Yelemiya 29 - Amazwi Yakwe Leza 2013

Yelemiya walembela azya Ayuda kalata uku Babiloni

¹ Yaa ali mazwi yano kasema Yelemiya walemvile muli kalata wino watumile kuli yasimapepo, yakasema, intunguluzi zya antu nga nuku antu yonsi yano Nebukadineza wafumizye umu Yelusalemu nu kuyasenda ku uzya uku Babiloni.

² Cali apacisila ca nsita ino umwene Yeoyakini na nyina, namwene, ivilolo ni ntunguluzi zyaku Yuda nu mu Yelusalemu, yamfundi na yamusyanyi yafumile umu Yelusalemu nu kusendwa uzya.

³ Yano napiile kalata wii kuti yamusende a Elasa umwana wakwe Syafani na Gemaliya umwana wakwe Hilikiya, yano Zedekiya umwene waku Yuda watumile uku Babiloni kuli Nebukadineza, umwene waku Babiloni. Amazwi yano yali muli kalata yali ndi vii.

⁴ “Yawe Wamaka yonsi, Leza wa ina Izlaeli wanena antu yonsi yano wafumizye umu Yelusalemu apakuyatwala uku Babiloni uku uzya wati;

⁵ Kuulini amang'anda nu kwikala mwenemo. Limini ivyalo mulye ni vyakulya ivyaya mwenemo.

⁶ Twalanini muvyale ana yakalume na yakaci. Mulondele ana yinu aci yampomvu, apakuti yakavyalemo ana aonsi na anaci, muce musanduluke kuko kwene mutakacepe foo.

⁷ Nupya mwasumbisya amano uku vintu ivyakuzipila impanga ino namutwala mwenemo mu uzya. Mwalengela impanga iyo kuli Yawe. Pano ndi cakuti yakwata isyuko namwe kwene mulaya nu longo.”

⁸ Pano Yawe Wamaka yonsi, Leza wa ina Izlaeli wavwanga wati, “Mutaleka yamusombe kuli yakasema na yakasapoola yano yikala kuno muli, mutakakutika ku viloto vyao.

⁹ Pano yene yakamusemela ivyaufi mwi zina lyane. Asi nene nayatuma foo.” Ivyalanda Yawe.

¹⁰ “Nupya Yawe wavwanga wati suka sile imyaka amakumi cinimbali ino yamupimila ku Babiloni ice isile, alino ndiza mupempule. Ndafikilizya nu ulayo uno nalavile apakumuwezezya umu ncende ii.

¹¹ Pano nimanya vino mpanzile ukucita pamulandu namwe, ivyalanda Yawe. Napanga ukumuletela ulongo asi syamo foo. Ukumuletela utailo ni syuko likalamba.

¹² Alino lyene mulampunda nu kumpapata, nga nani ndamuvwa.

¹³ Lino mwandonda mulanzana, cikulu sile mwandonda ni myenzo inu yonsi.

¹⁴ Ndaleka ukuti munzane, ndamuwezezya ni syuko lyampiti. Ndamukolonganika, apakumufumya mu mitundu yonsi nu mu ncende zyonsi muno namusalanganyizizye.” Ivyalanda Yawe.

¹⁵ Mwemo mukati, “Yawe watupeela yakasema umu Babiloni.

¹⁶ Lelo muvwe vino Yawe akalanda pa mwene uwakuteeka apa cilimba cakwe Davidi na pa antu yonsi aikala mu musumba uu, yayo anyonko yano yatapisile namwe uku uzya.”

¹⁷ Yawe Wamaka yonsi, wavwanga wati, “Ndayakatusizya inkondo, icipowe ni mpungo, nupya ndayacita wa masamvu aole aipisye cakuti kusi umwi wino angayalya.

¹⁸ Ndayazinganya nu lupanga, ni cipowe nga ni mpungo. Ndayaletela intete ni ngofyo uku wene uli onsi wa pano nsi. Yalaya antu yamwi atipwe, akuwelwa nupya azewane mu mitundu yonsi muno nayasalanganyizizye.

¹⁹ Pano yene yakana ukuvwa amazwi yane, nanti angala ntatazile inte ukuyatumila aomvi yane yakasema. Yakananga ukuyuvwa.” Ivyalanda Yawe.

²⁰ Ali cino fwandi mwemo mwe muno natumile uku uzya, mwensi mwemuno nafumizye mu Yelusalemu nu kumutwala ku Babiloni, mule munguvwe.

²¹ Yawe Wamaka yonsi, Leza wa ina Izlaeli walanda pamulandu wakwe Aabu umwana wakwe Kolaiya na Zedekiya umwana wakwe Maaseya, yano yakasema vyaufi mwi zina lyakwe, wavwanga wati, “Ndayapeela mu makasa yakwe Nebukadineza umwene waku Babiloni. Nawe alayakoma, nu kuilolela mulailolela mwe eneco.

²² Apamulandu wakwe alio kwene azya yonsi ukufuma ku Yuda, yano yali ku Babiloni yalaomvya intipu zi syamo lyao, zyakuti Yawe angala akucitile vino wacitile Zedekiya na Aabu, yano mwene waku Babiloni wasalwile apuma pa moto!

²³ Fwandi vivyo iviliizila yakacita ya muzewanya mu Izlaeli, yano yakacita ulenzyo na yamuka eneco, yano yakalandila mwi zina lyane nanti ntayatumile. Lelo namanya ukuti nene kambone kuli cico.” Ivyalanda Yawe.

Kalata kuli Syemaiya

²⁴ Munene Syemaiya waku Neelamu muti,

²⁵ Yawe Wamaka yonsi, Leza wa ina Izlaeli, walanda ukuti waitandikile sile wenga ukutuma kalata ku antu aku Yelusalemu kuli simapepo Zefaniya umwana wakwe Maseya, na kuli yasimapepo yonsi. Wavwanzile kuli Zefaniya simapepo uti,

²⁶ “Yawe wakusolwile wewe ukuya simapepo apa cifulo cakwe Yeoyada apakuti waangalila ing'anda yakwe Yawe, nu kuti unganyepa cipena wensi mu minyololo wiyo uwaituntumba ukuya wakwe kasema.

²⁷ Uzye fwandi icani cino wemo utanyepela Yelemiya waku Anatoti, wino akasema kuno muli?

²⁸ Nupya watumile ku Babiloni amazwi akuti, ‘Uzya winu utalatwalilila. Kuulini amang'anda inu akuti mwaikala mwenemo, mulime ni vyalo vyakuti mwalya mwenemo ivyakulya.’ ”

²⁹ Simapepo Zefaniya awelengela kasema Yelemiya kalata wii.

³⁰ Alino Yawe anena ne Yelemiya, ati,

³¹ “Tumila azya yonsi amazwi yano yakumile Syemaya umwina Neelamu ukuti Yawe wavwanga wati, ‘Apamulandu wakuti Syemaya wamupolelela nu usemo wakwe nanti angala ntamutumile, lyene nawe watamulenga ukuzumila intumpu.

³² Fwandi lyene namafulula Syemaya umwina Neelamu kumwi na akazi kakwe. Apa antu yakwe Aonsi patalasyala nanti wenga mu mutundu uu, wino alikala umupuma nu kulola isyuko lino ndapeela ku mutundu wane. Pasi pano wene wasambilizya antu vya kutalamila Yawe.’” Ivyalanda Yawe.