Yelemiya 21 - Amazwi Yakwe Leza 2013

Umusumba wa Yelusalemu wapokwa

¹ Zedekiya umwene waku Yuda watumile Pasyuli umwana umonsi wakwe Malikiya nga na simapepo Zefaniya umwana umonsi wakwe Manase, kuli ne Yelemiya, na mazwi yaa akuti,

² “Twapapata mutuzizyeko kuli Yawe, pano lyene Nebukadineza umwene waku Babiloni ni vita vyakwe yakulwisya umusumba uu. Limwi lyene Yawe angatucitila ivizungusyo vimwi ivingapatikizya umwene Nebukadineza kuswilila.”

³ Alino lyene Yawe avwanga kunondi nga nani nena antu yano yatumilwe kunondi

⁴ kuti yanene Zedekiya ukuti Yawe, Leza wa ina Izlaeli, wavwanga wati, “Zedekiya, namacimvya ivita vyako vino vikulwisya umwene waku Babiloni ni vita vyakwe. Ndakolonganika ivyanzo vya vita vyako apakasi ka musumba.

⁵ Nene nemweneco namaya kalwisya wa anisi yinu namaka yane yonsi, icipyu cane nu ukali wane onsi.

⁶ Ndakomola wensi akaikala mu musumba uu. Antu kumwi ni nyama yalafwa uku mpungo.

⁷ Alino wiyo wensi aalapusuka ku mpungo nu ku lupanga nga nu ku cipowe, wene alalemwa ku mwene Nebukadineza nu ku anisi yao yano yalayakoma. Yene yalakomolwa kunoli ku cilimi ca lupanga lwakwe. Atalasya penepo nanti wenga nupya atalayuvwila uluse foo.”

⁸ Alino nupya Yawe anena kuti mvwange ku antu amazwi yaa, inti, “Uvwini kuno! Ne Yawe nkumupeela ukusolola pakasi ka nzila ino ikatungulula ku umi nga ni nzila ino ikatungulula ku mfwa.

⁹ Wiyo wensi wino alasyala mu musumba uu alafwa ku lupanga, ku cipowe nu ku mpungo. Lelo wiyo wensi wino alafuma mwenemo nu kucimbila aina Babiloni yano yati yauzinguluka, wene alapita ulumi nupya alapususya umi wakwe.

¹⁰ Pano natinsumba amanso yane apa musumba uu apa kuuletela isyamo, asi syuko foo. Wene ulapelwa mu makasa ya mwene waku Babiloni, nawe alaoca uku moto. Ivyalanda Yawe.”

Upinguzi ku ang'anda ya wene wakwe Yuda

¹¹ Nupya Yawe anena kuti nene ang'anda ya wene wakwe Yuda inti, “Uvwini ku mazwi yano ne Yawe nkulanda.

¹² Mwe amu mupanda wakwe Davidi. Mwacita vya ulungi cila katondo. Mwatuula wino yafyenga, wiyo wino yiila mu ucenjezi. Ndi mutangacita cico, ale lyene iviipe vino mukucita vilalenga ukuti ukali wane ukatuke nu kulunkuma wa moto uno kusi nanti wenga angauzimya.

¹³ Ala awewe kwene, awewe nkulwisya we Yelusalemu we muno wikala apa sanzuke, wa ciliwe cino catumpuka apapela mu cifoloma. Lelo nemo ndalwisya mwemwe. Mwemo mukalanda muti kusi nanti wenga wino angamuzanza nanti kumwingilila mu vifulo vinu vya kuzinamo.

¹⁴ Ndamuvunuka kulingana ni vicitwa vinu viipe vino mwacita. Ndasonteka umoto pa masano inu, nga nu moto uloca vyonsi ukuzinguluka mwemwe. Ivyalanda ne Yawe.”