Yelemiya 37 - Amazwi Yakwe Leza 2013

Umwene Zedekiya uzya vimwi vimwi kuli Yelemiya

¹ Nebukadineza umwene waku Babiloni wasonsile Zedekiya mwana Yosiya ukuya pa cilimba ca wene, cakuteeka impanga yakwe Yuda apa cifulo cakwe Yeoyakini umwana wakwe Yeoyakimu.

² Lelo nalyo kwene, umweneco kwene pamwi na aomvi na antu yakwe yatasakamile ukuvwa amazwi yano Yawe walanzile ku kanwa kakwe kasema Yelemiya.

³ Umwene Zedekiya watuma Yeukali umwana umonsi wakwe Syelemiya na simapepo Zefaniya umwana umonsi wakwe Maaseya kuli Yelemiya ku kumulenga ukuti ayapapatileko kuli Yawe, Leza witu.

⁴ Pa kasita kaka, ala Yelemiya acili akupitana mu antu, yatacili yamusumbe nu mu ng'anda yaminyololo.

⁵ Lino ivita vyakwe Falao vyafuma mu Eguputo ukwiza, aina Babiloni alwisyanga Yelusalemu nayo lino yacuvwa, yata yaswililamo.

⁶ Alino izwi lyakwe Yawe lyafikila kasema Yelemiya liti,

⁷ “Yawe Leza wa ina Izlaeli wavwanga ukuti wasuke umwene wa ina Yuda uwatakutuma kunondi, uku kunguzya kuti indole ivita vyakwe Falao ivikwiza ku kutaasya nupya vyasya viswilile ku mpanga yao ku Eguputo.

⁸ Alino lyene aina Babiloni yasyayawele ku kulwisya umusumba uu, yakaupoke nu kuoca.”

⁹ Yawe wati, “Ala mutaisomba mwe eneco muti aina Asilya yatiyafumilila kunotuli. Ala yatafumililako foo.

¹⁰ Nanti mungakomola ivita vya ina Babiloni, ivikumulilizya, suka kwasyala sile impondo zitupu tupu, zizyo kwene zingakatuka nupya nu kwiza oca umusumba uu.”

Yalema Yelemiya nu kumusumbila mu ng'anda yaminyololo

¹¹ Alino lyene ivita vya ina Babiloni vyafumile mu musumba wa Yelusalemu, apakoopa ivita vyakwe Falao.

¹² Yelemiya nawe ali pakukatuka, afuma mu musumba nu kuya ku mpanga yakwe Benjamini kukuya ankanya ivyuma vyakwe ku antu yakwe.

¹³ Lino wafika kweneko ku mpongolo yakwe Benjamini, kalinda uwalindanga impongolo izina lyakwe wali a Iliya, umwana umonsi wakwe Syelemiya, mwizikulu Hananiya, alema kasema Yelemiya nga amunena ati, “Wemo uli ku lusansa lwa ina Babiloni.”

¹⁴ Yelemiya nawe aasuka ati, “Ufi, wasomba sile. Nemo insi ku lusansa lwa ina Babiloni. Lelo Iliya wene akana kumuzumilizya, nga amulema amutwala ku makombe.

¹⁵ Nayo amakombe pasi pakusokela Yelemiya, yamuma nu kumufungilila mu ng'anda yakwe Yonatani, ino yasangwilwe wa ng'anda yaminyololo.

¹⁶ Yamutwala mu kafyototi ka muputule wa pansi, muno watenzi amanda avule.

¹⁷ Nga alino lyene umwene Zedekiya atuma kuti yamulete kuno wali ukwi sano. Alino amuuzya mu umfisolo ati, ‘Uzye kungaya kweneko izwi ilingafuma kuli Yawe?’ Yelemiya nawe aasuka ati, ‘Ee, akuno lili. Wemo ulapelwa mu makasa ya mwene wa ina Babiloni.’ ”

¹⁸ Nga nupya Yelemiya anena umwene Zedekiya ati, “Uzye icani cino naifya kunuli, ku yaomvi yako nanti ku mutundu uu, pakuti unsumbe mu ng'anda ya minyololo?

¹⁹ Yalikwi yakasema inu yano yasowile ukuti umwene waku Babiloni atalakuzanza nanti uku wililila impanga yako?

²⁰ We mwene, musambazi wane sungala uuvwe ukupapata kwane, utanswilizya nupya umu ng'anda yakwe kalemba Yonatani, pano limwi ningaya nkafwile mwenemo.”

²¹ Alino lyene umwene Zedekiya apeela ilamulo ilyakuti Yelemiya asungwe umu musolo wakwe yakalinda. Nupya cila wanda yamupeelanga icakulya, cila wanda umukate upuma, ukufuma uku museo wakwe yakapanga ya mikate, suka sile umukate umu musumba wasila. Fwandi avino Yelemiya watenzi umu musolo wakwe yakalinda.