Yelemiya 26 - Amazwi Yakwe Leza 2013

Yelemiya walemwa nu kuletwa ku cilye

¹ Apacisila sile cakwe Yeoyakimu umwana wakwe Yosiya ukulasikwa pa cilimba ca wene waku Yuda, izwi lyakwe Yawe lyamfikile ne Yelemiya lyakuti,

² “Imilila mu musolo wa ng'anda ya Mwene nu kuvwanga vino ninkunena ku antu yano yafuma mu misumba yaku Yuda, nu kwiza kuno ku kupepa. Utasya nanti conga pa kuyanena.

³ Limwi yangasuka yuvwe nu kuta imisango yao iipe. Nani namasuka njatezele api syamo lino napingula kuyaletela pa vicitwa vyao iviipe.”

⁴ Yawe wanena ukuti inene antu inti, “Anene ne Yawe navwanga ukuti yalinzile yalondele amasunde yano namupiile,

⁵ nu kusumba amano ku mazwi ya aomvi yane yakasema yano nsi tonta ukumutumila. Lelo mwemo musitala muvwa vino yakumunena.

⁶ Ndi cakuti mwatwalilila ukukanayuvwila, lyene ndacitila Ng'anda ikulu ndi vino nacisile ku Syilo. Alino imitundu yonsi ya muno nsi yalaomvya izina lya musumba uu uwa ntipu.”

⁷ Yasimapepo, yakasema nga na yonsi yuvwile kuno nkulanda vii mu Ng'anda ikulu yakwe Leza.

⁸ Walanga lino namala kulanda vyonsi vino Yawe wanenyile kunena antu, yasimapepo, yakasema na antu yonsi yandemile nu kunena yati, “Kuufwe!

⁹ Uzye pacani cino wasemela mwi zina lyakwe Yawe ukuti Ng'anda ino ikulu yakwe Leza ilaya waku Syilo, nu musumba uu ulasanguka wa lwanga umutanga mwikale umuntu?” Lyene antu yonsi yaunganila Yelemiya.

¹⁰ Walanga intunguluzi zya Ayuda zyuvwa umulandu, zyakalawike ukufuma kwi sano, nu mu ng'anda yakwe Yawe, yaya yikala ku wingililo, apa mpongolo ipya ya Ng'anda ikulu yakwe Yawe.

¹¹ Nga alino yasimapepo na yakasema yanena intunguluzi zya antu yati, “Umuntu wii alingine sile ukufwa, pano watasema ilovyo ku musumba ndi vino mwatimuyuvwila ku matwi inu.”

¹² Nawe Yelemiya panoli aasuka intunguluzi na antu yonsi ati, “Uwatantuma ukusema apa ng'anda ii na pa musumba uu amazwi yano mwatimuvwa, a Yawe.

¹³ Ali cino fwandi mwemo zifini sile inzila zinu ziipe, muvwe amazwi yakwe Yawe Leza winu, alino nawe amaelenganyapo akane nu kumuponyezya isyamo lino watasowela panomuli.

¹⁴ Indi mu minwe inu, mwemo citini cino mukulonda, cino mwalola ukuti icingalungama nupya ali cisuma.

¹⁵ Lelo kuya kwene mucimanye mucumi ukuti ndi mwankoma, mumazwisya uwazi wakwe uwakaele pali mwemwe mwe eneco, apa musumba uu, alino na pa antu akaikala mwenemo. Pano kwene mucumi Yawe aliwe wantumile kuno muli apa kumunena amazwi yonsi yaa yano muvwa.”

¹⁶ Intunguluzi pamwi na antu yonsi ali pakunena yasimapepo pamwi na yakasema yati, “Umuntu wii atalinzile ukufwa, pano watusundila umwi zina lyakwe Yawe Leza witu.”

¹⁷ Apacisila cakwe vivyo yacilolo yamwi umu mpanga yakatuka, yanena na antu yonsi yano yakolongine yati,

¹⁸ “Umu manda yakwe Hezekiya uwali mwene mu Yuda alino na Mika umwina Molesyeti wasemile nu kunena umutundu wakwe Yuda ati, ‘Yawe Wamaka yonsi wati Zioni alalimwa wa calo, Yelusalemu alasenuka umutumba wa vitalang'anda. Umwamba apaya Ng'anda ikulu yakwe Leza ulaya umutengo wa miti.’

¹⁹ Umwene Hezekiya wa Ayuda pamwi na antu yonsi yatakomile Mika foo. Uzye yene yatoofile Yawe nu kumupapata apakuti atayaletela isyamo lino walanga wapanga ukuyacitila? Uzye swemo twifye imyenzo itu uku uyi ukulu ndi uu?”

²⁰ Akuno wali umuntu namuze wino wasemanga mwi zina lyakwe Yawe, a Uliya umwana wakwe Syemaya uwaku Kilyati Yealimu. Wene wasemile apa musumba kwene uu na pa mpanga kwene ii amazwi ali yamwi kwene ndi yano Yelemiya watasema umwi lelo.

²¹ Lelo umwene Yeoyakimu pamwi na asambazi yakwe ni vilolo vyakwe vyonsi, pakuvwa amazwi yakwe yalondanga ukumukoma. Uliya walanga uvwa vivyo autuka, aya ku Eguputo.

²² Nga alino umwene Yeoyakimu atuma Elinatani pamwi na Akiboli na antu yauze ku Eguputo.

²³ Yaya yawezya Uliya ku Eguputo, yamutwala nu ku mwene Yeoyakimu, awino wizile wamukoma ku lupanga nu kusumbila icala cakwe ku malindi ya antu yonsi.

²⁴ Lelo pano nasyukile kavwangila, Aiikamu umwana wakwe Syefani, acino yatansumvile mu makasa ya antu pakuti yankome.