Yelemiya 36 - Amazwi Yakwe Leza 2013

Baluki wawelenga akalupapulo mu ng'anda yakwe Leza

¹ Mu mwaka walenga ini wakwe Yeoyakimu umwana umonsi wakwe Yosiya ukuya pa cilimba ca wene mu Yuda, izwi lyakwe Yawe lyafikile Yelemiya iliti,

² “Toola amapepala, ulembepo amazwi yonsi yano nkunenyile pamulandu wakwe Yelusalemu, aina Yuda ni mitundu yonsi. Ulembe sile vino nakunena, kutandikila sile pa wanda uno natandikile kulanda nawe, mu manda yakwe Yosiya kufika na pa wanda wilelo.

³ Nalimwi Ayuda ndi cakuti yuvwa uyi onsi uno napingila kuyacitila, yangafuntuka ku nzila zyao iziipe, apakuti nani njuvwileko uluse ku uyi wao nu ku maifyo yao.”

⁴ Yelemiya nawe ali pakwama Baluki mwana Nelya, wamunena nu kuti alembe vyonsi vino Yawe wavwanzile ndi muno Yelemiya wamunenelanga ukuti avino alembe.

⁵ Alino lyene Yelemiya atandika kunena Baluki ati, “Nemo yandesya ukuya mu Ng'anda ikulu yakwe Leza.

⁶ Fwandi nkulonda ukuti wewe ukanjiile kweneko apa wanda ulya lino antu yalata ukulya. Uce ukalemasye apa kuwelenga amazwi yaa, pakuti yace yuvwe vyonsi vino Yawe wayanenyile ndi muno nkunenile ukulemba. Uce ukasolole pamwi apatumpuke apakuti yonsi yace yakuuvwa, kumwi na Ayuda yonsi yano yalafuma mu misumba yao ya mumbali mbali.

⁷ Limwi yangasuka yapapate kuli Yawe yate ni misango yao iipe. Pano kwene Yawe wayapangila wakwe cimwi, ukuyacitila cimwi cikali nupya cipyu cipyu.”

⁸ Baluki umwana wakwe Nelya wacita vyonsi vino kasema Yelemiya wamunenyile kucita, apamulandu wakuwelengela antu amazwi yakwe Leza yano yali muli kalata mu Ng'anda ikulu yakwe Leza.

⁹ Cali mu mwaka walenga isano, umwezi wakwe fundimbali, pano Yeoyakimu mwana Yosiya watandikile kuteeka mu mpanga yakwe Yuda. Ali lino antu yatiile ukulya pamulandu wakupapata Yawe. Fwandi antu yonsi yano yafumile mu misumba yamu Yuda na ina Yelusalemu yatiile ukulya.

¹⁰ Alino Baluki nawe ayawelengela amazwi yano yali mu kalupapulo, yano Yelemiya wamunenyile. Lilyo ala antu yonsi yakukutikila kuli Baluki. Apa kuwelenga Baluki wali mu Ng'anda ikulu yakwe Leza, mu muputule wakwe Gemaliya umwana wakwe Syafani kalemba wakwi sano. Umuputule wakwe, wayelile mu musolo wa papela, apa wingililo wa Mpongolo ya Ng'anda ikulu yakwe Leza, muno antu yonsi yanguvwa ningo.

Yawelengela yacilolo amazwi yonsi amu lupapulo

¹¹ Lyene walanga Mikaya umwana wakwe Gemaliya, umwizikulu Syafani, uvwa amazwi yonsi yakwe Yawe yano yali muli kalata,

¹² atentemukila kwi sano, aingila mu muputule wakwe yakalemba, umwakolongine yacilolo yonsi, ivili wakwe kalemba Elisyama, Delaya umwana wakwe Syemaya, Elinatani umwana wakwe Akiboli, Gemaliya umwana wakwe Syafani, Zedekiya umwana wakwe Hananiya, ni vilolo vyuze vyonsi vyasyala.

¹³ Mikaya ayalandila amazwi yonsi yano uvwile, yano Baluki wawelenzile pali kalata.

¹⁴ Alino yacilolo nayo yuvwana nu kutuma Yeudi umwana wakwe Netaniya, umwizikulu wakwe Syelemiya, icizikulula cakwe Kusyi, yamutuma kuli Baluki kuti aye akamunene alete kalata wino walakuwelengela antu. Nawe Baluki ali vino acita. Atoola kalata wilya, nga alungama na kuno yacilolo yali.

¹⁵ Yacilolo nayo ali pakumunena yati, “Ikala paa, utuwelengele kalata!” Baluki nawe ali pakuyawelengela.

¹⁶ Walanga sile wamala kuyawelengela, yatandika kulolekesyanya ntete ntete. Alino yanena Baluki yati, “Umulandu uu tulinzile twaufisya ku mwene Yeoakimu.”

¹⁷ Alino yuzya Baluki yati, “Wee, situneneko, uzye walemvile uli amazwi yonsi yaa?”

¹⁸ Baluki nawe ayaasuka ati, “A Yelemiya, uwanenanga amazwi nani ali vino nayalembanga pali kalata wi ni cilembelo cane.”

¹⁹ Yacilolo ali pakunena Baluki yati, “Wemo na Yelemiya pitangini sile mukafisame. Mutezya muleke nanti wenga amanye kuno muli.”

Umwene woca kalata

²⁰ Alino lyene yaya ku mwene ku musolo wakwisano, yasya iika na kalata wilya mu muputule wakwe kalemba Elisyama, yalandila nu mwene umulandu onsi.

²¹ Umwene nawe atuma Yeudi ku kusenda kalata, nawe aya amuzana mu muputule wakwe kalemba Elisyama. Awelengela umwene na yacilolo yonsi ala iimilile umu mbali mbali.

²² Cali mu mwezi walenga fundimbali, ala nu mwene ali mwi sano lya kwikalamo mu nsita ya mapepo. Lilyo ala kuli nu moto uno umwene wotanga.

²³ Cila nsita akula Yeudi wawelenga imisilwa itatu nanti ini, umwene aputulako na kamupeni kakucembelako nga asumbila apa moto, mpaka sile kalata wensi pyu apya apa cininkwa ca moto.

²⁴ Umwene pamwi na aomvi yakwe, nanti angala yuvwile amazwi yaa yonsi, lelo yatakweti intete foo. Yatalepwile ni nsalu zyao.

²⁵ Nanti angala Elinatani, Delaya na Gemaliya yakonkomizye umwene kukana oca kalata, wene atuvwile foo.

²⁶ Lelo umwene ali pakunena Yelameeli, umwana wa mwene, Selaya umwana wakwe Azilieli nga na Syelemiya umwana wakwe Abideli kuti yakaleme kalemba Baluki na kasema Yelemiya. Lelo Yawe wayafisile.

Yelemiya walembelapo kalata muze

²⁷ Apacisila ca mwene ukoca kalata umwali amazwi yano Baluki walemvile, yano Yelemiya wamunenanga, izwi lyakwe Yawe lyafikile Yelemiya iliti,

²⁸ “Toola amapepala yauze ulembe amazwi yonsi yano yali muli kalata wakutandika, wino Yeoyakimu umwene wa ina Yuda woca.”

²⁹ Nupya pamulandu wakwe Yeoyakimu umwene wa ina Yuda, uvwange uti, “Yawe akuti watuoca kalata wii uti, ‘Icani cino walembela amazwi akuti umwene waku Babiloni aliza mu cumi, alonona impanga ii nu kuisya umwaula umuntu nanti inyama?’

³⁰ Cico kwene ali cino Yawe wavwanga pamulandu wakwe Yeoyakimu umwene waku Yuda wati, atalatala akwate umwi namuze uwakwikala pa cilimba cakwe Davidi, ni cala cakwe cilasumbwa ukunzi ku cipuki akasanya, alino nu ku mpepo usiku.

³¹ Ndamuvunuka mwensi pamwi ni mpyanyi zyakwe kumwi na aomvi yakwe pamulandu sile wa uyi wao! Aikazi amu Yelusalemu nanti amu Yuda ndayaletela amasyamo yonsi yano nasowile, pamulandu wakuti yatanguvwile.”

³² Fwandi Yelemiya ali pakutoola amapepala yauze apeela kalemba Baluki umwana wakwe Nelya. Nawe alembulula ndi muno Yelemiya wamunenyile. Alemba amazwi yonsi yano yali muli kalata wino yosile kuli Yeoyakimu, ukulundapo na mazwi aingi amu musango uli onga kwene.