Yelemiya 15 - Amazwi Yakwe Leza 2013

Kalanda ku antu aku Yuda

¹ Lyene Yawe avwanga kunondi ati, “Nanti angala Mose na Samueli yangimilila apa manso yane nu kupapata, nemo ntange nezye ukuuvwila antu yaa uluse. Wemo uyazingile sile ukutali uleke yapita.

² Ndi cakuti yakuuzya kuno yangalungama, uyanene ukuti Yawe wati, ‘Yamwi yali nu kufwa ku ndwala, nga ku ndwala kwene ali kuno yali nu kuya! Yamwi yali nu kufwa ku lupanga, nga ku lupanga kwene akuno yali nu kuya! Yamwi yali nu kufwa ku cipowe, nga ku cipowe kwene ali kuno yali nu kuya! Yamwi yali nu kusendwa ku uzya, nga ku uzya kwene ali kuno yali nu kufwa!’ ”

³ “Mu cumi anene ne Yawe nayapingwilile imikosi ii ini, kuti iyaponele. Yalayakoma na yasimbwa yalatakanya ivyala vyao. Ivyunyi navyo vilayakompola ni nyama zya mpanga zilalya ivilasyalako.

⁴ Nupya ndalenga ukuti antu yonsi panonsi yaizakazila sile uku ntete apa kulola ivintu vivyo, pamulandu wa vintu viipe vino Manase umwana umonsi wakwe Hezekiya wacisile mu Yelusalemu lino wali umwene waku Yuda.”

⁵ Yawe akuti, “Uzye aweni wino alamuuvwila ulanda, mwe ina Yelusalemu, nga aweni wino alamulilila ulanda? Uzye aweni aliimilila insita ikulu nu kuuzya umutende winu?

⁶ Mwemo mwankana. Mwemo mwamfutatila. Ali cino natimutambalikila ikasa lyane apa kumonona. Natintoonta nu kwelela.

⁷ Ndayulula nu mutumpulo apa mpongolo zya misumba ya mpanga ii. Nimpoka mwe antu yane ana nu kumulovya, pamulandu wakuti mutatiile imisango inu iipe.

⁸ Yamukamfwilwa yao yatiyavulilako umu mpanga ilya, ukuluta umusensenga uwamu nkumba yakwe yemba. Nakomile ana inu alumendo apa vilumba vyao, nu kuleka kuti yanyina yacule. Umu kupumikizya nayaponyezizye kunyunguluka nga ni ngofyo.

⁹ Nyina wi kwata cinimbali alazyenguka, mpaka umwenzo ukuputuka. Uluswepo lwakwe lwa kasanya lulasanguka imfinzi. Wene insonyi zilamulema mpaka azewane. Yao aalasyala impondo, yalayamalila ku anisi yao. Ne Yawe natindanda.”

Yelemiya wailizyanya ku Mwene

¹⁰ Kalanda kunondi! Uzye icani cino mayo wamvyalile? Nemo nkulemanila nu kupazyana nu muntu wensi mu mpanga ii. Nsiazimisya nanti ukwazima impiya. Lelo antu yonsi yakantipwila.

¹¹ Yawe, sileka ivitipu vyao vyonsi vimponele ndi cakuti nsikutumikila ningo, nu kupapatila anisi yane umu nsita ino intazi na malanda vyayaponile.

¹² Uzye kungaya umuntu angavuna icela cino cafuma ku katutu, cino catikinkanyiziwa nu mukuwa?

¹³ Yawe avwanga kunondi ati, “Ndatuma anisi kuti yasampe ivyuma vya antu yane, pakuti njavunuke apa maifyo yano yacita mu mpanga yonsi.

¹⁴ Ndaleka kuti yaye azya ya anisi yao mu mpanga ino yatamanya, pamulandu wakuti ukali wane ukoline wa moto, nupya ulafuluma amanda pe.”

¹⁵ Lyene inti, “We Yawe, cico cene wacimanya. Uwanjiusya nu kungazwilizya. Uwandandwila kuli yayo akanzunya. Wemo usisoka zuwa, acino utaleka yankome. Waiusya ukuti nemo nkutukwa pamulandu wako.

¹⁶ Wemo wavwanzile kunondi nga nani intezya amazwi yako yonsi. Nene wakwako, we Yawe Leza Wamaka yonsi, na mazwi yako ali luzango ni nsansa zyane.

¹⁷ Ntatala nazangila ukwikala mwiumba lya antu ya misowe, nanti ukusekaseka pamwi nayo. Lelo apa kuyela ilamulo lyako, nikalanga sile nenga nupya umusoke.

¹⁸ Uzye lyene pacani cino nkalu kucululuka? Uzye pacani cino vilonda vyane vyalengela ukupola? Uzye ukulonda kuti uye kunondi wa luzi lwa ucenjezi, ulwa manzi akansomba?”

¹⁹ Caleka Yawe avwanga ati, “Ndi cakuti waweluluka kunondi, ndakuwezya ku mulimo wakuntumikila. Ndi cakuti walanda vyampomvu, ivisi vyasilesile, lyene ulaya wa mulomo wane. Antu yaa yalaweluluka kunuli, lelo wemo citalinzile ukuya kunoyali.

²⁰ Ndakulenga kuti uye ilinga lya maka, ilya mukuwa, lya kukucingilila ku mutundu uu. Yene yalakulwisya, lelo yalaposiwa ku kucimvya pano ndaya nawe apa kukutaasya nu kukuwaka.

²¹ Ndakutuula ku makasa ya aipe nupya akakate.”