Yelemiya 27 - Amazwi Yakwe Leza 2013

Yelemiya wazwala ikoli lyakwe masaye

¹ Apacisila sile ca kulasika Zedekiya umwana wakwe Yosiya, pa cilimba ca wene waku Yuda, izwi lyakwe Yawe lyafikile Yelemiya lyakuti,

² Yawe wavwanga wati, “Pyata umwando nu kupanga ikoli, ulikoweke mu nsingo yako.

³ Alino lyene utume izwi ku mwene waku Edomu, ku mwene waku Moabu, ku mwene waku Amoni, ku mwene waku Tuli nga nu ku mwene waku Sidoni, ukupitila mu nkombe zyao, izyaya ku Yelusalemu. Nga na kuli Zedekiya umwene waku Yuda.

⁴ Uzitume ku asambazi yao ukuti Yawe Wamaka yonsi, Leza wa ina Izlaeli wavwanga wati, ‘Munene asambazi inu muti,

⁵ “Uku maka yane ataikulila, na pakukonzolola ikasa lyane apa kuumba antu, impanga ni myamba ya pano nsi nu kupeela nkapeela wino natemwa.

⁶ Fwandi lyene apa kasita kaa namapeela impanga zyonsi zii ku muomvi wane Nebukadineza, umwene waku Babiloni. Namupeela ni nyama zya mpanga ukuti zyamuuvwila.

⁷ Imitundu yonsi lyene ili nu kumutumikila aliwe, umwana wakwe nu mwizikulu wakwe, mpaka insita ya mpanga yakwe nayo ice ifikile lino imitundu yuze ikulu ilamuluta amaka nu kumucita umuzya.

⁸ Umutundu nanti uwene uno utalatumikila Nebukadineza umwene waku Babiloni, uno utalacimbila umwene waku Babiloni, ndaukomola ku lupanga, ku cipowe nu ku mpungo. Avino Yawe walanda. Suka sile ace aulovye ku minwe yakwe.

⁹ Fwandi, mutezya mwauvwa kuli yakasema inu, kuli yakasapoola inu, kuli yakalota yaviloto, kuli yakapendola na kuli yasing'anga inu yano yakamunena ukuti mutakatumikile umwene waku Babiloni.

¹⁰ Pano yene yakamusemela sile ivyaufi nu kuleka ukuti yamuzinge umu mpanga inu. Ala nemo ndamuzinga, mulalowa.

¹¹ Lelo umutundu onsi uno ulika insingo mwi koli lya mwene waku Babiloni nu kumutumikila, ndaleka yasyale umutende mu mpanga yao nu kulimamo nga nu kwikala umutende. Ivyalanda Yawe.”’”

¹² Na Zedekiya kwene umwene waku Yuda namunenyile icili conga kwene inti, “Ingizini insingo zinu mwi koli lya mwene waku Babiloni kumwi na antu yakwe kwene yano mukacimbila, nga muce mulole ukupususya uumi.

¹³ Uzye pacani fwandi cino wemo na antu yako mungafwa ku lupanga, ku cipowe nga nu ku mpungo ndi vino Yawe walaya ukuletela umutundu onsi uno utacimbile umwene waku Babiloni.”

¹⁴ Mutauvwa kuli yakasema yano yakumunena yati, “Mutatumikila umwene waku Babiloni, pano yene yakamusemela sile vyaufi.

¹⁵ Pano asi nene nayatuma foo, ivyalanda Yawe. Lelo yene yakasema ivyaufi umwi zina lyane. Icilalenga nu kuti imuzinge muce mulowelele kumwi na yakasema kwene yayo.”

¹⁶ Alino lyene inena yasimapepo nu mutundu uo onsi inti, “Yawe wavwanga wati mutuvwa ku mazwi yakwe yakasema inu yano yakamusemela ukuti iviya vyamu Ng'anda ikulu yakwe Leza vyasya vice viweluluke ukufuma ku Babiloni. Ala yakasema yaa yakamusemela sile ivyaufi.

¹⁷ Mutaciyuvwila, mwemo mwaombela sile umwene waku Babiloni pakuti mwikale nu umi. Uzye pacani cino umusumba uu ungasangukila ulwanga?

¹⁸ Iyaya ayakasema yampomvu ni zwi lyakwe Yawe likala kunoyali, ngano yakapapatila kuli Yawe Wamaka yonsi apakuti iviya vino vyasyala mu ng'anda yakwe Yawe, nu mu ng'anda ya mwene wa ina Yuda nu mu Yelusalemu, vitaca visendwe ku Babiloni.

¹⁹ Pano Yawe Wamaka yonsi wavwanga pamulandu wa ncesi, pamulandu wa vifula, pamulandu wa vyakutendekelapo iviya, alino na pa viya ivili vyonsi vyasyala vino vyaya muno mu musumba.”

²⁰ Vivyo vyonsi vino Nebukadineza umwene waku Babiloni atasenzile, lino wavifumizye mu Yelusalemu nu kuvitwala ku Babiloni mu uzya, pamwi na asambazi yakwe yonsi ali mu Yuda nga nu mu Yelusalemu, umwali na Yeoyakini umwana wakwe Yeoyakimu umwene waku Yuda.

²¹ Fwandi mulandu wa viya vyasyala mu ng'anda yakwe Yawe alino nu mu ng'anda ya mwene waku Yuda nu mu Yelusalemu, Yawe Wamaka yonsi, Leza wa ina Izlaeli wati,

²² “Vilasendwa uku Babiloni, ali kuno vilasyala mpaka nu wanda uno ndavitola mviwezye kuno.” Ivyalanda Yawe.