Yakapingula 9 - Amazwi Yakwe Leza 2013

Ukulanda vyapali Abimeleki

¹ Abimeleki umwana wakwe Gidyoni waile aikala mu musumba wa Syekemu ukwikalanga akazi kakwe nyina, nga

² ayanena kuti yuzye aonsi amu Syekemu yati, “Uzye icingamuzipila icani? Ukuteekwa ku ana aonsi amakumi cinimbali yakwe Gidyoni, nanti ku muntu wenga mpo? Iusini ukuti nene wakazi kinu kololo.”

³ Lino akazi kakwe nyina yaya yanena aikazi amu Syekemu ivintu vii vyonsi, imyenzo yao yonsi kwene inyomelela kuli Abimeleki. Pasi pano wene wali wakazi kao kololo.

⁴ Iyamupeela ulupiya lwakwe siluva ukulingana amakumi cinimbali ukufuma mu ng'anda ikulu yakwe Baali Beliti. Ulupiya kwene lulo luli luno Abimeleki aomvya ku kulembelapo awelewele, yamapuzu akuti yamulondela.

⁵ Alino alungama ku ng'anda yakwe isi Ofula, nga kuku kwene apapela yi we lyonga, akoma aina yonsi, ana yakwe Gidyoni aonsi amakumi cinimbali. Lelo Yotamu umwana umonsi nupya nkwangu wakwe Gidyoni wafisime nga yatamukomile.

⁶ Lyene aonsi yonsi amu Syekemu nu mu Beti Milo iyuminkana pamwi nga yakongana ku muti wamuzilo, muoko waku Syekemu, kuko kuno yisile Abimeleki pa cilimba ca wene kuti angaya umwene wao.

⁷ Lino Yotamu uvwa pali cii, aya aimilila papela ya Mwamba wa Gelizimu nga apunda kunoyali ati, “Munguvwe mwe onsi amu Syekemu, pakuti Leza namwe amuvwe!

⁸ Pali kalai. Imiti yaitezile umu nzila ku kuyasolola umwene uwakuti aiteeka. Alino inena muolivi iti, ‘Sungala uye umwene witu.’

⁹ “Lelo muolivi nao iwasuka uti, ‘Pakuti imuteke, suka ntale nte ukupanga amafuta yane, yano yakaomvya pa kucindamikako tuleza na antu.’

¹⁰ “Lyene imiti inena umusamvu iti, ‘Si iza mwandi wewe uye umwene witu.’

¹¹ “Lelo umusamvu iwasuka uti, ‘Pakuti imuteke, suka ntale nte ukuseeka ivizao visuma nupya ivilyompe.’

¹² “Acino lyene imiti inena umutingi iti, ‘Si iza mwandi wewe uye umwene witu.’

¹³ “Lelo umutingi iwasuka uti, ‘Pakuti imuteke, suka ntale nte ukupanga waini, wino akasansamusya tuleza na antu.’

¹⁴ “Acino lyene imiti yonsi inena umuti wa myunga iti, ‘Si iza mwandi wewe uye umwene witu.’

¹⁵ “Umuti wa myunga nao iwasuka uti, ‘Ndu mucumi mukasi munjike pa cilimba ca wene, lyene izini muuwe mu cisao cane. Lelo ndi mutangiza, umoto ulafuma mu misambo yane iya myunga nu koca imiti imikelide yaku Lebanoni.’ ”

¹⁶ Yotamu atwalilila ukulanda ati, “Lyene uzye mwemo mwacisile ufumacumi pa kwika Abimeleki pa cilimba ca wene kuti aye umwene? Uzye mwacindike ukwiusya kwakwe Gidyoni nu kucitila ang'anda yakwe visuma, iviine ni vicitwa vyakwe.

¹⁷ Iusyini ukuti tata wamulwilile ulwi. Wene waitezile umu mfwa pakuti atuule mwemwe ku ina Midyani.

¹⁸ Lelo ilelo mwasangukila ang'anda yakwe tata. Mwakoma na ana yakwe aonsi ali amakumi cinimbali, api we. Mwatola Abimeleki, umwana wa mwisote, mwamucita ukuya umwene waku Syekemu pano sile umunyonko.

¹⁹ Acino fwandi ndi cakuti umu ufumacumi amuno mwacitile Gidyoni na ang'anda yakwe yonsi, api lelo katuti Abimeleki kaiteke ni nsansa, namwe kwene kamuye aluzango nawe.

²⁰ Lelo kwene ngasi vivyo, umoto ufume kuli Abimeleki nu koca aina Syekemu na ina Beti Milo, nupya umoto ufume mu ina Syekemu na ina Beti Milo nu koca Abimeleki.”

²¹ Lyene Yotamu autuka, nga aya aikala ku Beeli pamulandu wakuti wali ni ntete kuli Abimeleki, umwina wakwe.

²² Abimeleki wateesile aina Izlaeli pa myaka itatu.

²³ Lyene Leza alenga kuti Abimeleki na ikazi yaku Syekemu yapusana, nga nayo iyamusangukila.

²⁴ Ni cintu cii cacitike pakuti cisikane na cino Abimeleki wacisile, ica kukoma ana amakumi cinimbali yakwe Gidyoni, nga nupya cisikane na vino aikazi yaku Syekemu yamukomelezyanga.

²⁵ Antu aku Syekemu yika aonsi akuteyamila Abimeleki pa tunsonsi twa myamba, nga nayo yazanzanga nu kwiila wensi uwapisile umu nzila ilya. Abimeleki nawe yamunenyile pa cintu cii.

²⁶ Alino Gaali, umwana wakwe Ebedi aiza ku Syekemu pamwi na aina yakwe aonsi, nga na ikazi yakweneko iyamutaila.

²⁷ Yonsi kwene iyafumila ku vyalo vyao ivya matingi, iyakulula amatingi, iyapanga waini nga iyacita icimulo cakuzevya. Yaya yingila mu ng'anda ikulu yakwe leza wao, muno yalile nu kumwa nga iyatipwila Abimeleki.

²⁸ Gaali, umwana umonsi wakwe Ebedi, avwanga ati, “Abimeleki pasi vino ali! Na Syekemu kwene aweni wino tungazakaza? Uzye pacani cino tungatumikila Abimeleki? Uzye wene asi umwana wakwe Gidyoni? Uzye Zebuli asi uwakwe ciili kunoli? Uzye pacani cino tungamutumikila? Cazipa muye acumi kuli Hamoli, icikolwe cinu, nupya isi wakwe Syekemu!

²⁹ Cange cizipe nene inatungulula antu yaa! Pano lyene ningafwampula Abimeleki. Ningatala imunena inti, ‘Komya ivita vyako pakuti twize tulwe!’ ”

³⁰ Zebuli, mulasi wa musumba ulya, asoka pa kuvwa vino Gaali umwana umonsi wakwe Ebedi wavwanzile.

³¹ Alino atuma inkombe kuli Abimeleki uwali ku Aluma, ku kumunena ziti, “Gaali umwana umonsi wakwe Ebedi, na ina yakwe aonsi yatiyiza ku Syekemu, nga yatakukuzumilizya ukwingila mu musumba ulya.

³² Acino fwandi ukatuke pamwi na antu yako usiku, muye mukafisame umu mpanga.

³³ Alino mutondo katondotondo lino ilanzi litacili litunke, mukize mukazinguluke umusumba ulya. Pasi pano lino Gaali ni vita vyakwe yalakatuka ku kwiza mukomenkanya, mukayafulule icikalale kwene apapezile amaka inu.”

³⁴ Acino Abimeleki ni vita vyakwe vyonsi iyatenuka usiku nu kuya fisama ukunzi ya musumba wa Syekemu, umu mpuka ziini.

³⁵ Lino Abimeleki na antu yakwe yalola Gaali umwana umonsi wakwe Ebedi wiza wafuma nu kwimilila pa mpongolo ya musumba ulya, iyasokoloka mu ncende zino yafisimemo.

³⁶ Lino Gaali wayalola, anena Zebuli ati, “Lola, antu ayayo yakutentemuka umwamba.” Zebuli nawe amwaasuka ati, “Yasi antu foo! Wasombwa sile ni vinzingwa vya mwamba, ivikoline na antu.”

³⁷ Nupya kwene Gaali avwanga ati, “Lola! Antu yakutentemukila lwaku cimfononkela ca mwamba, nayauze nayo yatunkila ku nzila iyapita pa muti uno yakati muoko, wakwe kasapola!”

³⁸ Lyene Zebuli amunena ati, “Ale lelo citapo cimwi! Uzye asi wewe walandanga uti, ‘Abimeleki aweni! Uzye pacani cino tungamucindikila?’ Yakwene ali antu yano wemo wasuulanga nu kutumfya. Ale lyene katuka ukalwe nayo!”

³⁹ Gaali nawe pali pakutungulula aikazi amu Syekemu ayafumya ku kulwa, nga iyalwa na Abimeleki.

⁴⁰ Gaali pali pakutuka, nga Abimeleki amucocovya. Antu avule yacisike pa mpongolo ya musumba ulya.

⁴¹ Alino Abimeleki aswilila ku Aluma. Zebuli nawe azinga Gaali na ina yakwe aonsi mu Syekemu pakuti nupya yataikala mwenemo.

⁴² Uwanda uwalondelilepo Abimeleki iyamunena ukuti aikazi amu Syekemu yakweti ipange lya kufumila ku vyalo.

⁴³ Caleka atoola ivita vyakwe, avyankanya mu mpuka zitatu, nga iyafisama mu vyalo, yala yakulolela. Lino Abimeleki walola antu yakufuma mu musumba, asokoloka ku kwiza yakoma.

⁴⁴ Lino Abimeleki ni mpuka yakwe yasimwilila ku mpongolo ya musumba kuti yakacilikilepo, impuka zyuze ziili izizanza antu ali mu vyalo nu kuyakoma yonsi pyu.

⁴⁵ Uwanda ulya onsi ulwi iutwalilila. Abimeleki apokolola umusumba ulya, akoma aikazi ya mwenemo, autamola nu kukanya umusilya mwenemo.

⁴⁶ Lino intunguluzi zyonsi izyali pa lupungu lwaku Syekemu zyuvwa vivyo, iziya ku kuzina mu ng'anda ikulu yakwe Eli Beliti.

⁴⁷ Lino Abimeleki uvwa ukuti yatiyakongana mu ng'anda ikulu yakwe Eli Beliti,

⁴⁸ aya akwela pa Mwamba wa Zalimoni pamwi na antu yakwe. Kuku kwene atoola impasa alino atema umusambo wa muti nga awika pa ciye. Anena ni vita vyakwe ivyali nawe ukucincila nu kucita icili conga kwene.

⁴⁹ Acino cila muntu atema ulukwi. Lyene iyalondela Abimeleki nu kutulika inkwi zizi ukufika papela ya lupungu. Avili vino yocelile yonsi ali mwenemo, nga yonsi ali mukasi iyafwa. Yonsi afwile yali manye izimbi lyonga, aonsi na anaci.

⁵⁰ Lyene Abimeleki aya ku musumba wa Tebezi, auzinguluka nu kuupoka.

⁵¹ Kuku kwali ulupungu ulukome sana, nga antu yonsi, aonsi na anaci kwene akuno yasimwilanga. Yene yaiyalilanga nu kukwela apilali.

⁵² Lino Abimeleki wiza ku kuzanza ulupungu lulu, akwela aya pa mulyango kuti aoce ulupungu.

⁵³ Lelo umwanaci umwi amuponyezya umwanansyo pa mutwe amulepula icipanga.

⁵⁴ Lyene zuwazuwa Abimeleki aama umusenda mpamba wakwe nga amupeela ilamulo ati, “Somola ulupanga lwako unkome, pano ntakasi kuti antu yakize yati umwanaci uwatamukoma.” Acino umusenda mpamba wilya amutota atulinkanya ulupanga mu mwili wakwe, nga afwa.

⁵⁵ Lino aina Izlaeli yalola ukuti Abimeleki watafwa, yonsi kwene iyaswilila kumwao.

⁵⁶ Avino Leza walandwile pa nkota zyakwe Abimeleki zino wacisile izya kukoma ana yakwe aonsi amakumi cinimbali.

⁵⁷ Leza aleka nu kuti aikazi amu Syekemu nayo kwene yaculilemo pa nkota zyao. Fwandi cali wakwe vino Yotamu, umwana wakwe Gidyoni wavwanzile pa kuyatiipa ukuti yalaculilamo.