Yelemiya 35 - Amazwi Yakwe Leza 2013

Yelemiya na ina Lekabu

¹ Umu manda yakwe Yeoyakimu, umwana umonsi wakwe Yosiya, umwene waku Yuda, izwi lyakwe Yawe lyafikile Yelemiya iliti,

² “Yanga ku luko lwa ina Lekabu, ulande nayo nu kuyaleta mu muputule wa Ng'anda ikulu yakwe Yawe, uyapeele na waini yamwe.”

³ Fwandi alino nkatuka injansenda Yazaniya umwana wakwe Yelemiya, umwizikulu wakwe Habaziniya na ina kumwi na ana yakwe, nga nu luko lonsi lwakwe Lekabu.

⁴ Injatwala ku ng'anda yakwe Yawe yi pepo. Naingizya mu muputule wa ana yakwe Hanani, umwana wakwe Igidaliya umuntu wakwe Leza. Nu muputule uo wali mu pipi nu muputule wa vilolo, apapela nu muputule wakwe Maseya, umwana wakwe Syalumu kalinda wa mpongolo ya ng'anda yakwe Leza.

⁵ Alino ntekela aina Lekabu inkolo zyakwe waini pamwi ni ngako, njanena inti, “Aleni mwini waini.”

⁶ Lelo yene yangasuka yati, “Awe mukwai swemo tusyamwa waini, pamulandu wakuti icikolwe citu, Yonadabu umwana wakwe Lekabu, watupile ilamulo lyakuti, cisi cakwezya kumwa waini, mwemwe na ana inu.

⁷ Mutaezya kukuula amang'anda, nanti kukomela imbezu, mutalema ivilimwa vya matingi nanti kulima vyalo. Mwaikala sile mu mataalu mu umi winu onsi apakuti muce mwikale amanda avule mu mpanga ino mwaya wa alendo.

⁸ Ali cino swemo nu kuwaka tukawaka ilamulo lilyo lya cikolwe citu Yonadabu mwana Lekabu. Tusimwa waini nanti panono, ukutandikila sile pali sweswe kwene, aci itu, nga na ana itu aonsi na anaci kwene.

⁹ Tusikuula amang'anda akwikala mwenemo. Tutakwata vyalo vya matingi nanti vyalo vyuze vyakukomelamo imbezu.

¹⁰ Tukaikala sile mu mataalu, tukawaka isunde lya cikolwe citu nu kulilondela muli vyonsi.

¹¹ Lelo lino Nebukadineza umwene waku Babiloni wizile mu kulwisya impanga, twavwanzile twati, ‘Katukini tuye ku Yelusalemu tupuuke ivita vya ina Babiloni ni vya ina Silya. Ali cino tukaikalila muno mu Yelusalemu.’ ”

¹² Alino nupya izwi lyakwe Yawe lyafikile Yelemiya, iliti,

¹³ “Yawe Wamaka yonsi, Leza wa ina Izlaeli wavwanga wati, ‘Yanga ukanene antu yakwe Yuda na ikazi amu Yelusalemu ukuti, Uzye musyakulonda kupokelela ilamulo lyane nu kuvwa izwi lyane.’ Ivyalanda Yawe.

¹⁴ Isunde lya kuntamwa waini lino Yonadabu wasilile ana yakwe likalondelwa. Pasi pano kufika na pilelo yasyamwa pamulandu wakulondela isunde lya cikolwe cao. Lelo nemuno nkumunena nu kukonkomezya sana kwaula kutonta, musinguvwa foo.

¹⁵ Kwaula nu kutonta nkamutumila lili lili aomvi yane, yakasema akamunena ukuti mufuntuke cila wenga ku nzila zinu ziipe, muzifye ni vicitwa vinu. Mutalondela tuleza tuze utuluwi nu kututumikila, pakuti muce mwikale mu mpanga ino napiile kuno muli nu ku vikolwe vinu. Lelo mwemo mutuvwile kunondi nanti panono.

¹⁶ Mulole lyene vino ana yakwe Yonadabu umwana wakwe Lekabu, yene yawaka ilamulo lino icikolwe cao cayapile. Lelo mwemo mwakanililila sile syonko ukunjela.”

¹⁷ Caleka fwandi Yawe Wamaka yonsi Leza wa ina Izlaeli wavwanga wati, “Ndaletela aina Yuda na ina Yelusalemu yonsi isyamo lino nayanenyile. Pasi pano nemo nayanenyile, lelo yakana ukunguvwa. Nayamile nayo yakana ukwaasuka.”

¹⁸ Yelemiya ali pakunena uluko lwa ina Lekabu ati, Yawe Wamaka yonsi, Leza wa ina Izlaeli wavwanga ukuti, “Pamulandu wakuti mukawaka ilamulo lya cikolwe cinu Yonadabu, mukalondela na masunde yakwe yonsi nu kucita vyonsi vino wamunenyile,

¹⁹ Yawe Wamaka yonsi, Leza wa ina Izlaeli akuti Yonadabu umwana wakwe Lekabu atalatala aulilwe umuntu wa kumutumikila.”