Yakobo 2 - Amazwi Yakwe Leza 2013

¹ Inane, mwemo mwataila muli Yesu Klistu Mwene witu uwa lulumbi. Acino mutalinzile kukwata kasoozi pa antu kulingana na vino yakaloleka kunzi.

² Ndi cali muntu mukama wino azwite mbalaminwe iyapangwa kuli zaabu nga ni nsalu ziyembe cuze wiza mu ukongano winu, nga nu mupina nawe kwene aiize, ale azwite vinyanko.

³ Ndi cakuti mwacindikisya umuntu wino azwite ningo nu kumunena muti, “Ikala papa pa cilimba cisuma kuluta,” lelo munena mupina muti, “Imilila papa, nanti ikala pansi pa nanti pano pipi ni ngazo zyane,”

⁴ ale lyene muli nu mulandu wakucita upinguzi uno wimikwa pa kwelenganya kwipe.

⁵ Uvwini, mwe inane yakundwe! Leza wasolwile apina amu nsi ii kuti ayacite akama mu utailo nga kuti yakumeko ku wene uno walavile yao amutemwa.

⁶ Lelo mwemo mukasaalula apina! Uzye asi akama akamucuzya nu kumutintanya yamutwala ku vilye vya milandu?

⁷ Yakwene alio akalandila zina lisuma viipe, zina lya Mwene winu.

⁸ Ndi mukuyela Isunde lya Wene ilyaya mu malembelo likati, “Uwatemwa umuzo ndi vino waitemwa.” Ale mukucita ningo.

⁹ Lelo ndi mukucitila antu kulingana ni milolekele yao yaku mwili, ale lyene muli nu mulandu uwa kwifya, nupya mulaya nu mulandu uwa kuntayela masunde.

¹⁰ Wino wensi uwakana kuyela isunde lyonga wene ali nu mulandu uwa kuntayela masunde yonsi.

¹¹ Pano wino uwavwanzile ati, “Utalongozya” ali wenga kwene uwavwanzile ati, “Utakoma.” Nanti angala usyalongozya, ndi wakoma ale cili conga wemo usyayela masunde.

¹² Mwavwanga nu kucita vintu wa antu yano yalapingwilwa kwi sunde lino likatulenga kuya antungwa.

¹³ Pano Leza wene atalaya na mizu ku muntu wino atali na mizu ku yauze. Lelo pano mizu yaluta upinguzi, Leza alaya na mizu.

Utailo ni milimo

¹⁴ Inane ndi umwi walanda ukuti akweti utailo lino milimo yakwe isuma isyakulanga cisininkizyo cimwi cakuti akweti utailo, uzye usuma cii ungaya mu kulanda kwakwe? Uzye utailo uu ungamutuula?

¹⁵ Ndi kwali aina ya muntu, yakalume na yakaci yano yulilwa vyakuzwala ni vyakulya.

¹⁶ Uzye cisuma cii icingaya mu kulanda kwinu ndi mwayanena mwati, “Leza amupolelele! Mwasungwa mu kaye nu kulya ningo!” Ndi mutangayapeela vikalondwa mu kusunga umi, ale musi cisuma cimwi.

¹⁷ Vivyo kwene ivili nu utailo. Utailo ndi usyakutungulula ku kucita milimo isuma ala wene ufwe!

¹⁸ Ndi cali umuntu umwi avwange ati, “Muntu wenga wakwata utailo, lino muze wakwata milimo.” Kulanda kwane kukuti, “Mundange vino umuntu angakwata utailo kwaula milimo isuma. Namamulanga utailo wane vino uli kupitila mu milimo yane.”

¹⁹ Uzye wataila ukuti kwaya sile Leza wenga? Cisuma! Mipasi yankota nayo kwene yataila, nupya ikaoopa nu kuzakaza.

²⁰ Ciwelewele we! Uzye ukulonda kuti yakulange vino utailo uno usyatungulula ku kucita milimo isuma ala wene uwasilesile?

²¹ Uzye Abulaamu cikolwe citu wacisilwe uli mololoke pa manso yakwe Leza? Cali umu milimo yakwe isuma lino wene wapile Isaki mwana wakwe impolelwa pa kavuwa.

²² Uzye mutakulola? Utailo wakwe waomvile pamwi ni milimo yakwe. Utailo wakwe wasininkiziwe kuya ufumaluke kupitila mu milimo yakwe.

²³ Na malembelo yafikiliziwe yano yakati, “Abulaamu wataile Leza, nga pamulandu wa kutaila kwakwe Leza wamuzumile kuya mololoke.” Vii avino Abulaamu wizile aamwa ukuti a cuza wakwe Leza.

²⁴ Lyene mwalola ukuti muntu akacitwa kuya mololoke pa manso yakwe Leza kupitila mu milimo yakwe isuma, asi sile mu utailo wakwe.

²⁵ Vivyo kwene avino cali na kuli Laabu cizelele. Wene wacisilwe kuya mololoke pa manso yakwe Leza kupitila mu milimo yakwe apa kuzengela nengu zya ina Izlaeli nu kuyazwa kongoloka, yapita ku museo uze.

²⁶ Caleka, vino mwili uwaula mupasi ala ufwe, vivyo kwene nu utailo uwaula milimo isuma nao ufwe.