Yelemiya 31 - Amazwi Yakwe Leza 2013

Kuwela kwakwe Izlaeli

¹ Yawe wavwanga wati, “Mu manda yalya ndaya Leza wa nko zyonsi zyakwe Izlaeli, nazyo zilaya antu yane.”

² Yawe wavwanga wati, “Umutundu uno wasyala impondo ulalola uluse mu lwanga. Izlaeli amapelwa kupuza.”

³ Yawe watulolekile ukutali ati, “Namutemwa citemwiko camuntasila ali cino nemo natwalilila nu kumucitila uluse lyonsi.

⁴ Namakukuula nupya, umakuulwa nalyuze we nacisungu wane Izlaeli. Ulaiyemvya nupya. Ulatola nu tungoma twako nu kucina ni nsansa pamwi na yayo atiyasansamuka.

⁵ Ulalema nupya amatingi, pa myamba yaku Samaliya. Alimi nayo yalalema nu kulya iviseekwa vyakweyo.

⁶ Pano uwanda uliza lino yakalinda yalapunda pa myamba yakwe Efulemu yati, ‘Katwapita ku Zioni kuli Yawe Leza witu.’ ”

⁷ Pano Yawe wavwanga wati, “Imbilini Yakobo nu luzango, mumilini tupundu twa nsansa. Zangilini ntunguluzi ya mitundu. Pongomokini, lumbanyini, mupunde muti, ‘Yawe watakulula antu yakwe, impondo zyakwe Izlaeli.’

⁸ Silola, ndayawezya ukufuma ku kayeya, ndayakolonganika kufuma ku mpela zya pano nsi. Yonsi pyu impafu ni vilema, umwanaci anyomelile na wino ali pakulela, yonsi yalaweluluka kuno wi umba lino litaikulila.

⁹ Apa kupita yapisile ala yakulila. Lelo ndayamyalalika pa kuweluluka. Ndayatungulula ku nguzi zya manzi, umu nzila itambalale, muno yatalapumika foo, pano anene ndi isi wakwe Izlaeli na Efulemu ali yeli lyane.

¹⁰ “Mwe mitundu yonsi, uvwini amazwi yakwe Yawe. Mulandile na antu yonsi aikala ku nkumba zyakwe yemba ukutali. Wino wasalanganyizizye aina Izlaeli, awino wayakolonganika nupya aliwe amayasunga ndi vino kacema akawaka ufyo wakwe.

¹¹ Pano Yawe watakulula Yakobo nu kumupususya ku makasa yakwe wiyo uwamuluta amaka.

¹² Yaliza apa Mwamba wa Zioni, nu kulaizya ni nsansa, yalutukila ku visuma vyakwe Yawe, ivili wa ngano, waini, amafuta, imfwele ni ng'ombe. Umwenzo wao ulakola icalo cikontelelwe, yataluvwa ulanda.

¹³ Alino umukazyana alasansamuka pa kucina, alumendo na akote yalazangila kumwi. Ndasangula ukulosya kwao insansa, ndamyalalika imyenzo yao. Apa ulanda wao ndausenula uye uluzango.

¹⁴ Indimula yasimapepo ni vinone, umutundu wane ulikuta ku visuma vyane.” Ivyalanda Yawe.

Uluse lwakwe Yawe pali Izlaeli

¹⁵ Yawe wavwanga wati kutikini kwi zwi ukufuma ku Lama, likulilizika nu kuilizyanya wakwe cimwi. Lakeli akulilila ana yakwe, akukana nu kutekeziwa pano yonsi yasendwa.

¹⁶ Yawe wavwanga wati, “Lesya izwi lyako ukulosya na manso yako ukuponya aminsozi, ni vipa vyako vitezya vitipasye aminsozi. Vyonsi vino wacitile ana yako ulalambwilwapo. Yene yalaweluluka ukufuma ku mpanga ya anisi yao.” Ivyalanda Yawe.

¹⁷ “Ana yako yaye nu utailo, ana yako yalaweluluka ku mpanga yakumwao.” Ivyalanda ne Yawe.

¹⁸ “Inuvwa, Efulemu wino akulila ulanda ati, ‘Wankalipila, nakalipilwa wa kana ka ng'ombe kacintuvwa. Sungala umbwezye, uleke mbwele, pano awewe kwene uli Yawe Leza wane.

¹⁹ Nakusangukila, lelo lyene natinzenzuka. Nintezya, nkuyuma na pa cifuwa. Ni nsonyi zyandema nu kuzewana, muzewanya wa wance uli pali nene.’

²⁰ “Uzye Efulemu ali mwanane umukundwe? Uzye wii ali mwanane wino natemwa? Pasi pano kwene nkamwiusya lyonsi sile, nkamukalipila. Ali cino lyonsi nkamuluuka mu mwenzo wane nu kumuyela uluse.” Ivyalanda ne Yawe.

²¹ Simpa ivipampa ivyakulangilila inzila, uike nu lukomelo. Iusya ningo inzila muno wapisile. Siwela we mukazyana nacisungu, we Izlaeli. Welulukila ku misumba yako, ii.

²² Uzye ulazingota mpaka lilaci, we mwanaci mutalami? Pano Yawe watacita icintu cipya panonsi. Aeci cakuti umwanaci wataswilila kuli iya.

Upolelelo ulizila antu yakwe Leza

²³ Yawe Wamaka yonsi, Leza wa ina Izlaeli wavwanga wati, “Lino ndayawezezya isyuko lyao, alino yalaswilizya ukuvwanga umu mpanga yakwe Yuda nu mu misumba yao yati, ‘Yawe kapuute ulutembo pali wewe, we cifulo caulungami, we mwamba ucindami!’ ”

²⁴ Yuda ni misumba yakwe yonsi, alimi na yano yakazeuluka na maufyo ya viteekwa, yalikala mu mpanga kwene ii.

²⁵ Pano ndimula umwenzo utovoke, ndikusya nu mwenzo onsi uno ukucula.

²⁶ Ali cino ninkatuka, nimbwezya amaka, nindala usaka.

²⁷ Lolini, insita iliiza, ivyalanda ne Yawe, lino ndatovya mu ng'anda yakwe Yuda imbezu zya antu ni mbezu zya viteekwa.

²⁸ Wakwe vino nkulolelanga ukwipa, apa kuwisya, apakuongolola, apakonona na pa kuleta ulanda, ali vino ndakolelela ukukuula na pa kulima. Ivyalanda Yawe.

²⁹ “Umu manda yalya yalata ukuvwanga yati, ‘Yaisi yalile amatingi aisi, amino ya ana yao uwizila wayalema.’

³⁰ Pano ali wensi alafwa pamulandu wa uyi wakwe umweneco. Wensi wino alalya amatingi aisi, uwizila ulamulema.”

³¹ Yawe wavwanga wati, “Amanda yaliza lino ndapangana upangano upya na ang'anda yakwe Izlaeli na Yuda.

³² Citalaya wa upangano uno napangine ni vikolwe vyao uwanda uno nayalemile pi kasa nu kuyafumya mu mpanga ya Eguputo. Yene yasuzile upangano wane. Ali cino nali nu kuyalanga ndi vino nene ndi ciinda wao. Ivyalanda Yawe.

³³ Upangano uno ndapangana na ang'anda yakwe Izlaeli, amanda ndi yapita ali uu: indika amasunde yane mu nda zyao, ndayalembela nu mu myenzo yao. Ndaya Leza wao, nayo yalaya antu yane.

³⁴ Alino kutalaya nu kusundana foo. Umwi atalanena umuze nanti umwina ukuti amanye Leza, pano yalamumanya yonsi pyu ukutandikila ku mucepesye ukufika nu ku asambazi kwene. Pasi pano ndayayela uluse ku maifyo yao. Ntalatala nupya niusye amaifyo yao.” Ivyalanda Yawe.

³⁵ “Yawe aliwe akawazya ilanzi apakuti liwale mu nsita yakasanya. Alino umwezi ni ntanda navyo apa nsita ya usiku. Aliwe akasunkanya na yemba nu kuponya amaimbi. A Yawe Wamaka yonsi ali zina lyakwe.

³⁶ Ivipope vino natantika ndi vyafuma pa manso yane, ale uluko lwa ina Izlaeli nalo kwene lwalowa, lwata ukuya umutundu wane.” Ivyalanda ne Yawe.

³⁷ “Apakusumba uluko lonsi lwa ina Izlaeli apamulandu wa vintu vyonsi vino lwacita, suka sile namanye amayulu yatala yapimwa, na pa simpwa insi yonsi napo patala papimwa.” Ivyalanda Yawe.

Yelusalemu mupya

³⁸ “Insita iliiza lino umusumba wakwe Yawe ulakuulwa nupya, ukutandikila sile ku Lupungu lwa Hananeli, ukufika nu ku Mpongolo ya Pitungi.

³⁹ Nu mwando wakupimilako ulalungama ku kamwamba ka Galebu ukusenukila ku Gowa.

⁴⁰ Nupya Cifoloma consi ca vyala ni twi muno vikasumbilwa ni vyalo vyonsi ukufika nu ku kaluzi ka Kiduloni lwaku ufumondaka, ukufika sile nu ku mpongolo ya mfwalasi, vilatuulwa kuli Yawe. Vitalatala vyononeke nanti ukomololwa.”