Yelemiya 2 - Amazwi Yakwe Leza 2013

Utalami wa ina Izlaeli

¹ Yawe anena kuti nje nkume imbila ku antu amu Yelusalemu inti,

² “Nkaiusya ukuti lino mwali ance mwali ni cuvwilo. Mwemo mwantemilwe wakwe cimwi muli unawinga winu. Yandondile umu lwanga, itupita suka tufika mu mpanga itatala yalimwa.

³ Izlaeli wali uwakwane nene sile nenga. Wene wali icuma cane camuzilo. Wiyo wensi wino cala cakumba wamuzanza, ala wene wailetelela sile wenga. Ivyalanda Yawe.”

Uyi wa vikolwe vya ina Izlaeli

⁴ Mwe ang'anda yakwe Yakobo, mwe nko zyonsi zya ina Izlaeli, uvwini amazwi yakwe Yawe.

⁵ Vii avino Yawe akulanda ati, “Uzye ukuluvyanya cii kuno ivikolwe vinu vyazanyile munondi, apakuti vinsangukile? Vyene vyalondelile ukupepa utuluwi twasilesile, nga aisikulu yasanguka yaya asilesile.

⁶ Yene yatatazile yelenganya yati, ‘Uzye Yawe ali kwi, wiyo uwatufumizye ku Eguputo nu kututungulula mu lwanga, impanga ya mapoli ni visengafwafwa, impanga iyumalale iya kanda, mumo muno mutatala mwapita mwenemo umulawa, nanti ukwikalamo umuntu?’

⁷ Insuka muleta umu mpanga ivunde, imusyukila ni viseekwa pamwi ni vintu vyuze visuma ivyaya mwenemo. Lelo lino mwiza mu mpanga yane, mukowezya impanga yane, musangula impanga yaupyanyi wanyawanya.

⁸ Yasimapepo nayo yakanyile ukuuzya yati, ‘Uzye Yawe ali kwi?’ Yakapingula nayo yatamanyile nene, intunguluzi nazyo zyansangukile. Yakasema nayo yasemile mwi zina lyakwe Baali. Nga yalondela utuluwi utwasilesile.

Yawe wapeela antu yakwe umulandu

⁹ “Fwandi ne Yawe namamupeela nupya umulandu, ivyalanda Yawe. Ndapeela ni vizikulula vinu umulandu.

¹⁰ Pitangini ku cilila ca Kitimu mukailolele mwenga, tumini intumi ku Kedali lwaku ufumondaka yakalolekesye. Uzye kwene kwatala kwaloleka icintu camwata ndi uu?

¹¹ Uzye kwatala kwaloleka umutundu uno ukakauzya tuleza twakweo utuluwi, nanti angala tusi utwampomvu?

¹² Si tentini apa cintu cii, mwe mayulu, zungukini wakwe cimwi, oopini wakwe cimwi. Ivyalanda Yawe

¹³ Antu yane yatala imilandu iili: yene yamfutatila, nemuno naya akafukoka ka manzi ya umi, yafukwila ni vifula vya manzi ivituloke ivisisunga amanzi.”

Icilambu cakuiletelela pa utalami wao

¹⁴ Uzye Izlaeli umuomvi, nanti umuzya uwavyalilwe mu ng'anda? Uzye pacani fwandi cino anisi yamuzunyizya?

¹⁵ Antu ya mitundu yuze yakumung'anzila wakwe cisama? Yatiyasangula impanga inu ungati ulwanga. Imisumba inu yationgoloka, nga musi na antu akwikala mwenemo.

¹⁶ Icacumi aina Memfisi na ina Tapenesi, yamupile inkanzu.

¹⁷ Uzye asi mwemwe mwenga mwalenga cico, apamulandu wakufutatila Yawe Leza winu, apacisila cakumutungulula umu nzila yampomvu?

¹⁸ Uzye ukusunta kuno mukusuntilila ukuya uku Eguputo ukukumwa amanzi ya muli Nailo, kukumuzipila cani? Nanti ukusunta kuno mukusuntilila uku Asilya, ukukumwa amanzi ya muli Yufulate, kukumutumbwila cani?

¹⁹ Uyi winu ulamuletelela na ucisanguka winu ulamuzewanya. Alino lyene mulasambilila, muluvwa nu usungu icakuti nu kumucuzya cilamucuzya apakulola vino ukusuula Yawe Leza winu, nu kukana moopa kwaya. Ivyalanda ne Yawe Leza Wamaka yonsi.

Aina Izlaeli yakana ukupepa Yawe

²⁰ Yawe wavwanga wati, “We Izlaeli, ampiti sana lino wakanyile amaka yane, wakana nu kunjela nu kumpepa. Alino lyene apa mwamba uli onsi utumpuke, nu mwisika lya muti uli onsi ulembe, walambalalanga mwenemo nu kupepa kaleza ki kwata.

²¹ Nemo walanga nakulema wa muti wa matingi uwa mbezu, ulondoloke. Lyene tala lola vino watuya! Uli wa muti wa matingi uole, uwa ciwelewele sile.

²² Nanti ungafulala uli na sopo umununkile, ukulutila kwa uyi wako mpaka kuloleke kunondi.

²³ Ungavwanga uli ukuti utaikowezya nupya utalondelanga Baali? Tala lola vino waifizye umu cifoloma ca Beni Hinoni, elenganya pali vino wacisile. Wemo icili conga ni ngamila yakaci ino ikusimula kuu na kuuku.

²⁴ Icili conga sile na punda wa kaci wino akutandala mu lwanga, umu kuzumba impuno ukuli uwa kalume. Lino watapamviwa kusi wino angamutonsya, amulesye. Uwa kalume wensi wino akumulonda wene atange acule foo.

²⁵ Izlaeli, ala wemo tekela pano limwi ungazana ukuti ulwazo lwako ulucisike nanti umukolomilo wako uumalale umukulondelela tuleza utwenyi. Lelo kwene wemo watile, ‘Usi mulandu, nintemwa tuleza kwene tuu, atuno namalondelelanga.’ ”

Izlaeli alinzile ukufululwa

²⁶ Yawe wavwanga wati, “Vino umwivi akauvwa insonyi, ali vino ang'anda yakwe Izlaeli yalalemwa ni nsonyi. Ukutandikila sile kuli alio kwene, yamwene yao, inkombe zyao, yasimapepo yao kumwi na yakasema yao.

²⁷ Yano yakanena icimuti iyati, ‘Wewe tata,’ iyanena ni ciliwe iyati, ‘Wewe mayo.’ Apamulandu wakuti yamfutatila, yasilonda nu kundolekesya. Alino lyene umu nsita ya ntazi yene yakampunda iyati, ‘Katuka ututuule!’

²⁸ Tuleza tuno wapanzile we mweneco tuli kwi? Leka tukatuke, tulole ndi cakuti tungakutuula umu nsita ya ntazi zyako, pano kwene tuleza twako, we Yuda, awe cumi twavulisya. Caya sile icili conga ni misumba yako pamwi nu tuvuwa twakwe Baali. Kwati sile imiseo yamu Yelusalemu.

²⁹ Icani fwandi cino ukuilizyanyizya? Icani cino mwansangukila? Ivyalanda Yawe.

³⁰ Lino namuvunuka, ala naicuzya sile pano mutapokelile isunde. Impaanga zinu azino zyakomola yakasema yinu, kwati a yacisama aononyi.

³¹ Mwe luko lwipe mwe! Si mwange muvwe izwi lyakwe Yawe. Uzye kwene nemo indi wa matololo kuno muli, nanti indi wa mpanga ifite umwakoopa? Icani fwandi cino we mutundu wane wewe ukalanda ukuti mungaya kuno muitemilwe nu kukana weluluka kunondi?

³² Uzye kwene umukazyana angilila iviyembelo vyakwe, nanti nawinga angilila umusipi wakwe? Lelo antu yane yatiyanjilila apa manda asi yakupenda.

³³ Iye mwe vino wamanya ningo imisango yakulondelela icitemwiko, nu kuyelezya ukupita na maifyo!

³⁴ Uku vyakuzwala vyako kwazanwa uwazi wa antu akaele apina, yano utazanikizye yakoomola ing'anda yako. Lelo nanti cili vivyo

³⁵ mwemo mukati, ‘Sweswe yakaele, Yawe atange atusokele, awe.’ Lelo nemo ndamupingula apakulanda muti, ‘Swemo tutaifya nanti cimwi.’

³⁶ Uzye pacani cino mwemo mwayela namansenunsenu? Nkumunena mucumi ndi vino aina Eguputo yalamuzewanya ndi vino aina Asilya yamuzewanyizye.

³⁷ Nako kwene ku Eguputo mulaweluluka ale mwatimupanga na makasa pa mitwe. Pasi pano ne Yawe ninsuula nu kutazyela yano mwataila. Fwandi mwemo pasi nanti cimwi cino mulasyukila kunoyali.”