Yakobo 5 - Amazwi Yakwe Leza 2013

¹ Mwe antu akama, ndakai nguvwini! Losyini nu kukuta pa malanda ali nu kumuponela!

² Vyuma vinu vyati viola mpiti, nga uwonyi nao walya insalu zinu.

³ Zaabu pamwi na siluva winu kwene vyonsi vikweti ngalawa, nga ngalawa kwene zii zilaya a kambone wa kumusinila nu konona mili inu ndi vino moto ukaonona. Mwemo mwaitulikila cuma mu manda kwene yaa a mpelelekezyo.

⁴ Mutacili mulipile aomvi malipilo yao, yano onsi akuomba mu vyalo vinu. Uvwini kuilizyanya kwao! Kulilizika kwakwe yao akakonganika vino yakamuzombwela kwati kuvwika kuli Leza, uwa maka onsi.

⁵ Umi winu muno nsi uwa kuipakizya mu vintu vyamutengo. Lelo ndakai mukoline wa ng'ombe ziine zino zikusendwa ku kukomwa.

⁶ Mwemo mwapingula nu kukoma antu akaele, yano atezizye kulwisya mwemwe.

Kuteeka mwenzo nu kupepa

⁷ Inane, lyene tekini myenzo kufika lino Umwene aliiza. Lolini vino mulimi akateeka mwenzo lino acili akulolela kuti vilimwa vya mpomvu vice mu calo cakwe. Wene akalolela nu kuteeka mwenzo kuti vipokelele mvula ya pa miundo ni yamu koolo.

⁸ Namwe kwene mulinzile kuteeka myenzo. Lekini kupaalila kwinu kutanenuka, pano wanda wa kwiza kwa Mwene wati upalama.

⁹ Inane, mutailizyanya wenga pa muze pakuti Leza atace amupingule. Kapingula watapalama, nupya ali pipi nu kuloleka.

¹⁰ Inane, iusyini yakasema yano avwanzile mazwi lino Umwene wayatumile. Lekini kuteeka kwa myenzo kuno yakweti na macuzi yao viye cilangililo kunomuli.

¹¹ Yaa, ayano tukati alongo pano yene yaposizye. Muuvwa vino Yobo watesile mwenzo, nga mwamanya na vino pacisila Umwene wamwazwilizye. Pano Umwene wakwatisya mizu nu luse.

¹² Kuluta pali vyonsi, inane mutaomvya mulapo lino mukulaya. Mutalumbula iyulu nanti insi nanti cintu cili consi mu milapo. Lelo lino mukuzumila muvwange muti, “Ee” na lino mukukana muvwange muti, “Awe.” Ndi mwacita vii, lyene Leza atalamupingula.

Kupepela alwale

¹³ Uzye munomuli muli umwi ali mu ntazi? Wene alinzile kupepa. Uzye kuli umwi watazanga? Wene alinzile kwimbila nyimbo zya kulumbanya Leza.

¹⁴ Uzye kuli umwi uwatalwala? Wene alinzile kwama aikolo yi uvi, nao yalamupepela nu kumupaka amafuta mwi zina lya Mwene.

¹⁵ Ndi yataila lino yapepa ale mulwale alapoziwa. Mwene alamukatusya, nga nu kumwelela maifyo yano wacita.

¹⁶ Caleka, lyene mwailongwela maifyo inu wenga nu muze, nu kupepelana kuti mupoziwe. Ipepo lya muntu wino akacita vyawololoke lyakwata maka cuze.

¹⁷ Eliya wali umuntu uwali wakwe sweswe. Wene wapefile nu mwenzo onsi kuti imvula itatonya, kulingana ni myaka itatu na citika imvula itatonyizye.

¹⁸ Nupya wapefile iila na lyuze, ni mvula itandika kutonya nu musili iumezya nu kukuzya vimelwa.

¹⁹ Inane, umwi uwa munomuli ndi wasya inzila ya cumi muze alinzile kumuwezya nupya.

²⁰ Iusyini ukuti wino wensi uwawezya kaifya kufuma ku viponge vyakwe ala wene alamutuula kufuma ku mfwa nga nu kuleka kuti aelelwe maifyo yakwe aingi.