Yelemiya 32 - Amazwi Yakwe Leza 2013

Yelemiya wakala icalo

¹ Izwi lyakwe Yawe lyafikile kasema Yelemiya, umu mwaka walenga ikumi wa kuteeka kwakwe Zedekiya umwene waku Yuda, uno wali umwaka walenga ikumi na cinani uwa wene wakwe Nebukadineza.

² Alino ivita vya mwene waku Babiloni vyazingulwike Yelusalemu na kasema Yelemiya nawe wafungililwe mu musolo wakwe yakalinda, lwakwi sano lya mwene wa ina Yuda

³ Lyene ali muno Zedekiya umwene waku Yuda wamuyalile nu kumunena ukuti cani cino ukusema ukupelwa kwa musumba uu mu makasa ya mwene waku Babiloni?

⁴ Ulunda nu kuti Zedekiya nawe kwene umwene waku Yuda atalapusuka mu maka ya ina Babiloni. Wene alasumbwa sile mu makasa ya mwene waku Babiloni. Alalanda nawe amanso na manso.

⁵ Nupya alasenda Zedekiya ku Babiloni, ali kuno alasyala mpaka nkize nkamupempule, ivyalanda Yawe. Ndi cakuti mwalwisya aina Babiloni, pasi cino mulatumbula.

⁶ Yelemiya nawe pali pakwasuka ati, “Yawe wavwanzile kunondi ati,

⁷ ‘Lola Hanameli umunyonko, mwana so umukalamba Syalumu, aliza akunene kuti ukale icalo cakwe caku Anatoti, pano awewe sile ukweti insambu ya kucikala nu kucikulula.

⁸ Awe na cendi ndi muno Yawe wavwangile umwinane Hanameli wizile kunodi mu musolo wakwe yakalinda, wiza wanena kuti inkale icalo cakwe caku Anatoti, pano nene nkweti sile insambu ya kucikala nu kucikombola. Nani ali pakwiluka ukuti uli mulandu ulya uno Yawe wankonkomizye.

⁹ Fwandi avino nakazile icalo caku Anatoti ku mwinane Hanameli. Namulipila ni mpiya zyakwe siluva ikumi na cinimbali.

¹⁰ Ali vino nalemvile umulandu uu uwa kukala icalo namupeela na kalata wa umboni, nafwantapo ni nsimbi. Nalonda yakambone, namupendela ni mpiya namupeela nu kumupeela.

¹¹ Alino ukulingana ni sunde lya mbila, natola kalata uwa kukalilapo icalo, umufwantwe ni nsimbi, pamwi na kalata asi mufwantwepo insimbi.

¹² Lyene mvipeela kuli Baluki, umwana wakwe Nelya, mwizikulu Maaseya, pa manso ya muvyala wane Hanameli na yakambone yano yalemvile amazina yao muli kalata, na pa manso ya Ayuda yonsi yano yali mu musolo wakwe yakalinda.’ ”

¹³ Nanena Baluki apa manso yao nati,

¹⁴ “Tola yakalata yaa, kalata wakukalilapo icalo wino afwansilwepo insimbi pamwi na kalata asi mufwantwepo insimbi, uyaike mu nyungu apakuti yakasungwe pa nsita ntali.

¹⁵ Pano Yawe Wamaka yonsi, Leza wa ina Izlaeli wavwanga wati, ‘Umu mpanga ii, antu yalakala nupya amang'anda, ivyalo ni miyanda ya matingi.’ ”

Yelemiya wapapata kuli Leza

¹⁶ Apacisila cakupeela Baluki, mwana Nelya, kalata wakukalilapo icalo, alino lyene napefile inti,

¹⁷ “Yawe Simwandalali, wemuno wapanzile amayulu ni nsi, umu kukonzolola ikasa lyako lya maka, kutaya nati cimwi icakuposya.

¹⁸ Ukayela antu amazimbi na mazimbi uluse, lelo ukalandula wakwe cimwi ku ana amufulo pa uyi wa vikolwe vyao. We Leza mukulu Wamaka, Yawe Wamaka yonsi ali zina lyako.

¹⁹ Kunuli wakula wakwe cimwi mu vicitwa vyako. Ala wewe musambazi mu vicitwa vyako vyonsi.

²⁰ Awewe wacisile ivimanyililo ni vipezyamano mu mpanga ya Eguputo nupya avino ukacita ukufika na pali ndakai mu ina Izlaeli nu mu antu yonsi. Wailonkela izina lino ukweti apilelo.

²¹ Wafumizye umutundu wako wa ina Izlaeli mu mpanga ya Eguputo, umu vimanyililo nu ku vipezyamano, apakutambalika ikasa lyako lyamaka ni ngofyo zikulu.

²² Nupya wayapile impanga ii ino walavile ku vikolwe vyao apakulapa umulapo, impanga muno mukavovomoka iziya nu uci.

²³ Nayo ali vino yingile mwenemo nu kuipoka. Lelo yakana ukuyela amazwi yako nu kulondela amasunde yako. Yatacisile nanti conga pali vino wayanenyile. Caleka walesile ukuti uyi onsi uyaponele.

²⁴ “Mwalola lyene, vino yatiyatuntumalika umusili ukufika nu ku musumba, apakuti yaupoke. Inkondo, icipowe ni mpungo vimapela umusumba mu makasa ya ina Babiloni yano yakuuzanza. Cino wasowile cafikila nu kuilolela watuilolela wenga.

²⁵ Lelo kwene we Yawe Simwandalali, awewe wanenyile uti, ‘Kala icalo ni mpiya apa manso yakwe yakambone, nupya umusumba wapelwa mu makasa ya ina Babiloni!’ ”

²⁶ Nga alino lyene izwi lyakwe Yawe lyamfikile lyati,

²⁷ “Lola, nene Yawe wa antu yonsi, uzye kwaya cino camposya?

²⁸ Fwandi vii ivyalanda Yawe, nasya mpeele umusumba uu mu makasa yakwe Nebukadineza umwene waku Babiloni, wiyo aamaupoka.

²⁹ Nupya aina Babiloni, yano yakulwisya umusumba uu, yamaiza yawoce kumwi na mang'anda, yano yocelanga Baali ubani apa mapaala yao pakunsosya umwenzo, alino na pakutuulila tuleza tuze ivya wila ivili wa vyakumwa.

³⁰ Pano aina Izlaeli na ina Yuda ukutandikila sile ku mpiti yakacita sile vino nsyalonda. Cumi cumi aina Izlaeli yakamvulumwila sile icipyu uku vicitwa vya minwe yao.” Ivyalanda Yawe.

³¹ Umusumba kwene uu nao ukandetela sile icipyu nu ukali ukutandikila sile pano yaukuulile mpaka na pilelo. Ali cino namaufumya pa manso yane,

³² apamulandu nu uyi wa ina Izlaeli na ina Yuda uno yansosizye umwenzo, aeneco kwene, yamwene yao, intunguluzi zyao, yasimapepo yao, yakasema yao, nga na antu amu mpanga yakwe Yuda na ikala muzi amu Yelusalemu.

³³ Nanti angala yayasambilizyanga umute ukwaula nu ukasu, yatali akuuvwa nu kupokelela isunde lyane. Yamfutatila, yakana nu kundolekesya.

³⁴ Nanti umu ng'anda ikulu ya mapepo, ino ikaamilwa umwi zina lyane, iika mwenemo ivintu vimwi vyakuzunguka vyamankowezya.

³⁵ Yakuuzile ni ncende ya kupepela mwenemo Baali mu cifoloma ca Beni Hinomu, apakuti amuno yacindikila Moleki, umukupisya ana yao anaci na onsi umu moto. Icintu cimwi cico cino ntatazile njanene, cino citatazile cize nu ku mano yane kuti yangacita iviipe vya mwata ndi uu nu kulenga aina Yuda ukwifya.

Upangano upya uwa utailo ulaletwa na Leza

³⁶ Caleka fwandi, apamulandu nu musumba uno mukati inkondo ni cipowe ni mpungo vilauponela, nu kusumbwa mu makasa ya ina Babiloni, Yawe Leza wa ina Izlaeli wavwanga wati,

³⁷ “Lolini, ndayakolonganika ukufuma ku mpanga zyuze kuno nayazingile cipyu cipyu, umu ukali wane nu kusoka kwane wakwe cimwi. Ndayawezezya uku ncende kwene ii, muno yalikala usaka.

³⁸ Alino lyene yalaya umutundu wane, nani ndaya Leza wao.

³⁹ Ndayapeela umwenzo uze upya, ni mipitile yuze iipya apakuti yace yangopa, nga lyonsi cice cayazipila alio kwene na ana yao aalalondelela pacisila cao.

⁴⁰ Ndapangana nayo upangano wa pee uwakuti ntalatala inte ukuyacitila ivizipe, ndiika ni coopo ca koopa umu myenzo yao, apakuti yatakantaluke nupya.

⁴¹ Ndatemwa ukuyacitila ivisuma, ndayalema umu mpanga kwene ii, uku mwenzo wane onsi nu ku mupasi wane onsi.”

⁴² Pano Yawe wavwanga wati, “Vino naletile umutundu uu ulanda ukulu onsi uu, ali vino ndayaletela ivisuma vyonsi vino nayalaya.

⁴³ Alino antu yalakala ivyalo mu mpanga mukasi. Ulwanga umusiikala umuntu nanti inyama, cati cisumbwa mu makasa ya ina Babiloni.

⁴⁴ Umu mpanga yakwe Benjamini, umu mbali yakwe Yelusalemu, mu misumba yakwe Yuda, mu misumba yamu myamba, mu misumba yaku uwondaka, mwisika lya myamba yaku Negebu, monsi yalakalamo ivyalo ni mpiya. Yalalemba amakalata akukalilamo ivyalo nu kuyamatilizya mu nyungu apa manso yakwe yakambone. Pano lyene ndayawezezya isyuko lyao.” Ivyalanda Yawe.