Yelemiya 11 - Amazwi Yakwe Leza 2013

Upangano ononwa

¹ Yawe wanenyile ati,

² “Uvwa amazwi aupangano. Alino unene antu amu Yuda nu mu Yelusalemu

³ ukuti ne Yawe Leza wa ina Izlaeli natiniika ulutipu apa muntu wensi wino asiyela amazwi aupangano uu.

⁴ Amazwi ali yamwi kwene yano nanenyile ni vikolwe vyao lino navifumizye mu Eguputo, impanga iyakoline wi lungu lya moto. Nayanenyile ukuti ndi yayela, lyene yalaya antu yane nga nani ndaya Leza wao

⁵ Lyene ndasunga nu ulayo wane uno nalavile ivikolwe vyao ukuti ndayapeela impanga ya cuma nupya ivunde ino yakweti na ndakai.” Nani mvwanga inti, “Endi Yawe.”

⁶ Lyene Yawe avwanga kunondi ati, “Yanga ku misumba yaku Yuda nu mu misolo yamu Yelusalemu. Kuume imbila yane kuku, unene antu yuvwe amazwi aupangano uu nu kuyalondela.

⁷ Pano ukufuma sile lino nafumizye ivikolwe vyao mu Eguputo, nayasopesizye wakwe cimwi ukuyela amazwi yane. Ukufika sile na pilelo nemo natwalilila ukusopa antu yane.

⁸ Lelo yene yasi yakuuvwa foo nanti ukuyeela. Yonsi pyu pasi pakuumalala nu kwifya lyonsi. Nemo nayakonkomezizye ukuyela upangano wane. Lelo yene yakana. Ali cino nani natinjaletela ukuvunukwa yonsi yano yalembwa mu upangano uu.”

⁹ Alino lyene Yawe avwanga kunondi ati, “Antu amu Yuda na ikazi amu Yelusalemu yatiyumana akapi yansangukila.

¹⁰ Yatiyasenukila ku maifyo ya vikolwe vyao ndi vino vyene vyakanyile kulondela amazwi yane. Lyene nayo ali vino yakucita. Yene yakupepa tuleza tuze. Aina Izlaeli kumwi na Ayuda yonona upangano uno napangine ni vikolwe vyao.

¹¹ Caleka lyene ne Yawe nkuyasoka ukuti namayaletela uononyi, nupya yene yatalutuka awe. Yamatangi ndi yalaizya tutulwe, nemo nsikwikangako amano.

¹² Lyene antu amu Yuda nu mu Yelusalemu yamayanga kuli tuleza tuno yakaocela impolelwa. Lelo kusi nanti cimwi cino tulayazwilizya lino uzanzo wayaponela.

¹³ Utuluwi kwene tuno antu amu Yuda yakwata twalingana ni misumba ino yakwata, nga aikazi amu Yelusalemu nayo yakuula utuvuwa utwakutuulila Baali impolelwa, kaleza kapupane, nato twalingana sile ni miseo yamu musumba kwene uu.

¹⁴ Alino cino fwandi wemo we Yelemiya utezya ukupapatilako antu yayo. Utanguzya nanti cimwi cakuti njacitile. Lelo yamaculanga nemo ntakusumbanga kweneko amano nanti yangalaizya uli tutulwe.”

¹⁵ Nupya Yawe avwanga ati, “Antu yano nemo natemwa ali antu yano yakucita ivintu viipe. Uzye insambu cii zino yakweti izyakuya mu Ng'anda yane ikulu? Uzye yene mu mano yao yakwelenganya ukuti ukulaya amalayo nu kutuula impolelwa ali vino vingayapususya ku uzanzo? Uzye cico cingayasansamusya?

¹⁶ Apa mpiti nemo natazile njama ukuti umuolivi umwi uvunde amafwa nupya uno wakopoka ni viseekwa umwisika ivisuma. Lelo apilelo pene namalepuka sile wa nkuwa. Namaoca amafwa alembe nu kukontola ni nsala zyonsi zyakweo.

¹⁷ “Anene kwene ne Yawe Wamaka yonsi nalemile Ayuda na ina Izlaeli wa mutingi. Apilelo pene namayazanza. Aeneco kwene yamailetetela pamulandu nu uyi wao, pano alio kwene yalenzile kuti insoke pamulandu wakutuula Baali impolelwa.”

Yapanga kukoma Yelemiya ku Anatoti

¹⁸ Yawe wamanyisizye calimwi umulandu uwipe uno anisi yane yalondanga kunkoma.

¹⁹ Nemo natontelile wa kana ka mfwele kano yakutwala ku kufyula. Nemo ntamanyile ukuti anene yakupangila ukuncita cimwi ala yakuti, “Mwe, lekini tukome Yelemiya, tumusinde wa cimuti cino cafikila apa nsita ya kulemba. Katumukome pakuti kutaca kuye nanti umwi uwa kumwiusya nupya.”

²⁰ Alino lyene nani impepa kuli Yawe inti, “Iye we Yawe Wamaka yonsi, wewe Mwene wino akalungika pa kuputula imilandu. Wemo ukaceceta vino antu yakwelenganya na vino yakuuvwa mu myenzo yao. Leka nemo indoleko kuno ukulandula pa antu yaa, pano nemo umulandu uu natuula kunuli.”

²¹ Aonsi amu Anatoti yano yalondanga kukoma ne Yelemiya ala yakunena yati, “Ndi cakuti watwalilila ukusema mwi zina lyakwe Yawe, lyene tumakukoma.”

²² Caleka Yawe wavwanga ati, “Nemo ndayavunuka! Alumendo yao yalakomwa ku nkondo. Na ana yao yalafwa ku nzala.

²³ Insita ndi yaca yafika ino nemo nteyanyizizye ukufulula aina Anatoti, awe cumi kutalasyala nanti wenga.”