Yelemiya 43 - Amazwi Yakwe Leza 2013

Yelemiya wasendwa ku Eguputo

¹ Walanga sile lino Yelemiya wamala kuyanena amazwi yonsi yakwe Yawe Leza wao, yano wene wamunenyile ukuyanena,

² Azaliya umwana umonsi wakwe Hosyasya na Yoanani umwana umonsi wakwe Kaleya, na antu yonsi aminteleu nu utalami, yanena Yelemiya yati, “Ukusomba sile ufi Yawe atakutumile ukuti tutaya ku Eguputo ku kwikala.

³ Wino akukutunka pali sweswe a Baluki, umwana wakwe Nelya apakuti atupeele mu makasa ya ina Babiloni yace yatukome, nanti ukutusenda ku uzya ku Babiloni.

⁴ Acino Yoanani umwana umonsi wakwe Kaleya pamwi ni ntunguluzi zya vita zyonsi na antu yonsi, yakana ukuvwa ku mazwi yakwe Yawe ukuti yasyale mu mpanga ya Ayuda.

⁵ Caleka Yoanani umwana wakwe Kaleya na akalamba ya vita yonsi yasenda Ayuda yano yasiile, awezile ku kwikala mu mpanga yakwe Yuda ukufuma mu mitundu yonsi ino yasalanganile mwenemo.

⁶ Mwali aonsi yonsi, anaci yonsi na ana yonsi nga na ana ya mwene yakaci yonsi yano Nebuzaladani umukalamba wakwe yakalinda ya mwene wizile nayo na Gedaliya umwana wakwe Aiikamu, mwizikulu Syafani. Yasenda na kasema Yelemiya kwene na Baluki umwana wakwe Nelya.

⁷ Fwandi ali vino yaya ku Eguputo, pamulandu wakuti yakanyile ukuvwa ku mazwi yakwe Yawe, yasuka yafika nu ku Tapenesi.”

Nebukadineza wacimvya Eguputo

⁸ Alino lyene ku Tapenesi izwi lyakwe Yawe lyafikile Yelemiya iliti,

⁹ “Tola amawe uyazike pa manso ya ina Eguputo yonsi mu musolo wa mawe, apa wingililo wi sano lyakwe Falao mu Tapenesi.

¹⁰ Lyene uyanene uti Yawe Wamaka yonsi, Leza wa ina Izlaeli wavwanga wati, ‘Namatuma akuyasenda Nebukadineza, umwene waku Babiloni umuomvi wane. Nawe aliza ku kuteeka cilimba cakwe apa mawe yaa yano ninziika. Nawe alanzika cikuwalo cakwe pa wene wakwe.

¹¹ Aliza afulule impanga ya Eguputo cakuti antu yano yasontelelwa ukufwa ku mpungo, yakafwe ku mpungo, yano yasontelelwa ukufwa ku cipowe, yakafwe ku cipowe nga na yano yasontelelwa ukufwa umu nkondo, yakafwile umu nkondo kwene.

¹² Aloca amang'anda yano yakapepelamo tuleza twamu Eguputo. Alatoca nanti kutusenda mu mpanga ya inamasi. Alazifya impanga ya Eguputo wakwe vino kacema akasola inda mu vyakuzwala vyakwe. Nupya alafuma mwenemo ukwaula nanti umukwangu.

¹³ Alatamola incesi zya ng'anda ipepo ino yakapepelamo ilanzi, iya ku Elyopolisi ku Eguputo. Aloca na mang'anda yauze akulu yakwe tuleza twaku Eguputo.’ ”