Yelemiya 28 - Amazwi Yakwe Leza 2013

Yelemiya na Hananiya kasema waufi

¹ Mu mwaka kwene uo, pakutandikila sile kwa wene wakwe Zedekiya umwene waku Yuda, umu mwezi walenga isano wa mwaka wakwe cini, kasema Hananiya umwana wakwe Azuli umwina Gibyoni, wavwanzile kunondi ne Yelemiya mu ng'anda yakwe Yawe. Cali apa manso yakwe yasimapepo na antu yonsi ati,

² “Yawe Wamaka yonsi Leza wa ina Izlaeli akuti ninkontola ikoli lya mwene waku Babiloni.

³ Pasikupita imyaka iili ale nawezezya iviya ku ncende ii, vyamu ng'anda ikulu ya mapepo vino Nebukadineza umwene waku Babiloni wafumizye mu ng'anda ii nu kutwala ku Babiloni.

⁴ Ndawezya na Yeoyakini umwana wakwe Yeoyakimu umwene waku Yuda nga na azya yonsi aku Yuda yano yasenzilwe ku Babiloni. Ndakontola iyoko lya mwene waku Babiloni.” Ivyalanda Yawe.

⁵ Nga alino lyene apa manso yakwe yasimapepo na antu yonsi inaasuka Hananiya mu ng'anda yakwe Yawe inti, kaciye vivyo kwene!

⁶ Kale acite muno atemilwe, Yawe ace afikilizye amazwi yano nalinasema, asuke ace awezezye kuno iviya vya mu ng'anda yakwe Yawe na azya yonsi yano yaya mu Babiloni.

⁷ Lelo wange utale uvwe vino nkukunena na vino nkulanda ku antu.

⁸ Yakasema yonsi yano yatukolelile, wewe nani, yasowile ukufuma ku mpiti inkondo, inzala ni mpungo, ivyakwizila impanga izingi na yamwene akalamba.

⁹ Lelo kasema wiyo wino akasema ivyalongo wamanyika ukuti watumwa mu cumi kuli Yawe, lino amazwi yakwe yafikiliziwa.

¹⁰ Kasema Hananiya ali pakutoola ikoli pa nsingo yane ne Yelemiya, walikontola nu kulikontola.

¹¹ Alino lyene Hananiya avwanga ku antu ati, “Yawe watavwanga ndi vino vivyo vino mwalola ali vino pasikupita imyaka iili ale watavunola ikoli lino Nebukadineza umwene waku Babiloni wikila imitundu.”

¹² Papisile sile kasita kanono pano kasema Hananiya wakontolwile ikoli lino Yelemiya wazwite mu nsingo, ni zwi lifika kuli Yelemiya lyakuti,

¹³ “Pitanga yanga kanene Hananiya ndi vino amakoli yano watavunola avimiti sile, lelo yamapyanikiziwa na makoli ya vyela.

¹⁴ Yawe Wamaka yonsi, Leza wakwe Izlaeli watavwanga ndi vino amakulika amakoli yavyela ku mitundu ii yonsi, nu kuti yatumikila umwene Nebukadineza waku Babiloni. Watavwanga nu kuti alaleka inyama zya mpanga nazyo kwene zyamutumikila.”

¹⁵ Kasema Yelemiya ali pakuya kuli Hananiya nu kumunena ati, “We yame! Ala Yawe asi awino wakutuma foo, nupya waleka antu yataila vyaufi kunuli.

¹⁶ Caleka fwandi Yawe umweneco kwene amakufumya panonsi, umafwa umwaka kwene uu pano watusambilizya antu ivyakutalamila Yawe.”

¹⁷ Nacendi, umwaka kwene ulya umwezi walenga cinimbali kasema Hananiya, afwa.