Yelemiya 22 - Amazwi Yakwe Leza 2013

Ilandwe lyakwe Yelemiya ku ang'anda ya wene wakwe Yuda

¹ Yawe anena kuya kwi sano lya Mwene waku Yuda, nu kuyanena ang'anda yakwe Yuda inti,

² “Uvwa amazwi yakwe Yawe, we mwene waku Yuda, we muno wikala pa cilimba ca wene cakwe Davidi, ni ntunguluzi zyako na aikazi amu Yelusalemu.

³ Yawe akuti, ‘Mwacita vyaulungami ni visuma. Mwatuula yayo afyengelekeziwa kuli yano yakayafyenga. Mutacuzya umwinamasi na ana asyale na yamukamfwilwa. Mutacita ulufyengo nupya mutazwisya nu wazi wa antu akaele mu ncende ii.

⁴ Pano ndi cakuti mwalondela ningo isunde lilyo, ale lyene yamwene yonsi yano yakaikala pa cilimba cakwe Davidi, yalatwalilila ukwingila pa mpongolo zi sano lii, ala yakwezile mu maceleta na pa mfwalasi, aeneco kwene nga na aomvi yao kumwi na antu yao.

⁵ Lelo ndi cakuti mwakana amazwi yaa, lyene ala nalapa kuno muli ukuti isano lii lilaongoloka liye icitotela. Ivyalanda nene ne Yawe.’”

⁶ Pano vii ali vino Yawe walanda pamulandu wi sano lya mwene waku Yuda ati, “Nanti angala lyene lili wa mpanga ya Gileadi nanti wa myamba yaku Lebanoni, ku kuzipa, lelo ndalicita ulwanga, umusumba umutanga mwikale umuntu.

⁷ Ninteyanya aomvi yano yaliza yakulwisye. Cila muntu aliza ni mpasa yakwe. Yaliza yateme imiti yako, imikelide iyololoke nu kuisumbila umu moto.

⁸ “Alino nupya apacisila cakwe vivyo imitundu ivule iliza ipite mu musumba uo. Wensi alanena umuze ati, ‘Uzye pacani cino Yawe wacitila umusumba uu icamusango ndi uu?’

⁹ Lyene nayo yalaasuka yati, ‘Apamulandu wakutazyela upangano wakwe Yawe Leza wao, yapepa nu kutumikila tuleza tuze.’ ”

Ilandwe lyakwe Yelemiya uku mwene Yoaazi

¹⁰ Mwe antu amu Yuda mutalilila umwene Yoaazi. Mutalilila imfwa yakwe. Lelo lililini Yoaazi, wino yakusenda ku uzya, pamulandu wakuti wene atalatala awele, nu kwiza lola impanga muno wavyalilwe.

¹¹ Pano vii avino Yawe walanda pamulandu wakwe Syalumu umwana umonsi wakwe Yosiya, wiyo uwapyanyile isi pa cilimba ca wene waku Yuda lelo wafumamo umu ncende ino nupya atalatala awele.

¹² Alaya akafwile umu mpanga ino yamusenda uku uzya. Atalatala alole impanga ino nupya.

Ilandwe lyakwe Yelemiya pali Yeoakimu

¹³ Kalanda ku muntu wino akakuula ing'anda yakwe umu kuntacita vyaulungami, ni miputule yakwe kwene yapapela ukwaula ulungami, wiyo wino akaomvya auze lutu, nupya wene asiyalipila apa milimo yao.

¹⁴ Wene akati, “Nkuikuulila ing'anda ikulu ino ikweti miputule ivunguluke ya papela.” Acino aikamo inzota izikulu, nga nu ku malung'umba nako aikako imbao zya mikelide, nu kuzikupawila ni langi liyenzu.

¹⁵ Uzye ukuvulilwa imikelide cakulenga ukuya umwene uwaluta antu yauze? Uzye so atailyokizye vyakulya ni vyakumwa? Wene wacitanga ivisuma ni vyaulungi. Caleka wali nu longo muli vyonsi.

¹⁶ Wene waputwilanga apina imilandu kumwi na aulilwa, acino wali nu longo muli vyonsi. Uzye vivyo asi ali kumanya nene? Ivyalanda Yawe.

¹⁷ Lelo wemo amanso yako nu mwenzo wako vyalola sile ku kuizanzya we mwisikulu. Wemo ukakoma antu akaele nu kuomvya uluku uluku antu yako.

¹⁸ Caleka Yawe wavwanga apamulandu wakwe Yosiya umwana umonsi wakwe Yeoyakimu, umwene waku Yuda, ati, “Kusi nanti umwi alamulosya, ‘Silolini vino caipa wakwe cimwi mwe yacuza yane!’ Kusi nanti umwi alamulila ati, ‘Mwene wane! Musambazi wane!’

¹⁹ Wene alazikwa wakwe punda, nupya yalamukwetulula yamusende nu kumusumbila ukunzi ya mpongolo zyakwe Yelusalemu.”

Ilandwe lyakwe Yelemiya lya kononwa kwakwe Yelusalemu

²⁰ Yangini ku Lebanoni mwe ina Yelusalemu mwe, akuno mukapunde, yangini ku mpanga ya Basyani. Yangini mukalaizye ukufuma mu myamba yaku Moabu, pamulandu wakuti yonsi yano mwalemana nayo yatiyacimviwa.

²¹ Ne Yawe navwanzile namwe lino mucili nu longo, lelo mwakanyile ukuvwa. Avino mwacitanga ukufuma sile nu kukatalili, mwakananga ukuvwa amazwi yane.

²² Umuza umaululula intunguluzi zinu zyonsi. Yano mwalemana nayo yalayasenda ku uzya. Alino lyene mwemo insonyi zilamulema, mulapupana pamulandu wa uyi uno mwacita.

²³ Wemuno wakwata icifulo cako uku Lebanoni, ni cinsanzo cako umu miti mikelide, iyee mwe lyene vino ulateta lino amacuzi yalakuponela, kwati ucuzi wa mwanaci wino ali pipi nu kulela.

Leza wapingula Yeoyakini

²⁴ Yawe wavwanga uku mwene Yeoyakini, umwana umonsi wakwe Yeoyakimu umwene waku Yuda, wati, “Cumi kwene vino nene indi Leza wa umi, nanti angala Yeoyakimu angaya imbalaminwe ukwi kasa lyane lilungi, nemo ningamuzula.

²⁵ Nakupeela mu makasa yakwe yano yakalonda ku kukoma, mu minwe yakwe yano ukaoopa, mu minwe yakwe Nebukadineza umwene waku Babiloni, nu mu minwe ya ina Kalideya.

²⁶ Wemo kumwi na nyoko kwene uwakuviile, ndamusumba umu mpanga yuze yuze sile, muno mutavyalilwa mwenemo, amuno mulafwila.

²⁷ Nupya kutalatala kuye ukuweluluka umu mpanga ino mukalukisya wakwe cimwi.”

²⁸ Nemo natiile, “Uzye umwene Yeoakini watasanguka wa nkolo itamike ino yatiyasumba, cakuti kusi nanti wenga angaitemwa nupya? Uzye pacani cino yatiyasendelwa mu uzya, aliwe na antu yakwe, umu mpanga ino yatamanyile nanti panono?

²⁹ Iye mwe we mpanga we! Mpanga we!” Si uwauvwa izwi lyakwe Yawe!

³⁰ Yawe wavwanga wati, “Lembini umuntu wii muti imbulwa ana, umuntu wino atasyuka mu umi wakwe, pano kusi nanti wenga apa ana yakwe, wino alaya nu longo umu umi wakwe, wino alikala pa cilimba ca wene cakwe Davidi, nanti ukuteeka mu mpanga ya Yuda.”