Yelemiya 41 - Amazwi Yakwe Leza 2013

Yakoma Gedaliya

¹ Umu mwezi walenga cinimbali Isumeli umwana umonsi wakwe Netaniya, umwizikulu wakwe Elisyama uwamu luko lwa mwene, aiza na antu ikumi kuli Gedaliya umwana wakwe Aiikamu ku Mizipa. Lino yakulya pamwi ku Mizipa kwene,

² Isumeli umwana wakwe Netaniya pamwi na antu yaya ikumi yano yali nawe yakatukila nu kukoma Gedaliya umwana wakwe Aiikamu umwizikulu wakwe Syafani, ku lupanga. Fwandi yakoma umuntu wilya wino umwene waku Babiloni walasike umu mpanga ilya.

³ Isumeli nawe kwene wakomile Ayuda yonsi yano yali pamwi na Gedaliya uku Mizipala nga ni vita vya ina Babiloni vino vyazanyilwe kweneko.

⁴ Uwanda uwalondelile penepo apa wanda wa kukoma Gedaliya, ala umulandu utacili umanyikwe,

⁵ kwizile kweneko aonsi amakumi cinani ukufuma ku Syekemu, uku Syilo nu ku Samaliya. Ala yatiyapela ni vilezu, yatiyalepola insalu zyao nu kuicembola imiili monsi monsi. Yasenzile vyakutuula uwila ni vyakusukilizya ivyakutwala ku Ng'anda ikulu yakwe Leza.

⁶ Isumeli umwana wakwe Netaniya akatuka ukufuma ku Mizipa ku kuya yakomenkanya, ala afumile akulosya. Lino wayakomenkanya avwanga ati, “Izini kuli Gedaliya umwana wakwe Aiikamu!”

⁷ Na lino yingila mukasi ka musumba, Isumeli umwana wakwe Netaniya na antu yano wali nayo yakomola antu yaya nu kuyasumbila mu cifula.

⁸ Lelo umwiumba kwene ilya antu yaya mwalimo aonsi ikumi lyonga yano yanenyile Isumeli yati, “Utatukoma! Tukweti ingano, baale, amafuta nu uci, vino twafisa mu vyalo.” Fwandi nawe ali vino atayakomile. Lelo wayayelile uluse kumwi na auze.

⁹ Icifula muno Isumeli wasumbile ivyala vya antu yonsi yano wene pamwi na Gedaliya yakomile, icifula cimwi icikulu, cino Asa umwene wimvile apakuitasya kuli Baasya umwene wa ina Izlaeli. Ali cino Isumeli umwana wakwe Netaniya wazuzya mwenemo ivyala.

¹⁰ Nga alino lyene Isumeli wiyo asenda antu yonsi yano yasile ku Mizipa na ana yamwene yakaci, yano Nebuzaladani umukalamba wakwe yakalinda ya mwene wasile kuli Gedaliya umwana wakwe Aiikamu pakuti ayasunde. Isumeli umwana wakwe Netaniya akatuka katondo tondo nu kulambila ku ina Amoni.

¹¹ Nga lelo Yoanani umwana wakwe Kaleya, na akalamba ya vita yonsi yano wali nayo, apakuvwa uyi onsi uno Isumeli umwana wakwe Netaniya wacisile,

¹² yakatusya antu yao yonsi pyu ukuyalwisya Isumeli umwana wakwe Netaniya. Yamuzana uku cilambe cikalamba caku Gibyoni.

¹³ Antu yonsi yano yali na Isumeli yasansamuka wakwe cimwi apakulola Yoanani umwana wakwe Kaleya na akalamba ya vita yano wali nayo.

¹⁴ Antu yonsi yano Isumeli wasenzile ku Mizipa, yamufutuka nu kuililila kuli Yoanani umwana wakwe Kaleya.

¹⁵ Lelo Isumeli umwana wakwe Netaniya apaaluka kuli Yoanani pamwi na antu cinani yutukila ku ina Amoni.

¹⁶ Alino Yoanani umwana wakwe Kaleya na akalamba ya vita yano yali nayo yakonganika antu yonsi yano yasile, yano Isumeli umwana wakwe Netaniya wasenzile ku Mizipa, lino wakomile Gedaliya umwana wakwe Aiikamu. Aonsi, anaci, ance na yamutungwi nu kuwela nayo ukufuma ku Gibyoni.

¹⁷ Yakatwike nu kwiza ikala mu ng'anda ya alendo yaku Geluti Kimuamu, umu pipi nu ku Betelemu ala yalungime ku Eguputo,

¹⁸ umu kupuuka aina Babiloni. Yayoopanga apamulandu uwa kwene uno Isumeli umwana wakwe Netaniya wakomile Gedaliya umwana wakwe Aiikamu, wino umwene waku Babiloni wacisile umulasi wa mpanga.