Yelemiya 23 - Amazwi Yakwe Leza 2013

Usemo wa pa Mwene umukuluzi wa antu

¹ “Kalanda kuli yakacema yano yakaleka ukuti imfwele zya ufyo wane ziponge nu kusalangana!” Ivyalanda Yawe.

² Ali cino fwandi Yawe, Leza wa ina Izlaeli, walanda pamulandu wakwe yakacema, yano yakacema umutundu wa antu yane, wati, “Mwatimuleka imfwele zyane zisalangane nu kululumba. Mutazisakamile foo. Lelo nemo nkumusakamala pamulandu wa vicitwa vinu viipe.

³ Nemo ndakolonganika nemweneco imfwele zino zyasyala penepo. Indazifumya umu mpanga zyonsi muno zyasalanganile, ndaziwezezya uku macemelo yakwezyo, nga alino lyene zilasandana nu kuvula.

⁴ Alino ndasonta yakacema yano yalazisakamala nu kuzilisya. Zitalaoopa nanti ukuzakaza foo, nupya patalaponga nanti yonga.” Ivyalanda Yawe.

⁵ Yawe walanda wati, “Amanda yaliza lino ndasonta Umwene kacita wa vyaololoke, uwa mupanda wakwe Davidi. Aliwe alateeka wa Mwene wampomvu, uwamano nu kucita ivisuma ni vilungame mu mpanga.

⁶ Umu manda yakwe akuteeka, antu amu Yuda yalacingililwa, nga na antu amu Yelusalemu yalikala mu mutende. Wene alaamwa ukuti, ‘Yawe ali ololoke witu’.

⁷ “Insita ikwiza lino antu yalata ukulapa mwi zina lyakwe Leza wa umi wino wafumizye aina Izlaeli umu mpanga ya Eguputo.

⁸ Suka sile ukulapa mwi zina lyakwe Leza wa umi wino wafumizye aina Izlaeli umu mpanga yayela ku kayeya, mu mpanga zyuze muno wayasalanganyizizye. Alino lyene yalikala mu mpanga iyakwao.”

Ilandwe lyakwe Yelemiya lyapali yakasema yaufi

⁹ Apamulandu na yakasema, umwenzo wane wati ulepuka umukasi, na mafupa yane yakuzakaza yonsi. Apamulandu sile wa Mwene, na mazwi yakwe acindamisye, nemo indi wa muntu uwatakoleka, wino waini watatonsya.

¹⁰ Mu mpanga muzile sile yacizelele. Apamulandu wa citipu, na pamulandu wa vintu vii, impanga ikulila ulanda nga ni ncende zyakucemelamo zyamu lwanga zyatizyuma. Yakasema yakulondela inzila zya kwifya. Yakuomvya amaka yao umukucita ulufyengo.

¹¹ Yakasema kumwi na yasimapepo nayo kwene yatiyasuula Leza. Natinjazanikizya yakucita ivitazifile umu ng'anda yane kwene.

¹² Ali cino fwandi umu nzila yao mulazula iviwina. Lino yapamviwa ukupita mwenemo umu mfinzi, yalapona. Pasi pano umwaka wakuyavunuka lino ulafika, ndayaletela uononesi. Ivyalanda ne Yawe.

¹³ Muli yakasema aku Samaliya nindola mwenemo ivyaipa. Yene yakusema umwi zina lyakwe Baali nu kuponzya antu yane, aina Izlaeli.

¹⁴ Lelo muli yakasema aku Yelusalemu mwene nindola mwenemo ulenzyo, intumpu, ukukomelezya antu ukucita iviipe, kuti kutaya uwakuzenzuka ku uyi wakwe. Yonsi pyu kunondi aipe wa ina Sodoma. Antu amu Yelusalemu yakoline wa ina Gomola.

¹⁵ Caleka Yawe Wamaka yonsi wavwanga pamulandu wakwe yakasema amu Yelusalemu wati, “Ndayapeela umusalu ulule kuti yalye nga nu mwavi kuti yamwe, pamulandu wakuti ukufuma kuli yakasema yaya amu Yelusalemu ivicitwa viipe vyativisansantikila mu mpanga yonsi.”

¹⁶ Yawe Wamaka yonsi wavwanga ku antu aku Yelusalemu wati, “Mutezya mwauvwa uku mazwi yakwe yakasema yaa. Yene yakamusomba sile ku vilolwa vino yakamulandila. Vikafuma sile uku mano yao aeneco, asi ku kanwa kakwe Yawe foo.

¹⁷ Yene yalayuumilila sile mu kunena yano yasuula Leza ukuti yalaya nu longo. Na wiyo wensi wino akalondelela ulunkumbwa lwa mwenzo wakwe uumalale ala yakumunena ndi vino uzanzo utalamuponela foo.”

¹⁸ Nga alino nani navwanzile inti, “Pasi nanti wenga pali yakasema yaa wino watala wamanya inkama zya melenganyo yakwe Yawe. Pasi nanti wenga wino watala uvwa nanti ukutezya ilamulo lyakwe, nanti sile ukuvwa nu kusumba amano kuli vino akavwanga.

¹⁹ Icipunga ca ukali wakwe Yawe caticikatuka, na nkungulupya kwene watakatuka wiyo wino alaponela pa mitwe ya antu aipe.

²⁰ Icipyu ca Mwene citalatala cizuke, suka sile ace atale afikilizye vino wapanzile ukucita umu mwenzo wakwe. Cico mulacuvwa ningo umu manda yano yaliza uku nkolelo.”

²¹ Yawe wavwanga wati, “Ntatumile yakasema yayo, lelo nanti cali vivyo yene yaile kweneko. Ntayanenyile nanti cimwi, lelo nalyo kwene yasemile mwi zina lyane.

²² Ndi cakuti yamanyile inkama zya melenganyo yane, lyene ngano yalanda ilandwe lyane ku antu yane cakuti antu nayo yange yazenzuke ku nzila zyao iziipe nu ku vicitwa vyao iviipe.

²³ “Uzye nene Leza uwaya sile umupipi? Uzye nemo nsi Leza uwaya apali ponsi? Ivyalanda Yawe.

²⁴ Uzye umuntu angafisama mu kafyototi inkane kumulola? Uzye mutamanyile vino nemo naya sile ponsi, umwiyulu na muno nsi kwene?” Ivyalanda Yawe.

²⁵ Yawe akuti, “Nuvwa mpiti vino yakasema yalya yakalanda, yayo akasemela mwi zina lyane. Cila wenga akati, ‘Nindota iciloto! Nindota iciloto!’

²⁶ Uzye kwene ufi wamusango uu ulatwalilila ukufika lilaci, umu myenzo yakwe yakasema yano yakasema vyaufi, yayo akasema vyausomvi vyamu myenzo yao aeneco?

²⁷ Uku viloto vyao, yakalandilana nu kwelenganya ukuti yalalenga antu yane ukwilila izina lyane, ndi vino ivikolwe vyao vilile izina lyane umu kulondela Baali.

²⁸ Kasema wino alosile iciloto cingazipa wene alande ukuti iciloto sile. Lelo kasema wino uvwa amazwi yane alinzile kuyalanda umucumi. Uzye kwene insaawa zyalingana ni ngano?” Ivyalanda Yawe.

²⁹ Yawe walanda wati, “Uzye kwene amazwi yane yatakoline wa moto, nanti inondo ino ikatamola iciliwe mu tupimfya?”

³⁰ Nupya Yawe walanda wati, “Caleka nemo nkukanya yakasema yayo akanenana nu kusema amazwi yano yakatunganya ukuti yafuma kunondi.

³¹ Endi, nemo nkukanya yakasema yano yakaomvya indimi zyao umu kuvwanga yati, ‘Yawe uwalanda amazwi yaa.’

³² Cumi kwene, nemo nkukanya yakasema yano yakalota iviloto vyaufi. Yene yakalotola iviloto ku antu yane nu kuyatungulula kwi lovyo pamulandu wa ufi wao ni vilumba vyao. Ala nemo ntayatumile nanti ukuyanena ukuti yapitana. Nupya yene yatakweti umulimo nanti umwi ku antu yane.” Ivyalanda Yawe.

Icisendo cakwe Yawe

³³ Yawe anena Yelemiya ati, “Kasema umwi muli yayo nanti sile a simapepo ndi wakuuzya wati, ‘Uzye icisendo cakwe Yawe icani?’ Uce umwasuke uti, ‘Icisendo cakwe Yawe awewe kwene, nupya nkukusumba.’

³⁴ Ndi cakuti kasema umwi nanti simapepo nanti umuntu muze sile wavwanga wati, ‘Icisendo cakwe Yawe,’ ale lyene umuntu wiyo ndamuvunuka kumwi na ang'anda yakwe.

³⁵ Acino apakuvwanga nu muze nanti umwina, umuntu wensi alinzile wavwanga wati, ‘Uzye Yawe wataasuka uli?’ Nanti ati, ‘Uzye Yawe watavwanga cani?’

³⁶ Lelo mutakezye ukulanda nupya muti, ‘Icisendo cakwe Yawe,’ pamulandu wakuti ndi umwi alacita cico, ale lyene mucumi ndalenga ukuti ciye icisendo kunoli. Antu yavulunganya amazwi yakwe Leza waumi, Yawe Wamaka yonsi, Leza witu.

³⁷ We Yelemiya, uzya yakasema uti, ‘Uzye Yawe wamwaswike cani?’ Nanti muti, ‘Uzye Yawe wavwanga cani?’

³⁸ Nga ndi cakuti yene yakana ukuyela ilamulo lyane, ndi yaomvya amazwi ya, yati, ‘Icisendo cakwe Yawe’, lyene uyanene ukuti

³⁹ ndiza njanyenyemule wa civiya cinyome nu kuyazukuzila ukutali nakunondi, alio kwene kumwi nu musumba uno napiile ku vikolwe vyao.

⁴⁰ Nupya ndayaletela ukupupana kwa muntaputuka ni nsonyi izilayelelela pee, ukwaula kwililika.”