Yelemiya 20 - Amazwi Yakwe Leza 2013

Yelemiya yamucuzya kuli simapepo Pasyuli

¹ Lino simapepo Pasyuli umwana umonsi wakwe Imeli, uwali musika mukulu uwamu Ng'anda ikulu yakwe Leza, uvwa kuno ne Yelemiya nkusema ivintu vii,

² wene apeela ilamulo kuti yangume nu kunyepa mu minyololo apipi ni Mpongolo yakwe Benjamini ino yayela lwa papela ya Ng'anda ikulu yakwe Leza.

³ Akatondo wanda walondelilepo, lino Pasyuli wasapula Yelemiya iminyololo, Yelemiya nawe ali pakumunena ati, “Yawe ataatemela wewe izina lyakuti Pasyuli, awe. Izina lino wakutemela ilyakuti ‘Magoli Misabibu’

⁴ Yawe umwisikulu watavwanga ati, ‘Wemo Pasyuli namakucita ingofyo kuli wemwisikulu na kuli yacuza yako kwene. Nu kuilolela ulailolela wemwisikulu kuno anisi yako yalakomola yacuza yako ku lupanga. Namaleka umwene waku Babiloni awino ateke antu yako amu mpanga ya Yuda. Yamwi alayasenda mu uzya uku Babiloni, nga yamwi nayo alayakoma.

⁵ Namaleka na anisi yako yasampe ni vyuma vyonsi ivyaya mu musumba uno wa mpanga ya Yuda kumwi na vyonsi vyamutengo ivyaya mwenemo. Vyuma vyonsi vyakwe yamwene yalavisenda ku Babiloni.

⁶ Nawe, Pasyuli, wewe kumwi na ang'anda yako kwene mulasendwa umu uzya ku Babiloni. Kuku akuno mulafwila nu kuzikwa, wewe kumwi na yacuza yako kwene yano wasemile vyaufi.’ ”

Yelemiya wailizyanya kuli Yawe

⁷ Iye mwe we Yawe! Avino wandyongwisye nani ala nkuzumila. Wemo wanduta amaka, nu kunyata wanyata. Cila muntu akunseka. Yonsi kwene yakunsoweka uwaca nu wila.

⁸ Nemo lyonsi sile ndi navwanga, ala nkupunda nu kulaizya inti, “Ala ncule mwe! Alu wononyi nu kuvula!” We Yawe, nemo lyonsi sile antu pasi pakunseka, pasi pakunsuula, pamulandu wakuti nkasema ilandwe lyakwe Yawe.

⁹ Lelo limwi ndi navwanga nati, “Awe mwe, nkanilile sile Yawe nkante nu kulanda amazwi yakwe umwi zina lyakwe,” lyene mu mwenzo wane ilandwe lyako iliya wa kulunkuma kwa moto. Nu munteo zyane ala mumila, nani inezya kuyacinyintila apapezile amaka yane, lelo mucumi imposiwa kucita cico.

¹⁰ Nemo nkuvwa kuno antu aingi yakutotozana, yati, “Ingofyo konsi konsi! Si mulandililini! Lekini tumulandilile!” Nayacuza yane kwene yakulolela kuti nduvyanye cimwi, ala yakuti, “Limwi yangamulyongofya, nga naswe tucite cilanduzi kunoli.”

¹¹ Lelo we Yawe, wemo waya ku lusansa lwane, nupya wewe ilamba lyamaka, na yayo akuncuzya yamapempezyokanga yaposiwa. Yene yalaposiwa mpaka yazewane pee, pamulandu wakuti yalaposiwa kufikilizya cino yakasi. Ukupupana kwao kutalatala kwililike, awe.

¹² Lelo we Yawe Wamaka yonsi, wemo ukalungika apa kwezya antu. Wemo ukalola ivyaya mu myenzo yao nu munda zyao. Pasi pano nemo nintuula umulandu wane mu makasa yako.

¹³ Imbilini Yawe! Lumbanyini Yawe! Wene akapususya yayo atitikiziwa ku maka ya antu aipe.

¹⁴ Kautipwe uwanda uno navyalilwe penepo! Kawililike uwanda uno mayo wamviilepo.

¹⁵ Atipwe umuntu wino wasansamwisye tata apakumumanyisya ati, “Iyakuvyalila umwana umonsi.”

¹⁶ Umuntu kwene wiyo kaye wa misumba kwene ilya ino Yawe wononyile ukwaula uluse. Sangala auvwa impooma zya ulanda umu katondo, ni mpooma zya nkondo lino ilanzi lyafika umutwe pakasi.

¹⁷ Pasi pano wene atankomile lino nali umu ndilwa yakwe mayo, nga indilwa yakwe mayo yange iye ilindi lyane.

¹⁸ Uzye lyene pacani cino nemo navyalilwe? Uzye apamulandu sile wakuti inje umu ntazi na malanda, kuti imfwile umu kupupana?