Yelemiya 19 - Amazwi Yakwe Leza 2013

Umusazi utamoke

¹ Yawe wanenyile ukuti inje nkakale umusazi onga. Anena nu kusenda penepo yacilolo yamwi akalamba na yasimapepo yamwi akalamba.

² Nani injanena ukufumila pa mpongolo imwi, ino yasumbilangapo iviya. Anena ukuya nayo ku Cifoloma ca Hinomu. Kuku kwene ali kuno nali nu kuya uma imbila ku antu ino Yawe wali nu kunena.

³ Fwandi nawe Yawe ali pakunena ukuti inene antu inti, “Mwe yamwene amu Yuda, na mwe ina Yelusalemu, siuvwini amazwi yakwe Yawe Wamaka yonsi, Leza wa ina Izlaeli. Wene akuti, ‘Nemo nasya ndete uononesi uo uno umawawatanga numu matwi ya antu yano yamauvwanga kweneko.

⁴ Ndacita cico pamulandu wakuti antu yane yantazyela nu kukowezya incende ii pakupeela penepo impolelwa kuli tuleza tuze tuto tuno yene nanti vikolwe vyao nanti yamwene amu Yuda yatamanyilepo nanti cimwi. Yene yazuzya uwazi wa antu akaele umu ncende ii.

⁵ Nupya yatiyakuulila Baali utuvuwa utwakocela penepo ana yao wa mpolelwa. Alino nemo ku mano yane citatala caya nakweneko icakuti yangocele ana yao wa mpolelwa.

⁶ Ali cino lyene nemo ne Yawe nalanda ukuti insita imwi iliza, lino antu yalata ukwama incende ii yati Tofeti nanti Cifoloma ca Hinomu. Lelo ilaamwa ukuti Cifoloma ca Usalifi.

⁷ Mu cifoloma kwene cico ali muno navulunginye amapange ya antu aku Yuda na aku Yelusalemu. Namaleka ukuti anisi yao yayacimvye umu nkondo, nu kuyakoma ali muno yayakomele. Namaleka ukuti ivyunyi ni vinyama vya mpanga ali vino vyalya ivyala vyao.

⁸ Nupya namaonona umusumba uo cakuti yonsi yano yamapitanga mwenemo yaoopa nu kuzunguka kuli vyonsi vino vimacitika mwenemo.

⁹ Anisi yao yano yalazinguluka umusumba nu kwezya kukoma antu aikazi yamwenemo. Yalalizizya umusumba cakuti antu ali mukasi kauko yalaalya auze kumwi na ana yao kwene.’ ”

¹⁰ Lyene nupya Yawe avwanga kunondi ati, “Tamola musazi apa manso ya antu yano tupisile nayo.

¹¹ Alino uyanene vino Yawe Wamaka yonsi watalanda, wati, ‘Ndonona antu yaa kumwi nu musumba kwene uu, nga nao ulaya wa musazi kwene uu utamoke uno utange ulimbwe nupya. Alino nu mu Tofeti kwene antu yamazikananga, pano kusi nakuze kuno yangayazika.

¹² Fwandi ali vino nemo namacitanga ku musumba uu kumwi na antu aikala mwenemo. Umusumba uu ndaucita wa musumba wa Tofeti.

¹³ Amang'anda amu Yelusalemu nga na mang'anda yakwe yamwene amu Yuda kumwi na mang'anda yonsi yano yakafutumwilamo ubani apa mapaala yao, apakuti yafutumukila mwiyulu mupela, umuli intanda nupya muno yapongolwela waini kuli tuleza tuze, yonsi kwene yalakoweziwa. Yalaya akowele wa musumba wa Tofeti.’ ”

¹⁴ Lyene ne Yelemiya imfuma ku Tofeti, kuko kuno Yawe wantumile ku kukosola ilandwe. Alino inja nimilila mu musolo wa Ng'anda ikulu yakwe Leza nga nena antu yonsi

¹⁵ ukuti Yawe Wamaka yonsi, Leza wa ina Izlaeli, watavwanga ati, “Nemo nasya indetele umusumba uu ni mizi yonsi iyaya umu mbalimbali, uononesi wa misango yonsi, uno nanenyile antu ukuti ndaleta pamulandu wakuti yene yatalama imyenzo nupya yasikulonda ukuvwa vino nkulanda.”