Yelemiya 18 - Amazwi Yakwe Leza 2013

Yelemiya waya ku ng'anda yakwe nakamata

¹ Yawe avwanga kunondi ati,

² “Katuka, tentemukila ku ng'anda yakwe nakamata. Akuno umaya ukuvwe amazwi yane.”

³ Caleka nani akuno ntentemukila, nga ndola nakuno akuomba umulimo wakwe.

⁴ Ndi cakuti iciviya cino akumata caipa, wene aconona, nga amata cuze ndi muno yanakamata yakacitila.

⁵ Nupya kwene Yawe anena ati,

⁶ “Mwe ina Izlaeli mwe, uzye nemo ntakwata insambu zyakucita kunomuli vino nakamata akacita ku mbulo? Silolini ivyaya imbulo mu minwe yakwe nakamata, ali vino namwe mwaya mu minwe yane.

⁷ Ndi cakuti napingwila umutundu nanti uwene umwi ukuti namautukula nu kuongolola nu kuonona,

⁸ lelo umutundu uno napingwilile vivyo wata ukwifya, lyene ningautezela apa uyi uno naupangile ukucita.

⁹ Lelo ndi cakuti napingwila umutundu nanti uwene umwi nati ndaukuula nu kuusimpa,

¹⁰ lelo umutundu uo ndi cakuti wacita iviipe apa manso yane, wakana nu kuuvwa ukwi zwi lyane, ale lyene ntaliusya apa usuma uno napangile ukuucitila.

¹¹ Ali cino wemo pitanga, yanga ukanene aku Yuda na ikazi yonsi amu Yelusalemu ukuti ne Yawe natinjateyanyizizya uyi, natinjapangila na mapange. Acino zenzukini cila wenga uku miyele inu iipe, cila muntu asenule imiyele yakwe iipe ni vicitwa vyakwe iviipe.

¹² Lelo yene yalaasuka yati, ‘Ala ukuicuzya sile! Tumatwalilila ukucita vino tukulonda. Cila wenga uwa munotuli amatwalilila nu kutalama kwa mwenzo wakwe.’ ”

Antu yakana Yawe

¹³ Yawe akuti, “Mutale muzye imitundu yonsi ndi cakuti umuntu umwi wino uvwa cintu camusango ndi uu, cakuti umukazyana atatala wamanya umonsi, wacita icintu iciipisye!

¹⁴ Uzye kungwi umutikame watala ata kuloleka apa ntonje ya myamba ya Lebanoni? Uzye utunguzi twa manzi azuke twata ukukonkoloka kweneko?

¹⁵ Lelo antu yane yanjilila. Yene yakaocela utuluwi ubani, tuto utwayalenzile kupumeka umu nzila zino yalinzile ukupitamo. Yene yata ukulondela inzila zyampiti. Yakalondela tuzila twakwe tondo, ni miseo izyokoloke.

¹⁶ Yasenula impanga icitumba, icintu cakusausya amanda pe, na wensi wino alapita apipi cilamupezya amano, nupya alapukunya sile umutwe.

¹⁷ Ndasalanganya antu yane inkolelo ya anisi yao, wa lukungu ulwatiluululwa nu muza waku ufumondaka. Ndayafutatila nupya ntalayazwilizya, lilyo lino uzanzo ulayaponela.”

Yapangila kukoma Yelemiya

¹⁸ Lyene antu yavwanga yati, “Izini mwe, muleke tuvwane ivyakufulula Yelemiya! Pano lyonsi kwene kumayanga yasimapepo akutusambilizya, na antu yamano akutupandako amano, nga na yakasema akusema ilandwe lyakwe Leza. Izini mwe, muleke tumupele imilandu, tute nu kuuvwa kuli vyonsi vino akulanda.”

¹⁹ Acino Yelemiya nawe ali pakupapatila kuli Yawe ati, “We Yawe uvwa vino nemo nkukupapata. Uvwa vino anisi yane yakumpangila.

²⁰ Uzye icumi, uyi ali cilambu ca pa usuma, apakuti yene avino yampangila? Iusya vino nemo nizile kunuli, ku kuyapapatilako, apakuti wemo utayafookela ukali ukali.

²¹ Caleka we Yawe, sungala uleke ana yao yafwe ku cipowe, kayafwe nu ku nkondo. Leka aci yao yafwilwe ana na yaiya. Leka aonsi yafwe ku mpungo, na alumendo leka yafwe ku nkondo.

²² Tumini iumba likasampe vyamu mang'anda yao mu kupumikizya. Uleke lyene mwauvwika impooma. Pano nemo yatiyanjimbila polowe umwakuti nize mponele mwenemo. Yatiyanteya ni vyakuti yize yandemeleko.

²³ Alino nawe kwene Yawe watumanya vii vyonsi vino yakupanga ukuti yangankoma. Utezya uyayelele uluse. Apa uyi wao onsi. Utezya ufute iviipe vyao. Yafwante pansi uyacimvye. Yacitepo cimwi apa nsita ino ucisosile.”