Yakapingula 8 - Amazwi Yakwe Leza 2013

Ukucimviwa kwa ina Midyani ukwakusyalikizya

¹ Lyene amu mutundu wakwe Efulemu iyanena Gidyoni yati, “Uzye pacani cino utatwamile lino mwaile ku kulwisya aina Midyani? Uzye pacani cino wacitile cii kunotuli?” Iyailizyanya wakwe cimwi pali cii.

² Lelo Gidyoni ayuzya ati, “Uzye cino nacisile icani icitange cilingane navino mwemo mwacisile? Nanti vinono sile vino mwe ina Efulemu mwacisile vyene ivya mpomvu ukuluta vino uluko lwane lonsi lwacita.

³ Nanti cili vivyo, mwemo mwakomile Olebu na Zeebu, aene yalya yaili ya ina Midyani ukupitila sile mu maka yakwe Leza. Uzye icani cino nemo nacita cino antu yangakolanya na cino mwemo mwacisile?” Lino wene wavwanga vii, nayo iyawezya umwenzo.

⁴ Pa nsita ilya walanga Gidyoni na antu yakwe imyanda itatu yatiyalamba mpiti Luzi lwa Yodani. Ala yatiyatonta, lelo yatwalilile kucocovya anisi yao.

⁵ Lino yafika ku Sukoti, Gidyoni anena aonsi aikalanga mwenemo ati, “Napapata pelini ivita vyane imikate. Yene yatiyatonta. Nemo ndondelile Zeeba na Zalemuna, yamwene ya ina Midyani.”

⁶ Lelo intunguluzi zyamu Sukoti izivwanga ziti, “Uzye pacani cino tungapelelela ivita vinu ivyakulya? Mwemo mutacili muleme Zeeba na Zalemuna!”

⁷ Acino Gidyoni avwanga ati, “Cisuma lino Yawe alapeela Zeeba na Zalemuna mu makasa yane alino ndiza nkaakole iminyefu inu ku myunga yamu lwanga na yankololwe.”

⁸ Lino Gidyoni wafuma kuku pali pakuya ku Penueli, nu kulenga ivintu vili vimwi kwene ku antu akweneko. Lelo aikazi yaku Penueli iyamwasuka wakwe vino aina Sukoti yamwaswike.

⁹ Acino ayanena ati, “Ndaweluluka umu kucimvya, nga ndiza nonone ulupungu luu.”

¹⁰ Zeeba na Zalemuna yali ku Kalekoli pamwi ni vita vyao. Apa vita vyonsi vya mitundu yamu lwanga, ivyasile vyali namanye amazimbi ikumi na yasano. Ivita ivyakomilwe vyali amazimbi umwanda na makumi yaili.

¹¹ Gidyoni alondela umuseo lwaku lutwe lwa lwanga, ku ufumondaka wa Noba na Yogobeya, nga mukupumikizya azanza ivita vya anisi.

¹² Zeeba na Zalemuna, yamwene yaili ya ina Midyani, iyutuka. Lelo wene ayacocovya nu kuyalema, acimvya yonsi pyu.

¹³ Lino Gidyoni akuweluluka ku ulwi, ala akupita umu nzila yaku Helesi,

¹⁴ alema umulumendo uwafumile ku Sukoti nga amuuzikisya. Alino umulumendo wilya alemba nu kumutantikila amazina amakumi cinimbali na cinimbali ya ntunguluzi zikalamba zyamu Sukoti.

¹⁵ Alino Gidyoni aya ku onsi amu Sukoti, ayanena ati, “Mwiusye lino mwakanyile ukungazwa! Mwavwanzile ukuti mutangapeela icakulya icili consi ku vita vyane vivyo ivyatonsile. Mwansesile imuti uzye watulema Zeeba na Zalemuna? Ale lelo asi yaa?”

¹⁶ Gidyoni pali pakulema intunguluzi zizi zyamu Sukoti azivupola ni myunga na yankololwe amu lwanga.

¹⁷ Aomola nu lupungu lwao kwene ulwa ku Penueli nu kukoma aonsi amu musumba ulya.

¹⁸ Lyene Gidyoni auzya Zeeba na Zalemuna ati, “Uzye antu yano mwakomile ku Taboli yalolekanga uli?” Nayo iyamwasuka yati, “Yalolekanga wakwe mwemwe, nupya yonsi yalolekanga wa ana yamwene.”

¹⁹ Gidyoni pali pakuvwanga ati, “Yali aina yane aonsi yano twavyalwa inda yonga. Nupya nalapa umwi zina lyakwe Yawe waumi ukuti iciya cakuti mutayakomile, lyene ntange nelenganye ukukoma mwemwe.”

²⁰ Alino anena Yeteli umwana wakwe uwi yeli, ati, “Ale kuko, yakome!” Lelo umulumendo wilya atafumizye ulupanga lwakwe. Awesyoka, pamulandu wakuti wali akalumendo akance.

²¹ Alino Zeeba na Zalemuna iyanena Gidyoni yati, “Katuka sile utukome wewe kwene! Ivyaya umonsi, ivilinzile kuya na maka yakwe.” Acino Gidyoni akatuka, akoma Zeeba na Zalemuna, alino atoola ni viyembelo ivyali mu nsingo zya ngamila zyao.

²² Pacisila cakwe cico aina Izlaeli pali pakunena Gidyoni yati, “Vino wewe watukulula ku lucu lwa ina Midyani, fwandi wewe kwene umaya intunguluzi itu, nupya avino cilaya nu ku amu mupanda wako kwene.”

²³ Gidyoni ayanena ati, “Nemo ntalaya umwene winu, nanti umwana wane kwene. Yawe alinzile kuya umwene winu.”

²⁴ Nupya Gidyoni atwalilila kuyanena ati, “Nkamulenge sile icintu conga. Cila muntu ampeeleko akalielena api sala linu pali vino mwasamfile.” (Amu mupanda wakwe Isumeli yazwalanga amaelena wa antu yauze amu lwanga.)

²⁵ Antu yalya iyamwasuka yati, “Twatitutemwa, tumakupeela.” Alino iyanza insalu nga cila muntu aikapo amaelena yano wasamfile.

²⁶ Amaelena yakwe Zaabu yano Gidyoni wapokelile yafinyile namanye amakilogalamu amakumi yaili, ukwaula kupendelako iviyembelo vyuze, amakoza, utuwangili, vyaku matwi, insalu ziyenzulukile izyazwalanga yamwene aku Midyani ni vimisipi ivyazwalanga ingamila zyao umu nsingo.

²⁷ Zaabu kwene wiyo awino Gidyoni wapangileko efodi, nga amuika mu musumba wa Ofula, umusumba wakwe. Aina Izlaeli yonsi iyafutatila Yawe iyatandika ukuya kuku ku kupepa akaluwi kaka. Icintu cii lyene iciya iciteyo kuli Gidyoni na amu ng'anda yakwe.

²⁸ Avino antu amu Midyani iyayacimvya ku ina Izlaeli, nupya yatatwalilile ukuya icakuyasakamika. Impanga ilya yatenzi ku matwi cele pa myaka amakumi yani, mpaka ni mfwa yakwe Gidyoni.

Imfwa yakwe Gidyoni

²⁹ Pacisila cakwe vii, Gidyoni aswilila kumwao kololo, akuno aya aikala.

³⁰ Wene wakweti ana amakumi cinimbali pamulandu wakuti watwite aci avule.

³¹ Nupya wakweti muci namuze, uwikalanga ku Syekemu. Wikwene uwamuvyalile umwana umonsi, nga nawe amutemela izina ati a Abimeleki.

³² Gidyoni, umwana wakwe Yoasyi, akota pa myaka isuma. Asuka afwa, iyamuzika mwi cele lyakwe isi Yoasyi, ku Ofula, umusumba wa luko lwakwe Abiezeli.

³³ Pacisila ca mfwa yakwe Gidyoni, aina Izlaeli nupya kwene yatali acumi kuli Leza nga iyapepa tuleza Tubaali. Iyaipangila Baali Beliti ukuya ali leza wao.

³⁴ Yene yatatwalilile kutumikila Yawe Leza wao uwayatuulanga ku anisi yao yonsi ayazingulwike.

³⁵ Yatataizye ku ang'anda yakwe Gidyoni pa visuma vyonsi vino wene wacitile aina Izlaeli.