo yamu Yelusalemu. Pano lilyo lyene twakwatanga vyakulya ivivule, twayanga nu longo nupya ni syamo litatuponelanga, awe.

¹⁸ Lelo ukutandikila sile pano twatelile ukocela namwene wa Mwiyulu ubani nu kupongolwela uwila wa vyakumwa, tukaulilwa ivintu, nupya na antu itu pasi pakufwa uku nkondo nu kucipowe.”

¹⁹ Anaci yaya nayo alino iyalundapo ukuvwanga iyati, “Lino twafutikilanga namwene wa Mwiyulu nu ubani nu kumupongolwela uwila wa vyakumwa, uzye tungati yawitu yatamanyile ukuti twenganga na makeke akoline ni cata cakwe, alino nu kumwitulwila uwila wavyakumwa?”

²⁰ Cino sile antu yonsi, aonsi na anaci yamala ukulanda vii, alino Yelemiya ayanena ati,

²¹ “Apa ubani uno mocelanga umu misumba yamu Yuda nu mu miseo yamu Yelusalemu, mwemwe pamwi ni vikolwe vinu, yamwene inu, intunguluzi zinu na antu amu mpanga, uzye mwemo mukwelenganya ukuti Yawe atamanyilepo cimwi, nanti mukuti wene wilila kweneko vwilini?

²² Asi papo, ukufika napilelo impanga inu yononeka mutacili nanti umwi uwakwikala mwenemo. Antu yauze yakazunguka sile, apakulola vino cili, ni zina linu, ali lino yakaomvya apakutipwila. Pasi pano Yawe wasusile waposiwa ukuzizimizya apa miyele inu ni misango inu iipisye.

²³ Isyamo lii, lyamuponela mwemwe wakwe vikwene vii, vino cili ukufika na pilelo, apamulandu wakuti mwemo mwatulanga utuluwi tuleza tuze tuze sile. Mwaifyanga kuli Yawe, mwakananga nu kutontela amasunde yakwe pamwi ni vipope vyakwe.”

²⁴ Nupya Yelemiya anena antu yonsi na anaci kumwi ati, “Uvwini izwi lyakwe Yawe, mwe antu aku Yuda, mwemuno mwikala mu Eguputo.

²⁵ Yawe Wamaka yonsi, Leza wa ina Izlaeli akuti, ‘Mwe yamangu mwe, vino mwalaya apatunwa twinu mufwile mwavicita ni minwe yinu. Mukavwanga ndi vino mulafikilizya ivilayo vino mwalaya, ivyakocela Namwene wa Mwiyulu ubani, nu kumwitulwila uwila wa vyakumwa!’ Aleni fwandi mwalukuwaka ivilayo vinu nu kumwitulwila uwila wa vyakumwa!

²⁶ Lelo kwene mungala muvwe ukwizwi lyakwe Yawe mwe ina Yuda mwensi, mwemuno mukaikala umu Eguputo. Yawe akuti, ‘Nalapa umwi zina lyane ilikulu ndi vino, monsi sile umu mpanga ya Eguputo, yatalatala yalumbule izina lyane uku mwina Yuda nanti wenga yati, “Nalapa umwi zina lyakwe Yawe wa umi wa pee.”’

²⁷ Panondi pano, namamusuntililanga sile mpaka ince nkamuletelele, isyuko lyene, kotoo! Aina Yuda yonsi aikala umu Eguputo, yalalowa uku nkondo, nanti uku cipowe mpaka yakasuke yakasililikile pyu.

²⁸ Lelo ampendwa sile yao alapusunsuka uku nkondo, yalafuma mu mpanga ya Eguputo nu kuswilila uku mpanga yakwe Yuda. Alino zizyo kwene insyazi, zilamanya wino wavwanzile icumi, ndi cakuti anene nanti aliwo.

²⁹ Na cico cilaya ali cakumanyilako ukuvunuka kuno ndiza muvunuke umu ncende ino kwene, mulamanya nu kuti amazwi yane akumucelula, yalimilila sika.

³⁰ Falao Ofila, umwene waku Eguputo, ndamupeela umu makasa ya anisi yakwe yano yakalonda uku mukoma. Ndamucita ndi vino napiile Zedekiya, umwene waku Yuda umu makasa yakwe Nebukadineza, umwene waku Babiloni, uwali umwanisi wakwe, wino walondanga uku mukoma.”