Yelemiya 25 - Amazwi Yakwe Leza 2013

Anisi ukufuma ku Babiloni

¹ Umu mwaka wakwe cini uwa utesi wakwe Yeoyakimu umwana umonsi wakwe Yosiya, lino wene wali umwene waku Yuda, ne Yelemiya napokelile amalamulo ukufuma ku Mwene yano yakumile antu yonsi amu Yuda. Wali uli mwaka wakwe conga uno Nebukadineza wayelile apa cilimba ca wene uku Babiloni.

² Navwanzile ku antu yonsi amu Yuda nu mu Yelusalemu

³ inti, “Apa myaka amakumi yaili na itatu, ukutandikila apa mwaka walenga ikumi na itatu iya utesi wakwe Yosiya, umwana monsi wakwe Amoni, pano wayelile apa cilimba ca wene mu Yuda, ukufika na pa wanda kwene uno umwene wavwanzile nani nga nani ntatazile imposiwe ukumunena vino wacisile. Lelo mwemo mutasumvileko amano awe.

⁴ Mutali akuti munguvwa nanti ukusumbako amano nanti angala Yawe watwalililanga kumutumila aomvi yakwe yakasema.

⁵ Yene yamunena apa kufutatila inzila zinu iziipe izya mikalile inu, na pa vicitwa vinu iviipe, apakuti mungatwalilila ukwikala mu mpanga ino Yawe wapile kuli mwemwe nu ku vikolwe vinu, kuti itwalilile kuya impanga inu amanda pe.

⁶ Mwemo yamunena ukukana pepa tuluwi tuleza tuze nanti sile ukutuombela alino nu kukana katusizya Yawe icipyu, pamulandu ni vicitwa vinu, ali pakukana iletelela.

⁷ Caleka lyene, Yawe pakukana uvwa kunoli, wavwanga wati, ‘Apa kukana yela amazwi yane, mwamvulumwila icipyu, fwandi lyene mwaikolomwela isyamo.’ ”

⁸ Caleka Yawe Wamaka yonsi akuti, “Pamulandu wakuti mwemo musilonda ukuuvwa kunondi,

⁹ indi nu kwama imitundu yaku kayeya, namaama umuomvi wane Nebukadineza umwene waku Babiloni, namaama antu yano yakaikala ku mpanga ilya apakuti yize yamuvwangatile, yavwangatile kumwi ni mitundu ino yamuzinguluka. Namamulovya mwensi pyu pakuti antu yauze ndi yalolekesya yatandika sile kuizakazila pamulandu ni ntete. Ivyalanda Yawe.

¹⁰ Utupundu twinu twa luzango nu kusansamuka, nemo namatumalila namapuulamika na matwi yakwe yasiwinga na yanawinga. Namamyalalika ni cilulumo ca mawe yakusiila kweneko nu kuzimya inkozyo zinu.

¹¹ Impanga yonsi ii, imasyala sile ulwanga, cakuti yauze ndi yalolekesya, awe pasi pantete. Antu yonsi yalaombela umwene waku Babiloni apa myaka amakumi cinimbali.

¹² Imyaka iyo ndi yasila alino nemo ndavunuka umwene waku Babiloni, kumwi na antu amutundu kwene ulya, apa kwifya kwao. Ndonona impanga yao nu kuisya sile ntangali ntangali.” Ivyalanda ne Yawe.

¹³ Antu amutundu ulya nemo ndayacita vyonsi vino nayapangila. Vyonsi pyu vyalembwa mu lupapulo luu, vino Yelemiya wavwanga.

¹⁴ Pano antu amitundu yonsi ilya nayo kwene yalateekwa uzya ku antu amitundu iingi na kuli yamwene. Ndayavunuka apakulinganya vino nayo yacita.

Upinguzi wakwe Leza pa mitundu yuze

¹⁵ Yawe, Leza wa ina Izlaeli wanenyile ati, “Toola mu minwe yane ulwako lwakwe waini umwesye imitundu yonsi ino ndakutuma kweneko.

¹⁶ Uleke imwe, pakuti ipulupunte na mano yaipele, apamulandu wa nkondo ino namatuma pakasi kao.”

¹⁷ Fwandi nani ali pakutoola ulwako ku minwe yakwe Yawe nu kumwesya imitundu yonsi ino Yawe wantumile kweneko.

¹⁸ Yelusalemu ni misumba yaku Yuda, yamwene yao ni vilolo vyao, apakuti ice isanguke ulwanga nu kononeka. Ikawelwe nu kutipwilwa ndi vino caya nu mwilelo kwene.

¹⁹ Nupya Falao, umwene waku Eguputo na aomvi yakwe, intunguluzi zyakwe kumwi nu mutundu wakwe onsi,

²⁰ alino na maumba yonsi aenyi yao, yamwene yonsi a mpanga ya Uzi, yamwene yonsi a mpanga ya Filisti, Asyikeloni, Gaza, Ekiloni na yano yasiile mu Asyidodi.

²¹ Nupya aina Edomu, Moabu nga na ana yakwe Amoni.

²² Yamwene yonsi aku Tuli, yamwene yonsi aku Sidoni nga na yamwene aku vilila vyakwe yemba waku Mediteleniani.

²³ Nupya aku Dedani, aku Tama, aku Buzi na yonsi yano yakapela inkuzu ku mutwe.

²⁴ Yamwene yonsi aku Alabya, yano yakaikala mu lwanga.

²⁵ Yamwene yonsi aku Zimuli, yamwene yonsi aku Elamu na yamwene yonsi aku Medya,

²⁶ ukwikapo na yamwene yonsi aku kayeya, amu pipi na akutali, wenga nu muze. Katuvwange sile tuti amawene yonsi pyu apano nsi. Pakusyalikizya, umwene waku Syesyaki, alaamwa mwenemo.

²⁷ Nga alino lyene Yawe avwanga kunondi ati, “Nena antu ukuti ne Yawe Wamaka yonsi, Leza wa ina Izlaeli nayanena ukuti yamwe yakoleke yaluke nu kuluka. Yasuke yapona na pansi cakuti yaposiwe nu kukatuka apamulandu ni nkondo ino nkutuma kunoyali.

²⁸ Lyene ndi cakuti yakana ukutoola ulwako mu minwe yako, yamwemo, uyanene ukuti Yawe Wamaka yonsi acili akuyanena ndi vino yalinzile yamwemo.

²⁹ Pano lyene natandikila ukuleta ulanda pa musumba uwatemelwa izina lyane, uzye mwati mwemwe mumasyala ukwaula kupeziwa? Cumi cumi nkumunena mutalasyala ukwaula ukufululwa, pano indi nu kutuma inkondo pakasi ka antu yonsi panonsi, ivyalanda ne Yawe Wamaka yonsi.”

³⁰ “Wemo we Yelemiya uyasowelele amazwi yaa yonsi nu kuyanena ukuti Yawe wauuza umwiyulu, wapangalansya ni zwi lyakwe lyapapela mu cifulo cakwe icicindamisye, wauzila uluwa lwakwe pa maka nu kupundisya ku antu yakwe apano nsi, kwati ukupundilila kuli yakafena ya matingi.

³¹ Alino cilulumo cakwe cuvwika mpaka nu kumpelelekezyo ya nsi. Pano Yawe akusinila imitundu ino yaleta antu yonsi uku cilye. Aipe alayapingwila ukukomwa.” Ivyalanda ne Yawe.

³² Nupya Yawe Wamaka yonsi wavwanga wati, “Lola isyamo lyatililunduluka mu mitundu yonsi, ni cipunga icikalamba caticikatuka ku mpela zya mpanga.

³³ Uwanda ulya yano yalakomwa kuli Yawe yalasalangana ntangali ntangali ukufuma ku mpela ya mpanga ukufika nu ku mpanga yuze. Na kaloosya aluulila kumwi. Kusi alayakonganika nanti ukuyaziika. Yalasyala yatambalile pa musili.

³⁴ “Ale fwandi mwe yakacema pongomokini impooma. Kunkulukini pansi mwe ntunguluzi zya ufyo. Pano amanda inu akukomwa yatiyamuzana. Yamamufyula wakwe yasuuku.

³⁵ Lyene yakacema yatalalola ukwakufyumfyuntukila.

³⁶ Siuvwini inkuuta zyakwe yakacema ni mpooma zya ntunguluzi zya ufyo, apamulandu wakuti Yawe wataonona icemelo lyao.

³⁷ Amacemelo yao amulemvwe azipisye, yatiyononwa.

³⁸ Cisama watakatuka mu cifulo cakwe ni mpanga yao yatisanguka ulwanga pano ulupanga lwa ononyi lwatiluyakoma ni cipyu cikali cakwe Yawe caticiyaponela.”