Yelemiya 40 - Amazwi Yakwe Leza 2013

Yelemiya waya kuli Gedaliya

¹ Yawe avwanga kuli ne Yelemiya apacisila ca nsita ino Nebuzaladani, umukalamba wakwe yakalinda ya mwene wamusapwile uku Lama, kuko kuno yamwisile wenga, ala watanyepwa mu minyololo, apali pamwi na antu yauze amu Yelusalemu nga na amu mpanga ya Yuda yano yasenzile ku Babiloni ku uzya.

² Alino musika mukalamba wa vita atwala Yelemiya wenga ku lusansa longa, atandika ukumunena ati, “Yawe Leza wako wapangila ukonona impanga ii,

³ nu kucita watacita cino wavwanzile ukuti alacita. Vyonsi vii vyativicitika pamulandu sile wakuti antu yako yaifya kuli Yawe, yakana nu kumuyela.

⁴ Lelo wemo Yelemiya, ilelo namakusapula iminyololo uku makasa yako. Ndi cakuti ukulonda ukulondela uku Babiloni, tuye twapita nani ndakusunga sile ningo. Lelo ndi cakuti usikulonda ukulondela, usyale. Tala lola sile, impanga yonsi ili sile apa mulola wako, ungaya konsi kuno watemwa.

⁵ Ndi cakuti usikulonda ukupita, ungaswilila kuli Gedaliya umwana umonsi wakwe Aiikamu, nupya umwizikulu wakwe Syafani, wino umwene waku Babiloni walasika ukwikala pa cilimba ca wene ica kuteeka imisumba yaku Yuda. Mungikala nawe apakasi ka antu nanti uye konsi kuno watemwa.” Umukalamba wakwe yakalinda ya kwisano ali pa kumuteyanyizizya impao ni vya wila vyuze apakuti angatenuka.

⁶ Avino Yelemiya wakatwike nu kuya kuli Gedaliya umwana umonsi wakwe Aiikamu, uku Mizipa. Aya aikala nawe apakasi ka antu yano yasile umu mpanga.

Yapangila ukukoma Gedaliya

⁷ Akalamba ya vita yano yasalanganile umu mpanga na antu yao lino yuvwa ukuti mwene waku Babiloni watasonta Gedaliya, mwana Aiikamu ukuya mulasi wa mpanga nu kuya umwi uwakulolekesya apa antu yonsi, ya mama, ance na alanda amu mpanga, yano yatasenzilwe uzya uku Babiloni,

⁸ yiza kuli Gedaliya uku Mizipa. Isumeli umwana umonsi wakwe Netaniya, Yoanani na Yonatani ana yakwe Kaleya, Selaya mwana Taniumeti, ana yakwe Efai umwina Netofa, nga alino na Yaazaniya mwana umwina Maaka pamwi na antu yao.

⁹ Uku antu kwene yayo, ali kuno Gedaliya umwana wakwe Aiikamu mwizikulu Syafani walafile umulapo ati, “Mutoopa ukutumikila aina Babiloni, nga muce mwikale umutende.

¹⁰ Lelo nemo namaikalanga uku Mizipa apa kumuvwangila uku ina Babiloni yano yaliza kuno. Mwemo mwalukuzombola sile waini, iviseekwa na mafuta. Muzuzye sile inkolo zinu, muye nu mu misumba muno mungatemwa ukwikala.

¹¹ Na ina Yuda yonsi yano yali uku Moabu, mu ina Amoni, mu ina Edomu, nu mu mpanga zyuze, apakulola ukuti umwene waku Babiloni watasya antu yamwi yamwi umu Yuda, ayasontela nu mulasi Gedaliya, umwana wakwe Aiikamu, umwizikulu Syafani,

¹² yawelulwike nayo kwene ukufuma ku vifulo vyonsi kuno yasalanganile. Apa kuweluluka umu mpanga ya Ayuda kuli Gedaliya ku Mizipa, yazombola amatingi ni viseekwa vyuze ivingi.

¹³ Alino Yoanani umwana wakwe Kaleya, na akalamba ya vita yonsi yano yalanga yasalanganila mu mpanga iiza nayo kwene kuli Gedaliya, uku Mizipa.

¹⁴ Yiiza yamunena yati, ‘Uzye watumanya ukuti Baalisi umwene wa ina Amoni watatuma Isumeli mwana Netaniya ukwiza kukoma? Lelo Gedaliya umwana wakwe Aikani akana ukuzumila.’ ”

¹⁵ Yoanani umwana wakwe Kaleya ali pakunena Gedaliya umu umfinsolo ku Mizipa ati, “Leka inje nkakome Isumeli umwana wakwe Netaniya, kusi wino alamanya uwatacita cico. Uzye pacani cino wene angakukomela nu kuleka aina Yuda yonsi yano yakolongana kunuli yace yapasike? Icani cino Ayuda yano yasyala penepo yalowelela?”

¹⁶ Alino lyene nawe Gedaliya, umwana wakwe Aiikamu aasuka Yoanani umwana wakwe Keleya ati, “Utezya ucite cico pano ukusombezya sile Isumeli.”