Yelemiya 16 - Amazwi Yakwe Leza 2013

Wanda wa ononesi

¹ Nupya kwene Yawe avwanga kunondi ati,

² “Utatwala umwanaci nanti ukuvyala ana aonsi na anaci mu ncende ii.”

³ Pasi pano apa ana anaci nanti aonsi alavyalilwa mu ncende ii, kumwi na yaisi na yanyina,

⁴ yalafwa imfwa ya ndwala ziipisye. Kutalaya wakuyalosya nanti ukuyaziika. Yalalala wa muvundo mu musili. Yalalowa ku lupanga nu ku cipowe. Ivyala vyao vilaya ivyakulya vya vyunyi vyamu lwelele ni vilyanyi vyamu mpanga.

⁵ Pano Yawe wavwanga wati, “Mutezya ukwingila mu ng'anda muno yakulosya. Mutezya ukuliila cakulya pamwi nayo nanti ukuyatekezya imyenzo, pano ni mfumya ulongo lwane kunoyali. Nimfumya usuma wane nu luse lwane kunoyali. Ivyalanda ne Yawe.

⁶ Akama na apina yalafwa mu mpanga kwene ii, lelo kusi umwi alayazika nanti kuyalosya, nanti uwakuicemba nanti ukupela ulukuzu apamulandu wao.

⁷ Kutalaya nanti wenga uwakumokwela umukate kuli yano yakulosya apakuyatekezya umwenzo pali yano afwililwe. Kutalaya nanti wenga wakumumwesya amanzi akumutonsya ku mwenzo apa kulosya isi nanti nyina.”

⁸ Nupya utakezye ukwingila mu ng'anda ya maliila. Utakezye kwikala nu kulya nu kumwa pamwi nayo.

⁹ Pano Yawe Wamaka yonsi, Leza wa ina Izlaeli wavwanga wati, “Lola ndafumya umu ncende ii, apa manso inu izwi lya nseko ni izwi lya nsansa, izwi lyakwe siwinga ni zwi lyakwe nawinga.

¹⁰ “Lino ulanena umutundu uu amazwi yaa yonsi, nayo yalakuuzya yati, ‘Uzye pacani cino Yawe watusowelela ulanda utaikulila vii? Uzye umulandu cii uno twacita. Uzye uyi cii uno twacita kuli Yawe Leza witu?’

¹¹ Lyene uce uyanene vino Yawe wavwanga wati, ‘Apamulandu wakuti ivikolwe vinu vyantazyezile nu kulondelela tuleza tuze, yatutumikilanga nu kutupepa.’ Yene yantazyezile nupya yatawasile amasunde yane.

¹² Lelo mwemo mwifya ukuluta yaso. Si lolini vino cila wenga akulondelela ulukumbwa lwa mwenzo wakwe wiipe, ukwaula nu kunguvwa foo.

¹³ Ali cino namamusumbila kunzi ya mpanga ino itamanyika kunomuli na kuli yaso. Ali kuno mulaombela tuleza tuze, usiku nu musanya. Ntalamukwatila uluse awe.”

Aina Izlaeli yaweluluka ukufuma ku uzya

¹⁴ Nga lelo Umwene wavwanga wati, “Lola amanda yaliza lino yalata ukulapa yati, ‘Umwi zina lyakwe Leza waumi uwafumizye aina Izlaeli mu mpanga ya Eguputo.’ ”

¹⁵ Lyene yalasenuka yalanda yati, “Umwi zina lyakwe Leza wa umi, wino wafumizye aina Izlaeli mu mpanga yaku katutu nu mu mpanga zyuze zyonsi muno yasalanganile. Pano ndayawezezya umu mpanga yao ino napiile ivikolwe vyao.”

Ukuvunukwa ukuli nkolelo

¹⁶ Yawe walanda wati, “Ndatuma avuvi ya nswi nyanya, yano yalayalema wa nswi. Ndatuma na alumba avule, nga nayo yalayalunga mu myamba yonsi nu mu macele.

¹⁷ Amanso yane yakaceceta vyonsi vino yakacita. Kusi nanti conga cino cafisama kunondi. Amaifyo yao yatange yutuke ku mulola wane.

¹⁸ Ndayakalipila liili apa ukakasi wao na pa uyi wao, pano yatiyakowezya impanga yane ku tuluwi twao. Yatiyazuzyamo upyanyi wane ku vintu vya uwelewele ivyaunkolanya sile.”

Ipepo lyakwe Yelemiya lya kutaila mu Mwene

¹⁹ We Yawe, we maka yane, we linga lyane, cakuzinamo cane mu wanda wa ulanda. Imitundu iliza kunuli, ukufuma ku mipaka ya mpanga ilalanda nu kuti, “Yatata yapyanyile ivyaufi utupu tupu, ivyaciwelewele, vyaula amaka.

²⁰ Uzye antu yangaipangila tuleza? Awe, ndi yacisile cico, ale lyene tutangaya a tuleza.”

²¹ Fwandi lyene ndayamanyisya calimwi amaka nu ulamba wane. Yene yalamanya ukuti nene indi Yawe.