Yakapingula 7 - Amazwi Yakwe Leza 2013

Gidyoni wacimvya aina Midyani

¹ Katondotondo, Yelubaali (kuli kuti Gidyoni) nga na antu yakwe yonsi iyakuula insakwe ku kafukoka ka Halodi. Insakwe ya ina Midyani yayelile ku katutu ukufuma pano yali umu cifoloma pipi nu Mwamba wa Mole.

² Yawe anena Gidyoni ati, “Antu yano uli nayo yavulisya, nupya asi amuno ningacimvizya aina Midyani. Pakuti aina Izlaeli yataca yifye kunondi apakuitasya ukuti yaituula aisikulu ku maka yao,

³ ndakai unene antu uti, ‘Wensi akuzakaza ku ntete alinzile afume pa Mwamba wa Gileadi aswilile ukwakwe.’ ” Acino antu amazimbi amakumi yaili na yaili yaswilile kumwao, ikusyala sile antu amazimbi ikumi.

⁴ Lelo Yawe anena Gidyoni ati, “Antu yacivuzile. Yasende ukuli amanzi, kuli kuno nayakusolwela yao ali nu kusyala. Ndi nakunena nati, ‘Umuntu wi amapita nawe,’ ale wene amapita. Lelo ndi nakunena nati, ‘Umuntu wi atakupita nawe,’ ale wene atakupita.”

⁵ Acino Gidyoni asenda aonsi yalya ukwali amanzi. Kuku kwene Yawe amunena ati, “Tola antu amakamvulanga amanzi pakumwa wakwe simbwa uyapaatule kuli yao amafukamanga pa kumwa amanzi.”

⁶ Aonsi yonsi akamvwile amanzi wakwe yasimbwa yali imyanda itatu. Asilepo yene yamwile amanzi ala yatiyafukama.

⁷ Yawe anena Gidyoni ati, “Aonsi yaa imyanda itatu atiyakamvula amanzi wakwe yasimbwa, ali yano ndaomvya pa kutuula mwemwe nu kupeela aina Midyani mu makasa yako. Asyala yene yonsi leka yaswilile kumwao.”

⁸ Acino Gidyoni ata aina Izlaeli yonsi asyala, nga iyaswilila kumwao. Lelo asunga yaya kwene imyanda itatu, ayano iyatola intandala ni nyambi zya vyakulya ni vyakumwa ivya yauze. Insakwe ya ina Midyani yali pisika lya nkambi yao mu cifoloma.

⁹ Umu nsita ya usiku ulya Yawe anena Gidyoni ati, “Katukini muye mukazanze insakwe yao. Namupeela ukucimvya pali aliyo.

¹⁰ Lelo ndu kuvwa intete zyakuya zanza, tentemuka ku nkambi ilya pamwi na Pula, umuomvi wako.

¹¹ Umaya ukuvwe vino yakulanda, nga lyene umaposya kuti ukazanze.” Acino Gidyoni na Pula umuomvi wakwe iyatentemukila ku mbali ya nkambi ilya ukwali anisi yao.

¹² Aina Midyani, na ina Amaleke, nga na amu mitundu yamu lwanga ala yatiyalimba mu cifoloma consi kwati amakanta ku wingi, nupya yakweti ingamila izivule wa musensenga uwamu nkumba yakwe yemba.

¹³ Lino Gidyoni wafika, auvwa umonsi umwi akunena cuza wakwe ati, “Inalola umukate uwapangilwa nu usu wakwe baale ala ukukunkulukila mu nkambi itu nu kupuma mwi taalu. Itaalu nalyo pali pakupona pa musili.”

¹⁴ Cuza wakwe wilya nawe pali pakumunena ati, “Umukate uwo ulupanga lwakwe Gidyoni umwina Izlaeli, umwana wakwe Yoasyi. Iciloto cico calola sile mukuti Leza watapeela impanga ya Midyani kumwi ni vita vitu vyonsi mu makasa yakwe Gidyoni!”

¹⁵ Lino Gidyoni uvwa iciloto cico ca muntu wilya na muno yacilotwela, apona pansi afupime nga apepa Yawe. Lyene aswilila ku nkambi ya ina Izlaeli nga avwanga ati, “Katukini! Yawe akupeela ivita vya ina Midyani mu makasa inu!”

¹⁶ Alino Gidyoni apalukanya antu yakwe imyanda itatu mu mpuka zitatu nga apeela intandala na kalweso umwaula cimwi kuli cila muntu, nga mukasi ya kako mwali sile ulwenge lwa moto.

¹⁷ Lyene ayanena ati, “Lino nafika ku lutwe lwa nkambi ilya, mundolekesye nu kucita vino namacita.

¹⁸ Lino impuka yane nga nani kwene twalizya intandala zitu, lyene namwe mulinzile kulizya intandala zinu ukuzinguluka insakwe ilya yonsi nga mupunde muti, ‘Ulwakwe Yawe na lwakwe Gidyoni’ ”

¹⁹ Gidyoni ni umba lyakwe umwanda onga yiiza ku lutwe lwa nkambi ilya pa nsita inono sile lino usiku pakasi utali ufike, ala asilika yauze yakalinda yacitandika sile uluti lwao. Lyene iyalizya intandala zyao nu kutama imisazi ilya iyali mu minwe yao.

²⁰ Alino impuka zyuze ziili izicita cili conga kwene. Yonsi kwene iyalema amalukozyo yao mu minwe yao iya kwimani, ni ntandala mu minwe yao iya kwilunji, nga iyapunda yati, “Ulupanga ulwakwe Yawe nga nu lwakwe Gidyoni!”

²¹ Umonsi wensi waimi pano yamusontelile, yalizizya insakwe, nga ivita vya anisi vyonsi ivyutuka vila vikukuta.

²² Lino antu yakwe Gidyoni yacili lizya intandala zyao, Yawe alenga ivita vya anisi yao kuti vizanzane ni mpanga. Ivyutuka kulungama ku Zaletani ivifika nu ku Beti Syita, mpaka nu ku musumba wa Abeli Meolaa pipi nu ku Tabati.

²³ Lyene aonsi amu mutundu wakwe Nafutali, na wakwe Asyeli, nga ni mbali zyoili zyakwe Manase iyayama, nga nayo iyacocovya aina Midyani.

²⁴ Gidyoni atuma inkombe konsi ku mpanga yakwe Efulemu, ya myamba, yakalande yati, “Tantamukini nu kwiza lwisya aina Midyani. Muyacilikizye konsi ukuli amanzi lino yatacili yafike kweneko. Muye ku ncende zyonsi ukufika nu ku Beti Bala, nu ku Luzi lwa Yodani kwene.” Awe mukwai aina Efulemu yene iyafika iyandalila ni ncende zya manzi zyonsi ukufika ku Betibala nu ku Luzi lwa Yodani kwene.

²⁵ Iyalema Olebu na Zeebu, aene yaili ya ina Midyani. Iyakoma Olebu apiwe lyakwe Olebu, na Zeebu iyamukomela pa cifenelo ca matingi cakwe Zeebu. Iyatwalilila kucocovya aina Midyani nga iyaletela Gidyoni imitwe yakwe Olebu na Zeebu, wino pa nsita ilya wali ku ufumondaka wa Luzi lwa Yodani.