Yelemiya 33 - Amazwi Yakwe Leza 2013

Ulayo nauze uwa upalilo kuli Yelusalemu mupya

¹ Lino yacili yati yafungilila Yelemiya umu musolo wakwe yakalinda, izwi lyakwe Yawe lyamufikile iila lyakwe cili iliti,

² “Yawe wino waumvile insi nu kuimumunga, nu kuiteka pano ikala, wamunena wati wiyo wino akaamwa izina lyakuti Yawe, wavwanga wati,

³ We Yelemiya, ndaizya sile nani namakwasuka, namakunena ni milandu ikulu nupya iyankama ino wemo utamanya.

⁴ Apa mulandu wa mang'anda ya muno musumba, na mang'anda ya mwene uwamu Yuda, yano yomololwa apa kuicingilila kweneko umu kutulumanya umusili ukwilinga, na kuli yano yakamukatusizya inkondo, Yawe Leza wa ina Izlaeli wavwanga wati,

⁵ ‘Yakalwikanya ya antu na ina Babiloni, apa kuzuzya ivyala umu musumba, ndakomola antu yayo uku cipyu cane nu ku ukali wane, yano mfutatile apa uyi wao onsi.

⁶ Lelo ukuya kwene, intalalengela uku ututulula nu kuupozya. Ndayalwazya nu kuyapeela ulongo nu mutende ukalamba.

⁷ Ndawezezya Yuda na Yelusalemu isyuko nu kuyasimpa nupya ndi vino nacisile mpiti.

⁸ Ndayazifya ukwi ifyo ilili lyonsi lino yacisile kunondi nu kuyaelela uluse uku maifyo yonsi yano yacisile imisuli nu kunsangukila.

⁹ Alino kunondi Yelusalemu alaya izina lyaluzango, ilyalulumbi nu ucindami, umu mitundu yonsi iya pano nsi, lino yaluvwa isyuko lino ndayaletela. Nupya ilaopa nu kuzakaza, apamulandu wa usuma onsi ni cituku consi cino ndayapeela.’ ”

¹⁰ Nupya Yawe wavwanga wati, “Antu yakuti impanga ili wa mpanga muno musiikala umuntu suka sile inyama zya mpanga. Ee kwene umu cumi, umu mizi ya muno mpanga ya Yuda nu mu miseo yamu Yelusalemu, musikuloleka umuntu nanti nyama foo. Lelo ukuya kwene muluvwika nupya,

¹¹ utupundu twa nsansa nu twa luzango. Muluvwika na mazwi yakwe nawinga na siwinga. Lino antu yalaleta amawila akutaizya uku ng'anda yane, amazwi yao yalauvwika lino yakwimba ala yakuti, ‘Taizini Yawe Wamaka Yonsi, pano wene umusuma, nu luse lwakwe ulwa manda pe.’ Pasi pano impanga kwene ii nemo ndailetela isyuko ndi vino nacisile apa mpiti. Ica cumi, anene ne Yawe navwanga.”

¹² Nupya kwene Yawe Wamaka yonsi wavwanga wati, “Umu mpanga kwene ii ino icili kwati ulwanga, umu siikala umuntu nanti inyama, ala mulaya nupya umulemvwe umwakuti yace yacemelamo iviteekwa.

¹³ Nupya yakacema yalapendelamo imfwele zyao umu misumba ya mwisika lya myamba, umu misumba yaku Negebu, umu citungu cakwe Benjamini, nga nu mu misumba ino yazinguluka Yelusalemu kumwi ni misumba ya muno mpanga yamu Yuda. Ica cumi anene ne Yawe navwanga.”

¹⁴ Nalyuze kwene, Yawe wavwanzile ati, “Insita iliiza lino nemo ndafikilizya ulayo uno nalavile aina Izlaeli na ina Yuda.

¹⁵ Apa wanda kwene ulya na pa kasita kwene kaka, nemo ndaletelapo umwana uwa mpomvu umu mupanda wakwe Davidi, ali wino alalungamika ivintu vyonsi nu kucita ulungami impanga yonsi.

¹⁶ Insita iyo nga yafikila, antu aku Yuda ale yakululwa, na ina Yelusalemu ale ikala ku matwi cele. Ni zina lyao kumwi nu musumba wao ulaamwa, ‘Yawe Mukuluzi witu.’ ”

¹⁷ Apa mulandu kwene uu, nemo ne Yawe nalaya nati, “Davidi atalatala aulilwe umuntu uwakuteeka pa cilimba ca wene wa ina Izlaeli.

¹⁸ Nupya insita ili yonsi, kulaya lyonsi yasimapepo aina Levi akwimilila apa mulola wane, nu kuntuula amawila yakoca yakwe wiyo umusuma, nga ni mituulo ya vilyo pamwi na mawila yauze asyala.”

¹⁹ Alino Yawe anena Yelemiya ati,

²⁰ “Ndi wakwe vikwene vino nemo ningonona upangano wane akasanya nu usiku, apakuti akasanya nu usiku vite ukuombela apa kasita kaviko,

²¹ icili conga kwene ndi vino nemo cakana ukuti ningonona upangano wane uku muomvi wane Davidi, icakuti pataya umwana wakwe wenga uwaku pyana apa cilimba ca wene wakwe. Ali vino cakanilila kunondi icakuti ntange mpiliule upangano wane na yasimapepo aina Levi, apakuti yataombela nene.

²² Ica cumi, nemo ndavuzya wakwe cimwi ana ya muomvi wane Davidi, na yasimapepo aina Levi akumbombela icakuti apakuyapenda, cikaye sile kwati nalimwi umuntu wino akwezya ukupenda intanda zya mwiyulu nanti umusensenga uwamu nkumba yakwe yemba.”

²³ Nga nupya Yawe anena Yelemiya ati,

²⁴ “Uzye utuvwile vino antu yakulanda ukuti Yawe watasumba inko zyakwe Yuda ni zyaku Izlaeli zino waisololwelile sile umweneco? Yati yasuula antu yane, yasikuvwika apa mitundu foo!

²⁵ Ndi cakuti nemo inkana kupangana upangano na kasanya nu usiku, nu kuvipeela isunde ilyakuti insi ni iyulu vyalondela,

²⁶ ale lyene nange nsumbe yamwana Davidi, umuomvi wane. Lyene ngano nata mpiti nu kusolola amu luko lwakwe, uwakuteeka aluko lwakwe Abulaamu, Isaki na Yakobo. Pasi pano ndayawezezya isyuko lyao ilya ku katalili nu kuyayela uluse.”