Yelemiya 14 - Amazwi Yakwe Leza 2013

Cilala, cipowe nu kukomwa ukwakuluma incecete

¹ Yawe anena ne Yelemiya pamulandu ni cilala ati,

² “Impanga ya Yuda ili mu malanda ni misumba ya iko ikufwa, na ikazi yamwenemo yakwalangana sile ku ucuzi. Mu Yelusalemu namo kwene muli impooma.

³ Akama yakutuma aomvi yao ku kuyatapila amanzi, nayo akula yaya ku vifula, yazana mu vifula musi amanzi. Lyene nayo ali pakuweluluka kweneko ni nsembo umwaula amanzi. Cintu cii iciyatovola nu kuyavulunganya, cakuti yavimba insalu apa manso.

⁴ Imisili yatiyumalala nu kulangoka pamulandu wakuti imvula kusi umu mpanga. Alimi nayo uku mwenzo kwatikufita nga yatiyavimba ni nsalu apa manso.

⁵ Umu mutengo namo mpombo watasya akana kano aivyalile pamulandu wakuti kusi umulemvwe.

⁶ Yapunda ya mpanga nayo yaimi apa twamba ala yakwasela sile wakwe yankusa. Yene yatiyafonka nu mu manso pamulandu wakuulilwa vyakulya.”

⁷ Antu yane yakundilila, yati, “Nanti angala amaifyo itu yakutusinila, we Yawe ule utwazwilizye sile ndi muno walavile. Twifya wakwe cimwi kunuli, na ucisanguka witu wapitilila.

⁸ Awewe sile wenga wemuno aina Izlaeli yakupaalila munuli. Awewe ukatutuula lino twacula. Uzye lyene pacani cino waya wa mwenyi umu mpanga, nanti wa mulendo akutuwilizya sile uwanda onga?

⁹ Pacani cino wayela wa muntu uwataulizya amano, nanti wa musambazi wino atakweti amaka akutupususya? We Yawe, cumi kwene wemo waya apakasi kitu? Swemo sweswe antu yako, utatutazyela, awe.”

¹⁰ Yawe nawe aasuka ati, “Antu yane yatemwisya ku lulumba, yene yasikaanya yakampingu yao. Ali cino ne Yawe nakana ukuyazengela. Nkaiusya ivinzulunzulu vyao, nga ndayavunuka apa kwifya kwao.”

¹¹ Lyene Yawe anena nupya ati, “Utakezye ukumpapata kuti nazwilizye antu yaa.

¹² Pasi pano nanti yangata ukulya, nemo ntange nuvwe inkuuta zyao. Nupya nanti yangandetela amawila yakoca na mawila ya mbezu, nemo ntalazangila munoyali awe. Lelo ndayakomola ku lupanga, ku cipowe nu ku ndwala.”

¹³ Lelo nani naasuka inti, “We Yawe Simwandalali, umanyile ukuti yakasema yakunena antu yati umu mpanga mutalapona inkondo nanti cipowe, pamulandu wakuti wayalaya ukuti mulaya sile icituku.”

¹⁴ Lyene Yawe aasuka ati, “Ala yakasema yayo yakusema sile vyaufi umwi zina lyane. Asi nene nayatumile, awe. Ntayapiile ilamulo lyakulanda nanti izwi lyonga kunoyali. Ala vilolwa vino yene yamusemela ivyaufi nu kusowela kwao ukwa vintu vyauwelewele sile vino yakalola.

¹⁵ “Nemo nkukunena we Yelemiya vino nemo nasya ncite ku antu yayo yakasema yano nemo ntatala natuma, yayo akalanda vino nemo ntayanenyile. Yene yakalanda ukuti kutalapona inkondo nanti icipowe umu mpanga ii. Ala nemo ndayakoma uku lupanga nu ku cipowe.

¹⁶ Nupya antu yano yakasemelako yalasumbwa umu miseo yamu Yelusalemu. Lilyo ale yatiyafwa ntangali ntangali uku lupanga nu kucipowe nu wakuyaziika aluula. Vintu vii vilacitikila alio na aci yao, ana yao aonsi na anaci kwene. Pano ndalandula uyi apa uyi wao.”

¹⁷ Yawe wampile ilamulo lyakunena antu pamulandu nu ulanda uno nakweti nga nani inti, “Amanso yane yakwituluka sile aminsozi umusanya nu usiku ukwaula nu kuta. Cizipe ntata ukulila pamulandu wakuti antu yane yatiyaponelwa nu uzanzo umwi uwipisye. Yati yaciswa ivilonda iviipisye.

¹⁸ Akula naya umu mpanga, ivyala vitupu avino nkuzana vya antu atiyakomwa umu nkondo. Nanti ndi naya umu misumba nkuzana antu yano yakusikila pamulandu ni cipowe. Yakasema na yasimapepo yakutwalilila kuomba imilimo yao. Lelo yatamanyile cino yakucita.”

Antu yapapata ku Mwene

¹⁹ We Yawe uzye watututazyela sile swe ina Yuda? Uzye watutupatilila sile swe ina Zioni? Uzye pacani cino watutimbwilila vii, ukali ukali cakuti twaposiwa nu kupola? Swemo twalondanga ukuikalila swenga ku matwi cele, lelo kutaya icuma nanti conga cino caloleka penepo. Swemo twalolelanga sile ukupola, lelo twikalila sile ukusokondwa.

²⁰ Ala swemo lyene twailongwela amaifyo itu, twazumila nu ufi wa vikolwe vitu kwene. Umu cumi swemo twakwifya.

²¹ Si ungala wiusye vino watulaya, utatusuula foo. Utazewanya umusumba wa Yelusalemu, umwaya icilimba cako ca wene calulumbi. Utonona upangano wako uno wapangana naswe.

²² Uzye kwaya akaluwi nanti konga pali tuleza twa inamasi kano kangatuletela imvula? Iyulu litupu nalyo kwene litangatutumila imvula. Lelo awewe sile wenga we Mwene witu, wemuno twataila Wewe sile wenga mpo ukacita vii.