Yelemiya 13 - Amazwi Yakwe Leza 2013

Icilangililo ca nsalu yamuindi

¹ Yawe avwanga kunondi ati, “Yanga ukakale umusipi wa nsalu yakuindizya, uizwale nu mu musana. Utakezye kuituwika mu manzi.”

² Fwandi nani ali vino nacisile umu kulondela amazwi ya Mwene.

³ Nupya kwene Yawe avwanga kunondi ati,

⁴ “Yanga ku Luzi lwa Yufulate, uye ukafise umuindi mu vipongo vya mawe.

⁵ Nani ali vino ncita, inja mfisa umuindi uku Yufulate ndi muno Yawe watanenela.”

⁶ Walanga papita amanda avule, Yawe avwanga kunondi ati, “Yanga ku Yufulate, uye ukafisulule insalu zino nakunenyile ukuyafisa kweneko.”

⁷ Nani ali pakuya ku Yufulate, ntandika nu kulonda pano nafisile. Awe mukwai inzizana. Lelo lino nazilolekesya, ndola ukuti zyononeka zitangazwalwa nupya.

⁸ Alino nupya Yawe avwanga kunondi ati,

⁹ “Umu musango kwene ndi uu, nemo ndamala ivilumba ku ina Izlaeli ni vya antu aku Yuda.

¹⁰ Antu ya aipe, nupya yene yakakana nu kuyela amazwi yane. Yene yatalama nupya yakomela sile ukwifya. Yakapepa utuluwi, tuleza tuze tuze sile nupya atuno yakatumikila. Ali cino fwandi nayo kwene yalakolana ni nsalu kwene zizyo, zino antu yatange yazizwale nupya.

¹¹ Pano ndi vikwene vino insalu zya kuindila zikapapatila ku musana wa muntu, ali vino nani kwene nkalonda ukuti aina Izlaeli yonsi na ina Yuda yandemasye. Apakuti yaye antu yane, yalenga na antu yauze yandumbanya nu kuncindika. Lelo icamupamba cico cene antu yane yasicilonda.”

Ipinda lya nkolo yakwe waini

¹² Yawe walanda wati, “We muntu we Yelemiya, nena aina Izlaeli ukuti yazuzye inkolo zyonsi na waini. Alino ndi yakuuzya yati, ‘Uzye tutamanyile ukuti umu nkolo zyonsi mulinzile mwazula waini?’

¹³ Lyene uyaasuke uti, ‘Nemo ne Yawe indamwesya antu amuno mpanga waini, mpaka sile yace yakoleke. Calola mukuti yano ndamwesya a yamwene, amu mupanda wakwe Davidi, yasimapepo na yakasema ukwikapo na ina Yelusalemu yonsi.

¹⁴ Lyene ndatola yaisi na ana yao nkayapumanye wa nkolo. Nemo ntalayuvwila nu luse foo. Ntaluvwa ulanda nanti sile uluse. Ndayalovya pyu.’ ”

Yelemiya wasoka antu apa vilumba vyao

¹⁵ Mwe ina Izlaeli mwe, ala tiini ivilumba vinu! Muvwikisye ningo, pano ne Mwene anene nkuvwanga.

¹⁶ Mwacindika Yawe Leza winu lino atacili waleta akalanda. Lino mwemo mutacili mutandike ukuipumola uku myamba pamulandu ni mfinzi. Lino uluswepo luno mwemo mukalolela atacili walusangula luye imfinzi.

¹⁷ Ndi cakuti mwemo musyakumuvwa, nemo ale namalililanga mu umfisolo. Apamulandu wa vilumba vinu, namalilisya wakwe cimwi cakuti na misonzi yamalukutanga. Apamulandu sile wakuti antu ya Mwene yatiyasendwa mu uzya.

¹⁸ Lyene Yawe avwanga kunondi ati, “Nena umwene nga unene na nyina kwene, namwene ukuti yasenke apa vilimba vyao vya wene. Pasi pano ivilongwe vyao vya wene iviyembe vyativipona ku mitwe yao.”

¹⁹ “Imisumba yamu Negebu yalailizizya nga kusi nanti wenga angapeka. Antu yonsi amu Yuda yatiyasendwa ku uzya.”

²⁰ Mwe ina Yelusalemu, tumpulini amanso mulole! Anisi inu ayayo yakufuma ku kayeya. Uzye antu yano mwemwe mukasunga yali kwi, yano mwakwatila cilumba?

²¹ Uzye lyene mulalanda uli lino antu kwene yayo yalamufutuka yatandike nu kumuteeka, antu yano mwelenganyanga ukuti ali yacuza inu? Kwene cilamuwaya vivi kwene vino umwanaci akauvwa apakulela.

²² Lino mulaayuzya mweisikulu muti, “Uzye pacani cino icintu cii catuponela?” Ala apamulandu wa maifyo inu aingi ali cino yalepolela insalu apa kumuzula nu kumulema apa maka?

²³ Uzye umwina Kusyi angasenula inkanda yakwe? Nanti uzye inangu ingasenula amaala yakweyo? Ndi cingaya vivyo ale lyene namwe kwene mwemuno mwikalila ukucita vya winyi mungata ukucita iviipe mutandike nu kucita visuma.

²⁴ Ala mwemo yayame Yawe alamwelulula wakwe cungu. Mulasendwa nu muza uno ukafuma mu lwanga.

²⁵ Yawe walanda ukuti lilyo lili syamo ililamuponela. Vili vino wene wapingula ukumucita, pamulandu wakuti mwemo mwamufutatila nu kutaila mu tuluwi tuleza twaufi.

²⁶ Yawe Leza umweneco aliwe alamuzula insalu, tale mukafyatoka tupu mukuvwe ni nsonyi.

²⁷ Wene wailolela kuno mukucita ivintu vino wapata. Umu myamba nu mu vyalo ali muno mukalondelela utuluwi, tuleza twa inamasi, ndi vino umonsi akacita wino akukumbwa umuci wa muze, ndi vino mfwalasi yakalume ikacita apakukokomela iya kaci. Kalanda kuno muli mwe ina Yelusalemu! Uzye alilaci lino mulakondolwa?